“Izarrak eta haitzak”, eskalatzaileen istorio handi eta txikiak

Posted on 23/04/2024 by Euskal Herria bilduma

Liburu Egunarekin batera heldu da liburu-dendetara Karlos Aretxabaletaren Izarrak eta haitzak izeneko harribitxi hau. Egileak hogei bat eskalatzaileren bizipenak ekarri dizkigu, maisuki kontatuta. Batzuk ospestsuak dira, mundu osoan ezagunak. Besteak, ostera, ibilbide isilagoa egin dute. Baina denek dute zer kontatua.

Izar eta haitzen arteko bidaia zoragarri honetan oroitzapenak gidari hartuko ditugu Euskal Herriko zein atzerriko mendietan barrena, eskalatzaile andana honen ibileren berri jakiteko. Batzuetan anekdota xume baina esanguratsua izango da; beste batzuetan, garai bateko giroaren lekukotza, edo ibilitako bidearen bizipen erakusgarria. Hasi eta buka gustu handiz irakurtzeko moduko liburua.

Karlos Aretxabaleta, Txapel, eskalatzailea eta idazlea da. Poesia eta narratiba liburu andana argitaratuta dago, besteak beste Hitz Margotuak (EME, 2016) edo Sex-sua (Elkar, 2021). Liburuaren salmenten bidez lortutako irabaziak SOS Himalaya Fundazioari emango dizkio egileak. Liburuko sarrera Juanra Madariagak idatzi du; hitzostea, berriz, Ioritz Gonzalez Lertxundirena da. Azaleko ilustrazioa, azkenik, Eli Azurmendik egin du.

“Aupa Pou”, Pou anaien eskalada abenturak

Posted on 30/04/2021 by Euskal Herria bilduma

Erantzun

Liburu-dendetan da, dagoeneko, Aupa Pou. Bizitzari sokaz lotuta liburua. Iker eta Eneko Pou anaiek azken hogei urteotako ibilerak kontatu dituzte, lehenengo aldiz liburu batean. Eta Poutarrek eurek aitortzen duten bezala, hara eta hona ibili dira horma bila bizitza bera abentura etengabea bilakatu arte. Abentura horretan mundu zabalean ibili dira eta pertsona paregabe asko ezagutzeko aukera eduki dute.

Bizitza eta abentura horiek dira liburu honetako mamia. Eta, jakina, liburuak jaso du euren bizitzek nolako aldaketa egin zuten 2000. urtean, haien zaletasunik handiena, mendia, bizimodu ere izango zutela erabaki zutenean. Harrezkero eskalada munduan jorratu duten ibilbide harrigarria edonor txundituta uzteko modukoa da.

Argazki ezin ederragoz jantzita datorren liburua da, gasteiztar anaia bi hauen lanaren neurria egoki ematen dutenak. Eta Eneko Pouk ondu duen testuak Patagoniatik Etxaurira, Tasmaniatik Asturiasera eta Himalayatik Alaskara eramango gaitu. Abentura hutsa.

Lerroon azpian esteka bat utzi dugu, liburuaren sarrera eta atal bat irakurgai jatzeko. Lotu Poutarren sokara!

pou_eus_atala Deskargatu

“Montañas de risa”, txango bete barre

Posted on 22/12/2015 by Euskal Herria bilduma

Erantzun

MONTANASdRISA1

“Montañas de risa” izango da, inolako zalantzarik gabe, Suak urte akabuan argitaratu dituen nobedadeen artean harrigarriena. Umore grafikoa jorratzen duen liburua da, baina berezitasun ederraz jantzita datorkigu: islatzen dituen egoera komiko guztiak mendiarekin, abentura-kirolekin, kanpinarekin, familia txangoekin edo eskaladarekin lotuta daude.

Egoera horietako asko ezagunak egingo zaizkie aisialdian jarduera horietan aritzen direnei. Beste batuzk, ostera, zorokeriak dira, muturreraino eramanda. Batzuek eta besteek, seguru gaude, irribarrea marraztuko dute gure ezpainetan irakurri ahala.

Gidoiak bikainak izateaz gain, bineten kalitatea dira liburuaren ezaugarrietako bat. Egilea Norberto Fernandez Serrano dugu, benetako espezialista, hamaika komikiren egilea hala umore grafikoaren arloan nola komikigintza klasikoaren esparruan.