“Rutas para descubrir Aragón”, autoz egiteko hamaika txango zoragarri

azalaAragoi

Kalean da “Rutas para descubrir Aragón. Los mejores itinerarios en coche”, Aragoik gorde dituen natura-, kultura-, gastronomia- eta paisaia-altxorrak aurkitzeko txangorik onenen bilduma. Hamaika ibilbide dira, Aragoin zehar goitik behera eta ezker-eskuin ibiltzeko, hasi Anso ibarrean eta Maestrazgoraino.

Autoz egiteko txango hauetan Pirinioetako gailur itzelak, mudejar eta erromaniko estiloko arte alerik ederrenak, jatorri izendapena daukaten produktuak –urdaiazpikoa, ardoa, trufak, bildotsa…- eta parajerik liluragarrienak aurkituko ditugu. Hirietako turismoa ahaztu barik, jakina, horretarako daude eta hiru hiriburuak.

Liburuan informazio guzti-guztia aurkituko ditugu, hala txango bakoitza egin ahal izateko nola lekuan lekuko altxorrekin gozatu ahal izateko. Argazki ederrez hornituta dator, bai eta errepide-mapekin ere.

Egilea Jordi Bastart da, eskarmentu handiko idazle eta argazkilaria, hamaika bidaia-libururen sortzailea. Liburu hau Sua Edizioak-en “En ruta” bildumako bosgarrena da. Aurretik, besteak beste, “Rutas para descubrir Lleida” eta “Rutas para descubrir Barcelona” agertu dira, biak ala biak Jordi Bastartek egindakoak, hala gaztelaniaz nola katalaneraz.

This slideshow requires JavaScript.

 

“Parque natural de Izki”, altxor ederra denon eskura dago

EH37_IZKI(cubierta).indd

Urte berriarekin batera Euskal Herria Liburuak bildumak argitara atera du oharkabean igaro izaten den altxor ikaragarria: Izkiko parke naturala (Araba), gure herriko biodibertsitatearen tenpluetako bat, oihan, troka, hezegune eta tontor ederren paradisua. Eremu harrigarri hori, gutako gehienontzat ezezagun eta, oro har, gutxitan bisitatua, Jonathan Rubines biologoaren eskutik ezagutuko dugu.

Orotara 9.143 hektarea zabal da Izkiko parke naturala eta Arabako Mendialdeko eskualde ikusgarrian dago. Bere zabalean, hamaika pasaia liluragarri batzen ditu. Guztien artean nabarmentzen da, zelan ez, Euskal Herriko ameztirik zabalena (3.600 hektarea), baina ez dira gutxi pagadi itzelak (batez ere iparraldean), artadi sarriak, haltzadiak… Oihan ederrez gain, Izkik natura-bizitza oparoa gorde du, dela arrano beltza, saizuria edo okil ertaina, hezeguneetan gaindi ibiltzen den sorgin-orratza sorta joria ahaztu gabe.

Liburuaren egilea Jonathan Rubines da, biologoa eta eremu naturalen kudeatzailea. Bertatik bertara ezagutzen ditu Izkiko bazter guztiak. Hogei ibilbide aukeratu ditu Izkiko parke naturala eta inguruak denon esku jartzeko. Harri eta zur ibiliko gara baso itzel, haitzarte harrigarri, ur-jauzi dotore eta mendi tontor lerdenetatik.

This slideshow requires JavaScript.

“Rutas para observar animales”, naturara itzultzeko gonbita

EH36_ANIMALES Observacion(cubierta).indd

Euskal Herria bildumak argitalpen paregabeaz esango dio agur 2019. urteari. “Rutas para observar animales” liburuak gure geografian barrena ibiltzeko 30 txango proposatzen ditu, animaliak bizi diren lekuak ezagutzeko eta, zortea lagun, beraiek ikusteko itxaropenaz. Egileak Juan Carlos Muñoz biologo eta argazkilaria eta Mar Ramirez natura-gidaria dira.

Ibilbideak Euskal Herri osoan zehar barreiatzen dira, ekosistema sorta joria osatu arte. Hasi Bizkaiko Golkoko uretan eta segi Pirinioetako goi gailurretaraino edo Bardeetako basamorturaino. Horietan gordetzen baitira, besteak beste, gure kostaldera hurreratzen diren zetazeo handiak, marruka aritzen diren oreinak, basoetan gordetzen diren tximeletak edo bortuetatik igarotzen diren milaka hegaztiak.

Lakuak, oihanak, mortuak, subalpetar paisaiak, zingirak, labarrak eta ibaiak dira bisitatzeko gonbita luzatzen diguten ekosistemetako batzuk, beti ere tentuz, isil-isilik, begirunez eta kalterik eragin barik ibiltzeko konpromisoarekin. Horrela jokatu ezkero, beharbada, gure natur eremuetako espezie batzuekin egingo dugu topo.

Testuak Mar Ramírez natura-gidari adituari zor zaizkio. Argazkiak, berriz, Juan Carlos Muñoz sarritan sarituari. Hala testuek nola irudiek fauna basatiaz gozatzeko atea irekiko digute eta, horrekin batera, gure natura ahal denik eta ondoen gordetzea beharrizan larria dela ohartuko gara.

This slideshow requires JavaScript.