Mendia elkartasunerako bide bihurtu du Baltistan fundazioak

baltistan

Arrasaten Baltistan Fundazioak egindako aurkezpenaren irudia.

Baltistan fundazioa hezkuntza eta genero berdintasunerako proiektuak garatzen ari da Pakistango Hushe ibarrean (Baltistan bailara). Fundazioak elkartasuna du xede, mendian nagusi diren baloreak –lankidetza, naturarekiko begirunea, irmotasuna, lana gogor egitea eta baikortasuna, besteak beste- aintzat harturik.

Fundazioak garatu dituen eginkizunetako bat bailarako umeen heziketa hobetuko duten irakasleak eta hezitzaileak formatzea da. Azken urteetan aldaketa handiak izan dira ibarrean, nahiz eta, fundazioko arduradunen iritziz, “emakumeak unibertsitatera joatearen aurkako erresistentzia handia izan den; ez dute ulertzen emakumeek zergatik joan behar duten eskolara edo unibertsitatera”.

Baltistan fundazioak iragan martxoaren 26an aurkeztu zituen egitasmoak, Arrasaten. Hitzaldian egon ziren, besteak beste, fundazioko lehendakaria, Jose María Ruiz, eta idazkaria, Inaxio Arregi.

Informazio gehiago: www.baltistan.eus

Gorriz jantzitako egunak

20141121_103010Haritz zaharren basoa. Munain-Okariz (Araba).

Bazterrak gorriz jantzi dira egunotan. Edo okrez, horiz, laranjaz. Urtarorik ederrena bere onenak ematen ari da orriak orbel bihurtzen diren bitartean. Etxeko epela utzi eta mendira jotzeko grina hauspotu egin digu. Kolore festa txundigarria dago gure zain.

Hamaika leku egoki daude egun hauetako edertasunaz gozatzeko. Argazkikoa, esate baterako, Entziako mendien abaroan mendez mende hazi den Munain eta Okarizko basoa, haritz zaharren (500 urtetik gorakoak, asko) zuhaiztia. Hori eta beste asko Rutas por los bosques más bellos liburuan ageri dira. Beste aukera klasikoak Aizkorri-Aratz, Aralar, Baztan, Urbasa eta Iratiko oihana izan litezke. Horietara joez gero ere, lagungarriak izango dira Suaren mapa berrituak.

Eta, jakina, zuhaitz zaleak bagara, komeni da zuhaitzen gidaliburua aldean eramatea, aurrean daukagun edertasunaren ardura norena den jakin dezagun.

 

Hego haizea lagun

laga2014kourriaLagako hondartza (Ibarrangelu), urriko goizalde eder batean.

Udazkenean, udagoienean, larrazkenean, ohikoak izaten dira hego haizea dabilen egunak. Ez dira hain ohikoak urrian zehar eduki ditugun tenperaturak, epelak baino gehiago, beroak. Baina, hala ere, aukera polita eman digute mendialdean gozatzeko eta itsasbazterretako paraje ederretan barrena ibiltzeko.

Hego haizea zebilen goiko argazkia egin zen goizaldean. Hobeto esanda, erreka haizea, edo herriko haizea, edo aizerria, beste leku batzuetan andre-haize esaten dioten hegoaldeko ufada epela. Hari esker bilakatzen dira goizaldeak eta ilunabarrak oskorri, zerua, itsasoa eta lurraldea eder-eder jantzirik.

Goza ditzagun iraun bitartean, egunen batean di-da aldatu eta datorren urtera arte joan egingo dira eta. Hotzen, eurien eta elurren aroa etorriko da orduan, hura ere eder eta kitzikagarri.