“Rutas montañeras desde las capitales”, hiriburuetatik mendira

Liburu honek ezohiko planak dakartza aldean: hiriburu handienak abiapuntutzat hartuta, tontor, talaia eta balio handiko natur eremuen bila joatea. Rutas montañeras desde las capitales, Euskal Herria bildumako titulu berria, ideia horrekin dator, alegia, euskal herritar gehienak bizi diren hirigune nagusi horiek ere badirela igoera eta txango ederrei ekiteko leku egoki-egokiak.

Iruñea, Gasteiz, Donostia eta Bilbo mendiz inguratuta daude eta, gizakion presioak zeharo itxuraldatu baditu ere, eutsi egin diete bere balio natural gehienei eta horri esker aisialdi gune estimatuak bilakatu dira. Liburu honek hogeita lau ibilbide aukeratu ditu hiri handietako bihotzetatik abiatuta mendi gailur ederretara (Pagasarri, Arrieta, Arratzain, Ezkaba Txiki…), talaia ikusgarrietara (Igeldo, Artxanda, Olarizu, Oihana…), eta gure historiaren lekukoetara (Irulegiko gaztelua, Burdinazko Hesia, Eskibelgo dorrea, Txoritokietako gotorlekua…) heltzeko.

Egilea Txusma Perez Azaceta mendizale aditua da. Mendi-liburu asko argitaratuta dago, tartean bilduma honetan bertan agertu diren Las otras cumbres de la montaña vasca eta Rutas circulares fáciles, besteak beste.

Liburuak, gainera, Antxon Iturriza Aizpelen artikulu bat dakar hiriburuek euskal mendizaletasunarekin eduki duten harreman historikoaren gainean. Sarrerako testua Jesus Alquezar mendizaleari zor zaio.

“Pueblos de Iparralde”, Ipar Euskal Herriaren xarma

Ipar Euskal Herriko herriei xarma darie. Eta Pueblos con encanto de Iparralde liburuarekin xarma horren bila abiatu gara. Hasi erresuma ere izan zen Nafarroa Beherean eta kresalezko haizeak astintzen duen Lapurdira eta gure herrialderik ttipiena den Zuberoara helduko gara. Beti herri liluragarrien xerka. Beti edertasuna bidaide.

Eta biderik bide ibiliko gara hara eta hona, kontrabandisten urratsen atzetik batzuetan, erromesen zango nekatuen gibeletik bestetan, naturaren erdian beti. Orotara 24 ibilbide dakartza liburuak, herri ederren aldirietan naturaz gozatzeko. Eta, gainera, Zuberoako hiru zeinutegiko elizei bisita egingo diegu. Munduan parerik ez daukan arkitekturaren harribitxi hori ere zain baitugu.

Ipar Euskal Herrian barrena aise ibiliko gara Mar Ramírezen testu bizien eta Juan Carlos Muñozen argazki ederren bidez. Ez dago galtzerik!

“Xiberoako xendak”, Zuberoako mendi gida Robert Larrandabururen eskutik

Egunotan heldu da liburu-dendetara Xiberoako xendak. 59 ibilbide. 35 gailur mendi-gida berria. Euskal Herriko herrialderik ttipienak mendi ikusgarriak dauzka bere geografian zehar barreiaturik eta gida honek tontor horietara igotzeko ibilbiderik egokienak bildu ditu.

Pettarra, Arbaila eta Basabürüa aldeko igoerarik kitzikagarrienak aurkituko ditugu liburu honetako orrialdeetan: pagadi zabalez hornitutako Arbailako mendiak, Madalena mitologikoa inguratzen duen mendigunea, Baretouseko ibarretik banatzen duen mendilerroa eta, jakina, Nafarroarekin partekatzen dituen mendi ezaugarriak. Hor azalduko zaizkigu Lakhura, Orhi, Otsogorrigaña…

Egilea Robert Pipas Larrandaburu mendizale ezaguna da. Larraineko seme horrek ibilbiderik politenak aukeratu ditu eta, gainera, Zuberoako kulturako eta historiako hamaika konturen berri eman du, naturaz eta kulturaz batera goza dezagun.

Liburuaren edizio bi plazaratu ditu Sua Edizioak-ek: euskarazkoa, batetik, eta frantsesezkoa bestetik. Zuberoakoaz gain, azken urteotan Nafarroa, Araba eta Gipuzkoako mendi-gidak berritu eta handitu ditu argitaletxeak. Udazkenean Bizkaiko gida kaleratuko du, hori ere goitik behera berritua eta zabaldua. Zuberoakoa da euskaraz agertu den lehenengoa.