Artxiboa laburpen hitzeka: natura

Animalien loa, naturarekiko jakin-minaren pizgarri

Posted on by
Erantzun

Zergatik egiten dugu lo animaliok? Eta zertarako? Kontuan izan lo egitea arriskutsua dela animalia basatientzat, kanpoko ingurunearekin lotura galtzen baita lo gaudenean. Mota guztietako lo kuluxkak topatu daitezke animalion erreinuan: burmuin erdia lokartuta egiten direnak, zutik, etzanda, edo uretan murgilduta, hegan edo murtxikatzen den bitartean gertatzen direnak, segundo gutxitako lo-kuluxkak, edo sei hilabetekoak…. Ia animalia espezieak bezainbeste lo egiteko modu daude, eta batzuk benetan dira bitxiak. Jakin nahi duzu nola egiten dute lo animaliek? Has gaitezen bada, eta ez lorik hartu!

Adi Natura bildumako liburu honek, Irati Diez Virtoren testu zoragarriekin eta Maddi Astigarragaren ilustrazio liluragarriekin, umeen interesa piztu nahi du, naturarekiko eta, bereziki, animalia basatiekiko jakin-mina sustatu. Animalia horien eta haien ezaugarri harrigarrien berri izan ahala, irakurleak ere bere burua hobeto ezagutuko du eta, bide batez, ohartuko da noraino garen gizakiok naturaren partaide.

Nahi baduzue kuku bat egin liburuko orrialdeetan barrena, lerro hauen azpian lagin bat laga dugu. Gozatu!

AnimalienLOA_sareakDownload

“Fauna gida”, Euskal Herriko natura ezagutzeko ezinbesteko lanabesa

Posted on by
Erantzun

Azal deigarri horren atzean lan mardula dakar Sua Edizioak-eko Guías Natura saileko ale berriak. Euskal Herriko Fauna Gida liburu mamitsua da oso, jakingarriz beteta eta zer pentsatua ematen duena. Harrituko gara gure natura eremuetako animalia sorta zabala ezagutzean, gure paisaiak nola sortu diren jakitean eta espezieen azken hamarkadetako joeren berri jasotzean. Egilea, Iker Elosegi, Euskal Herri osoari begira jarri da gure natura zertan den azaltzeko. Emaitza kitzikagarria da.

Liburu honen xedea gure herrian bizi diren animalia basatiekiko jakin-mina piztea da. Horretarako naturazale jarrera hartzea proposatzen du. Ikusi edo entzun baino gehiago, basapiztiei begiratzea eta aditzea da kontua, non eta nola bizi diren ulertzeko, haiekin partekatzen dugun planeta zati honetako ekosistemetan duten lekua ulertzeko. Orotara, 150etik gora animalia aipatzen baditu ere, liburua ez da espezie-katalogo bat. Animalia horien gaineko jakintza zabaltzera, beste espezie batzuk ezagutzeko gogoa piztera eta bizi garen ingurumena hobeki ulertzeko gakoak ematera dator.

Iker Elosegi (Baiona, 1965), biologia eta agronomia ikasketak egin zituen eta gaur egun Euskal Herriko Laborantza Ganbarako koordinatzailea da. LIburuan erakutsi duen bezala, gure herriko bazter guztietako natura ondo baino hobeto ezagutzen du eta etorkizunari begira jarraitu beharreko ildoei buruz ere gogoetak partekatu ditu. Hortaz, Euskal Herriko naturaz janzteko eta hausnartzeko lanabes bikaina da Elosegik ondu duen liburu hau.

Argazki andana bat lagun, liburua Guías Natura sailean argitaratu da. Aurretik bertan dira, euskaraz, Euskal Herriko Zuhaitzen Gida eta Euskal Herriko Hegaztien Gida. Fauna gidako lagin bat utzi dugu lerroon azpian, nahi baduzue ikusi.

EHkoFAUNAgida_sareakDeskargatu

“Rutas para fotografiar la naturaleza”, natura eta argazkiak batzen dituen liburua

Posted on by
Erantzun

Euskal Herria bildumako liburu berria begietatik sartuko zaigu, dudarik gabe, baina azala ez ezik, mamia ere badu, eta ez nolanahikoa. Xabier Sukunza mendizale argazkilariak egin digun gonbita guztioi balio zaigu, baita argazkiak segapotoz ere egiten ez dutenei ere. Rutas para fotografiar la naturaleza liburuan 22 ibilbide proposatu ditu mendiaz eta naturaz gozatzeko eta argazkigintzan trebatzeko.

Liburuak bost atal nagusi ditu: mendiko ibilbideak (Ioar, Udalatx, Lokiz…), itsasaldekoak (Gipuzkoako flyscha, Gaztelugatxe, Mundaka…), oihan eta ur-jauzietakoak (Iruerreka, Belaustegi, Urbasa, Oieleku…) ordoki eta mortuak (Baigorri, Bardea…) eta gau bibakak (Zemeto eta Auñamendi). Ibilbideak deskribatzeaz gain, argazkiak non, noiz eta zelan egin proposatu du egileak. Beste atal batean, gainera, argazkigintaren oinarrizko jakingarriak azaldu ditu.

Jakina, liburuan ageri dira Sukunzak irakurleei proposatzen dizkien argazkietako batzuk. Oro har, liburuko orrialdeak pasa ahala gozatu ederra hartuko dugu, pasaia argazki sorta zoragarriekin.

Xabier Sukunza (Lizarra, 1995) mendizalea eta argazkilaria da. El Mundo de los Pirineoseko 2022ko egutegiko argazkien egilea da. Aurten ere Rutas para vivaquear y fotografiar estrellas. Pirineo Occidental y Central liburua plazaratu du.