“Xiberoako xendak”, Zuberoako mendi gida Robert Larrandabururen eskutik

Egunotan heldu da liburu-dendetara Xiberoako xendak. 59 ibilbide. 35 gailur mendi-gida berria. Euskal Herriko herrialderik ttipienak mendi ikusgarriak dauzka bere geografian zehar barreiaturik eta gida honek tontor horietara igotzeko ibilbiderik egokienak bildu ditu.

Pettarra, Arbaila eta Basabürüa aldeko igoerarik kitzikagarrienak aurkituko ditugu liburu honetako orrialdeetan: pagadi zabalez hornitutako Arbailako mendiak, Madalena mitologikoa inguratzen duen mendigunea, Baretouseko ibarretik banatzen duen mendilerroa eta, jakina, Nafarroarekin partekatzen dituen mendi ezaugarriak. Hor azalduko zaizkigu Lakhura, Orhi, Otsogorrigaña…

Egilea Robert Pipas Larrandaburu mendizale ezaguna da. Larraineko seme horrek ibilbiderik politenak aukeratu ditu eta, gainera, Zuberoako kulturako eta historiako hamaika konturen berri eman du, naturaz eta kulturaz batera goza dezagun.

Liburuaren edizio bi plazaratu ditu Sua Edizioak-ek: euskarazkoa, batetik, eta frantsesezkoa bestetik. Zuberoakoaz gain, azken urteotan Nafarroa, Araba eta Gipuzkoako mendi-gidak berritu eta handitu ditu argitaletxeak. Udazkenean Bizkaiko gida kaleratuko du, hori ere goitik behera berritua eta zabaldua. Zuberoakoa da euskaraz agertu den lehenengoa.

Alex Txikonek “Mendi biluzia” liburua aurkezten du

Alex Txikonek Nanga Parbat mendiko bere ibilerak bildu ditu liburu kitzikagarri baten. Ahoan bizarrik gabe eman ditu “Mendi biluzia” neguan igotzeko ahaleginen berri, baita inguru hartan Daniele Nardi eta Tom Ballard erreskatatzeko saioa gomutara ekarri ere. Bideo horretan aurkezten du liburua, labur-labur.

Eta beheko argazkian, Nanga Parbateko espedizio kide bi ageri dira, “Mendi biluzia” liburua eskuratu berritan. Muhammad Ishaq eta Ali Sadpara dira, hurrenez hurren. Ali gailurrean egon zen Alexekin 2016ko igoera mitikoan. Ishaq, berriz, sukaldari aritu zen.

“Mendi biluzia”, Alex Txikonen ibilerak Nanga Parbaten

“Mendi biluzia” esan nahi du Nanga Parbatek eta zortzimilakoen artean teknikoena eta arriskutsuena izateko ospea dauka, K2arekin batera. Izen horixe darama goiburu asteon liburu-dendetara heldu den liburu berriak. Alex Txikonek idatzi du eta bertan mendi horretako bere ibilerak kontatu ditu, bereziki 2016ko neguko igoaldia.

Liburuan lehenengo pertsonan ekarri ditu gogora mendiko gorabeherak, tartean direla Nanga Parbatera igotzeko saiakera guztiak jakina. Testua gutxi balitz, argazki sorta bikainaz jantzita dator. Orrialdeak pasatu ahala, Alex Txikonen buruan egongo gara, espediziokide izango gara, hotza sartuko zaigu barru-barruan, eta haize izoztuak astinduko du gure gorputza… baina, zailtasun ikaragarriei aurpegia emanez, Naga Parbateko gailurrera igoko gara berarekin.

Horrez gain, hurrengo urtean, K2ra igotzeko espedizioan zebilenean, Daniele Nardi eta Tom Ballard alpinistak Naga Parbateko Mummery bidean galduta zeudela jakin eta martxan jarri zuen erreskatean gertatutakoaren berri izango dugu.