“Valles secretos de Gipuzkoa” liburuko ibar sekretuak

Posted on 13/01/2023 by Euskal Herria bilduma

Zer esana ematen ari da Valles secretos de Gipuzkoa liburu berria. Izan ere, zeintzuk dira Joana Garciak eta Txemi de los Doloresek aukeratu dituzten ibar horiek? Hain isilpekoak, ezezagunak ote dira? Bada, haran zerrenda osoa lerroon azpiko pdfan daukazue, liburuaren lehenengo orrialdeekin batera. Egonda gaude? Ezagutzen ditugu?

Orotara, 23 bailara proposatu dizkigute liburu honetan. Hor dago tentazioa. Eta ez pentsatu ibarrak izanik paseo errazak bakarrik aurkituko dituzuela liburuan. Hau mendizaleentzako proposamena da, Gipuzkoa beste era batera ezagutzeko eta sarritan bazterrean gelditzen diren parajeetan barrena tontor eta eskualde ederrak tipi-tapa ibiltzeko.

Egonda zaude? Ezagutzen dituzu Gipuzkoako ibar ezkutuak?

eh53_valles_secretos Deskargatu

Alberto Murok “Guía de montes de Bizkaia” liburua aurkeztu digu

Posted on 02/12/2022 by Euskal Herria bilduma

Erantzun

Inor ez da harrituko Alberto Muro eta Ane Otxoa de Alda, Guía de montes de Bizkaia liburuaren egileak alegia, mendian harrapatu ditugula jakitean. Hala izanda, ur-jauzi baten alboan gelditu eta mezu bat bidali digute, liburuaren berri emateko. Bizkaiko mendiak ezagutu, ibili eta zaindu nahi dituzten guztientzat, ezinbesteko liburua da hau. Hona hemen egileen mezua:

“Andres Espinosa”, libre eta bakarrik ibili zen aitzindariaren komikia

Posted on 29/11/2022 by Euskal Herria bilduma

Erantzun

Bi urtean behin, Mendifilm jaialdiak eta Sua Edizioak-ek indarrak batzen dituzte euskal mendizaletasunaren gaineko komikia plazaratzeko. Aurtengoa hirugarrena da eta, zalantzarik gabe, zirrara eragingo du. Andres Espinosa. Bakarrik eta libre komikiak bere bizitza harrigarria islatu du. Aitzindaria izatea zer den erakutsiko digu!

Andres Espinosa Etxebarria (1903-1985) zornotzarrak balentria ikaragarriak egin zituen euskal mendizaletasuna abiatu berritan zegoenean. Euskal Herriko mendiak igo eta gero, atzerrira jo zuen abentura bila, baita aurkitu ere: Urriellu soka barik eskalatu zuen, Mulhacen, Veleta eta Teidera bakarrik igo zuen, Mont Blanc eta Cervino bakarrik eskalatu zituen lehenengoa izan zen, Afrika zeharkatu zuen Kilimanjaroko gailurrera heltzeko, Himalaiaraino joan zen bertako tontorren bila… 1936ko gerrak eten zion bidea, baina artean egindakoa edonor harri eta zur uzteko modukoa da.

Haren bizitza dakarren komikian Ramon Olasagastiri zor zaio testua. Ilustrazioak eta koloreak, berriz, César Llagunoren eta Felipe H. Navarroren eskutik etorri dira. Emaitza, zalantzarik gabe, bikaina da, Espinosak merezi zuen neurriko komiki ederra.

Aurretik beste komiki argitaratuta daude Sua Edizioak eta Mendifilm jaialdia elkarlanean. Lehenengoa, 2018an, Everest. Herri bat gailurrean izan zen. 2020an Iñurrategi anaiak. Mendiari bihotz emanak kaleratu zen. Zaletuek harrera ezin beroagoa eman zieten biei.