“Parque natural de Izki”, harrera beroa jaso duen liburu bikaina

Eskualde zoragarria da Arabako Mendialdea, eremu natural jorien gordeleku. Horietako bat da Izkiko parke naturala, 9.000 hektarea zabal den esparru babestu itzela. Lekurik ederrenak ezagutzeko hogei ibilbide bildu ditu Jonathan Rubines biologoak “Parque natural de Izki” liburuan. Liburu handia osatu du, eta tamainako erantzuna jaso du: hilabete darama salduenen zerrendan Elkar liburu-dendetan.

Izan ere, bigarren ere egon da erdarazko ez-fizkioa atalean, astebetez. Gainerakoetan, hirugarren edo laugarren salduena izan da. Harrera itzela egin diote mendizaleek, dudarik ez da. Zer dauka ba liburu honek? Alde batetik, natur eremu harrigarri eta oparoak eduki arren euskal herritar gehienontzat oso ezezaguna den parke naturala eman du ezagutzera. Bestetik, hogei ibilbide zoragarri proposatu ditu, mota guztietako paisaietan barrena: haitzarteak eta trokak, ibaiertzak eta ur-jauziak, ameztiak eta pagadiak, aintzirak eta ubideak, eremiten kobazuloak eta mandazainen bideak… eta, jakina, mendi tontor ederrak. Hemen dago zerrenda osorik:

EH37_IZKI7aurkibidea

Ibilbideak ez ezik, liburuak badakartza zazpi kontu eta istorio Izkiko bazterrak, herriak eta jendeak hobeto ezagutzeko. Izkiko altxorra guztion esku egotea Izkiko belaunaldi askori zor diogu eta.

EH37_IZKI7

 

“Parque natural de Izki”, altxor ederra denon eskura dago

EH37_IZKI(cubierta).indd

Urte berriarekin batera Euskal Herria Liburuak bildumak argitara atera du oharkabean igaro izaten den altxor ikaragarria: Izkiko parke naturala (Araba), gure herriko biodibertsitatearen tenpluetako bat, oihan, troka, hezegune eta tontor ederren paradisua. Eremu harrigarri hori, gutako gehienontzat ezezagun eta, oro har, gutxitan bisitatua, Jonathan Rubines biologoaren eskutik ezagutuko dugu.

Orotara 9.143 hektarea zabal da Izkiko parke naturala eta Arabako Mendialdeko eskualde ikusgarrian dago. Bere zabalean, hamaika pasaia liluragarri batzen ditu. Guztien artean nabarmentzen da, zelan ez, Euskal Herriko ameztirik zabalena (3.600 hektarea), baina ez dira gutxi pagadi itzelak (batez ere iparraldean), artadi sarriak, haltzadiak… Oihan ederrez gain, Izkik natura-bizitza oparoa gorde du, dela arrano beltza, saizuria edo okil ertaina, hezeguneetan gaindi ibiltzen den sorgin-orratza sorta joria ahaztu gabe.

Liburuaren egilea Jonathan Rubines da, biologoa eta eremu naturalen kudeatzailea. Bertatik bertara ezagutzen ditu Izkiko bazter guztiak. Hogei ibilbide aukeratu ditu Izkiko parke naturala eta inguruak denon esku jartzeko. Harri eta zur ibiliko gara baso itzel, haitzarte harrigarri, ur-jauzi dotore eta mendi tontor lerdenetatik.

This slideshow requires JavaScript.

“Parque natural y sierra de Aralar”, mendira jotzeko gonbit tentagarria

EH33_ARALAR(cubierta).indd

“Parque natural y sierra de Aralar”, Euskal Herria bildumako liburu berria alegia, eskuetan hartzea nahikoa da mendira jotzeko tentazio kitzikagarria sentitzeko. Zehatzago esanda, Gipuzkoa eta Nafarroa artean zabaltzen den mendigune horretako edozein mendira, gure herriko paisaien eta kultur ondasunen arragoa baitira. Tentatuko gaituzte inguru hartako leku zoragarrietara igotzeko proposamenek eta tokian tokiko edertasun menderagaitza fideltsasun osoz islatu duten argazki zoragarriek.

Liburuan hogeitahiru proposamen aurkituko ditugu, mendigune osoan zehar ibiltzeko, hala Gipuzkoako alderdian (parke natural gisa sailkatuta dagoena) nola Nafarroakoan. Igoerak, zeharkaldiak, txangoak eta ibilbide laburrak dira, beti ere Aralarko zokondo ederren bila. Larre zabalak, gailur harroak, hariztiak, pagadiak, artadiak, ur-jauziak, leize eta eremu karstikoak… Aralar zertan den erakutsiko diguten proposamen horietan lurraren taupadak sentituko ditugu.

Egilea, Juanjo Garbizu, mendizale porrokatua da. Arlo honetaz duen eskarmentua eta jakinduria liburu, gida eta youtuben daukan kanalaren bidez zabaldu du.

Bilduma honetan ohi den bezala, proposamen guztiak zehazki deskribatuta ageri dira, jakingarriz egoki hornituta eta aldean mapa eta argazki dotoreak ekartzen dituzte. Mendira jotzeko tentaldiari nork eutsiko?

This slideshow requires JavaScript.