Urdaibai, Valderejo eta Baztango mapa berriak kaleratu ditu Suak

portadilla URDAIBAI

Euskal Herriko natur eremu ezaugarri bik mapa berri bana daukate. Alde batetik, Urdaibaiko biosferaren erreserba (Bizkaia) eta, bestetik, Valderejoko natur parkea (Araba). Biak ala biak Sua Edizioak argitaletxeak plazaratu ditu Mapas Pirenaicos 1:25.000 sailean.

Urdaibaiko biosferaren erreserba euskal kostaldeak ondoen gorde duen estuarioa da. Mendi apalak talaia itzelak dira padurak, artadiak eta itsasbazter zoragarria ikusteko. Urdaibaiko mapa bikoitza da, biosferaren erreserba bere osotasunean jaso ahal izateko. Horrela, Gaztelugatxetik Oiz mendiraino eta Bizkargiko tontorretik Eako lapatzetarainoko eremua ageri da, zehatz-mehatz, baita bertako ibilbide homologatu guztiak ere.

Valderejoko parke naturala, berriz, hustutako ibar txikia da. Baina mendi, oihan eta haitzarteak eremu babestutik kanpo ere zabaltzen dira, Gaubea ibarrean barrena, baita Burgosko Montes Obarenes-San Zadornil parkean ere. Eremu zoragarria da natura eta paisaiaren aldetik eta, Mapas Pirenaicos sailean ohikoa den bezala, zehaztasun handiz jaso da, tartean direla bertako ibilbide homologatu guztiak.

Horrez gain, Suak Baztango mapa argitaratu du berriz, nobedade bi erantsita. Alde batetik, mapa bikoitza izatera igaro da, ibar osoa bere baitan hartu ahal izateko. Bestetik, prezioa murriztuta dator, Urdaibai eta Valderejoko mapekin gertatzen den bezala, ez dakarrelako ibilbide gomendatuen liburuxkarik. Alegia, mapa hutsa da.

Miguel Angulo itzal handiko kartografoa da mapa guztien egilea.

portadilla-valderejo.jpg

Mapas Pirenaicos bildumako 3D aplikazioak zozketatuko ditu Suak

Bederatzi dira dagoeneko Mapas Pirenaicos bildumako 3Dko aplikazioak. Hemendik jaitsi daitezke smartphonetara (oraingoz Android sistemadunetara baino ez). Hasierako lauei (Monte Perdido-Gavarnie, Maladeta-Aneto, Aigüestortes-San Maurici eta Belagua-Zuriza) beste bost gehitu zaizkie: Bardeetako biak (Bardea Zuria eta Beltza), Aralar, Balaïtous-Vignemale eta Posets-Perdiguero.

Face au Sud enpresak egokitu ditu Miguel Angulok eta Gorka Lopezek atondutako jatorrizko mapak eta 3Dko errekreazio zoragarriak lortu ditu, inguru horietan mendi irteerak egin nahi dituztenentzat lagungarri bikainak. Goiko bideoak ematen du erabilera moduen eta aukeren berri.

Jaso bat doan

Sua Edizioak-ek Mapas Pirenaicos bildumako 3Dko aplikazio multzoa zozketatuko du. Esku hartzeko nahikoa da galdetegia betetzea abenduaren 11 baino lehen. Irabazleak abenduaren 14an jakinaraziko ditu Suak bere sare sozial guztietan.

Salgai daude 3Dko lehenengo lau mapak: Belagua, Aneto, Aiguestortes eta Monte Perdido

iphone

Aurreko astean iragarri genuen bezala, Sua Edizioak smartphonetan (sakelako telefonoetan) 3Dn ikusteko egokituko ditu Mapas Pirenaicos 1:25.000 ataleko mapak. Lehenengo lauak salgai daude, dagoeneko. Horietako bat Euskal Herrikoa da: Belagua-Zuriza, bertan ageri baita Uztarroze eta Auñamendi bitarteko eremua: Izaba, Belagua, San Martin Harria, Belabarze, Ezkaurre eta Anso ibarreko iparraldea (Linza, Acherito…).

Gainerako hirurak Pirinioetako erdialdekoak dira, mendizaleen kuttunak: Monte Perdido-Gavarnie (Ordesako parke naturalaren barrutia dakar), Maladeta-Aneto eta Aiguestortes-San Maurici. Zein baino zein erakargarriagoa.

Mapa bakoitzaren aplikazioak 5,99 euro balio du. Maparekin batera, Gorka Lopezek diseinatutako ibilbideen testuak ere erantsita dakartza. Behean, mapak zelan erabili azaltzen duen tutoriala.