Iratiko oihaneko mapa berria, udazkeneko laguna

Posted on 30/09/2014 by Euskal Herria bilduma

Iratiko Etxeak udazkenean. Argazkia: Oriol Conesa / Nafarroako Gobernua.

Sua argitaletxeak Iratiko oihaneko mapa berria plazaratu du 1:25.000 eskalan. Aribetik Orhiraino eta Urkulu eta Ortzantzurietatik Arthanolatzeraino, Garazi, Zuberoa, Aezkoa eta Zaraitzuko Irati osoa kartografia ederrean bilduta dakar lan honek. Noiz eta Iratiko basoa kolorez janzten zaigun aroan bertan.

Laster hasiko dira pagoak gorritzen, haritzak horizten eta orbelak airez aire. Orduan agertuko zaigu begien aurrean Iratirik sorginduena, magia dariola. Udazkenarekin batera milaka lagun hurreratzen da kolore festa horren usainean. Iratiko oihanaren mapa berriarekin guk aukeratuko ditugu lekurik egokienak, batzuetan ohiko parajeetatik ibiltzeko (Irabiako urtegia, Iratisoro, Iratiko etxeak, Abodiko bizkarra, Orbaizetako fabrika…) eta beste batzuetan Gorka Lopezek mapari atxikitako liburuxkan proposatu dizkigun ibilbide ederretan barrena lasai-lasai galtzeko (Arritzilar eta Itolatzeko malkarrak, Iratiko sorburua…).

Mapa Miguel Angulok egin du eta 970 x 675 milimetroko zabalera dauka. Liburuxkan Gorka Lopezek 15 txango proposatu dizkie irakurleei, hala paseoan ibiltzeko nola inguruetako tontorretara (Berrendi, Urkulu, Okabe, Orhi, Errozate…) igotzeko.

Baztan eta Zugarramurdiko mapa berritua argitaratu du Suak

Posted on 23/09/2014 by Euskal Herria bilduma

Erantzun

Oihanaren itzalpean, Xorroxinerako bidean. Argazkia: Txusma Perez Azaceta.

Baztan aldean gaudela, nola ez sentitu sorgindurik bailarako berde biziaren eta herri zein baserri zurigorrien zipriztinen aurrean, mendi harro baina eskuragarriek hesitzen gaituzten bitartean? Ahazturan galdutako ibarrak (Aritzakun, Urritzate…), legendari estu loturik bizi diren zokoak (Xorroxingo ur-jauzia), Auza bezalako mendi totemikoak, ikuspegi zoragarriak eskaintzen dituzten goi erlaitz malkartsuak (Iparla), akelarre usaina darien haitzuloak (ZUgarramurdiko Sorginen Lezea), Beartzungo baso sarriak, oihanaren barrenean iraun duen errota bakartia (Infernuko Errota)… Zerrenda nahi beste luza genezake eta herrien edertasuna erantsi beharko genioke, baita antzinako ekanduen xarma, bertako jendearen harrera beroa eta biziberriturik entzungo dugun euskara… Osagai horiekin nola ez sentitu ametsetako paradisuan?

Bertara bisitari joan nahi dutenentzat, Sua argitaletxeak Baztango mapa berritu eta gaurkotua kaleratu berri du, 1:25.000 eskalan. MIguel Angulo adituak egin du eta 970 x 675 mm zabalera dauka. Maparekin batera 48 orrialdeko liburuxka dakar. Bertan Gorka Lopez kazetari espezializatuak edizio honetarako beren-beregi prestatu dituen hamabost txango eta igoera aurkituko dituzue. besteak beste, natur erreserbetarako txangoak (Itsusiko Harria, Irubelakaskoa) eta bailarako mendi nagusietarako igoerak (Albako Harria, Legate, Auza, Iparla, Alkurruntz…).

Aizkorri-Aratz mendiguneko mapa berria

Posted on 28/07/2014 by Euskal Herria bilduma

Erantzun

Euskal Herriko mendizaleek sarritan jotzen dute Aizkorri-Aratzeko natur parkeko eremura, bertan baitaude izen eta izan handiko natur paraje zoragarriak. Eremu hori 1:25.000 eskalan kartografiatu berri du Miguel Angulok eta Sua Edizioak-ek argitaratu: Mapa Pirenaico atalean kaleratu da, ‘Sierra de Aizkorri-Aratz’ izenarekin.

Mapa berriak azken urteotan inguru horretan egin diren aldaketa guztiak erantsi ditu, baita eremu zabal horretako ibilbide seinaleztatu guztiak islatu ere (GR, PR, lekuan lekuko bideak eta Donejakue bidea). Osagarri gisa, mapari atxikitako liburuxkan Gorka Lopez mendizale adituak hemeretzi txango eta igoera proposatu ditu, Aizkorri eta Aratz aldeko lekurik ezaugarrienak ezagutzeko. Ibilbide horietako trackak laster izango dira Sua Edizioak argitaletxeko web gunean eskuragarri.

Horrela, mendizaleak esku-eskura edukiko ditu Urkilla, Elgea, Aloña, Aizkorri eta Altzania aldeko mendietako lekurik ederrenak. Degurixako sarobeetatik Aitxuriako tontorreraino (1.551 m) eta Altzaniako pagadi sarrietatik Ozetako troka meharretara. Jakina, toki klasiko guztiak ahaztu gabe: Arantzazu, Urbiako landa, Araotz, Aizkorri, Lezea, Aratz eta beste asko.