“Las mejores rutas en BTT”, Euskal Herria bizikletaz ezagutzeko deia

Euskal Herria Liburuak bildumako 2021eko lehenengo emaitzak, “Las mejores rutas en BTT” liburuak alegia, gure herriko natura-eremuetan barrena bizikletaz ibiltzeko gonbitea dakar. Gure geografia joria ezagutzeko ibilbide zirkularrak proposatu ditu, hala itsaslabar malkarren gainetik nola Bardeetako mortuetatik, Pirinioetako gailur harroak edo Arabako harizti zabalak ahaztu gabe. BTTz egiteko pentsatuta badaude ere, ibilbide hauek ezagutaraziko dizkiguten lekuetako batzuk oinez ere egin genitzake, hala nahi izanez gero.

Liburuak, gainera, nobedadeak dakartza. 2021. urtean zehar bildumako liburuek diseinua berritu eta eguneratuko dute, edukiak are erakargarriagoak egiteko ahaleginean. Esaten dugunaren erakusgarri bikaina da post honen buru paratu dugun liburuaren azal ederra.

Iván Ruiz Rotaechek idatzi ditu liburuko testuak eta egin ditu liburuko argazkiak. Mendizale eta txirrindulari iaioa, ondo baino hobeto ezagutzen ditu Euskal Herriko natura-eremuak. Pyrenaica aldizkariko erredakzio kontseiluko kidea da. Zer hobeto liburua Ivánek berak aurkeztea baino? Aurrera bideoa!

Gainbegiratua Euskal Herriko ugaztunen gidari

Euskal Herriko ugaztunak ezagutu nahi dituzu? Jonathan Rubinesek ondutako “Guía de mamíferos de Euskal Herria” gidan aurkituko dituzu. Euskal Herriko basafaunako 99 ugaztun espezie batu ditu, hala lehorrekoak nola itsasokoak. Eta oso erabilgarria da. Espezie guztien fitxa multzo bikaina ez ezik, animalia bakoitza identifikatzeko gako sorta ere eskaintzen du, hasi oinarrizko jakintzetatik eta buka ikuspegi zientifikoagoan, kaskezurretako ezaugarri bereizleak espezieka jarrita. Nahi duzu probatu? Klikatu lerroon azpiko esteka eta animalia batzuen fitxak eskuratu ahal izango dituzu.

Eta natura maite baduzu, ez ahaztu Euskal Herriko natura ezagutzera eman nahi duen Guías Natura sailean bertan, ugaztunen gidaz gain, ondoko hauek ere plazaratu direla: “Euskal Herriko hegaztien gida”, “Euskal Herriko zuhaitzen gida” eta “Guía de flores de Euskal Herria”.

“Rutas circulares fáciles”, Euskal Herriko mendiak ezagutzeko gonbita

EH40_Rutas_circulares_fáciles

Udari etekina atera nahi dionak Euskal Herria Liburuak bildumako ale berrian aurkituko du nondik nora jo. Txusma Perez Azaceta mendizale adituaren eskutik “Rutas circulares fáciles” liburua dator, zeinak 45 ibilbide zirkular bildu dituen, denak zailtasun teknikorik edo bestelako eragozpenik gabekoak eta, jakina, denak Euskal Herrian barrena.

Izan ere, txango eta igoera hauek Euskal Herriko mendien, ibarren, oihanen eta haitzarteen bila abiatzen dira. Basoetan ibili nahi duenak Soila, Itxina, Artikutza edo Bertizko ibilbideak aukera ditzake. Itsasoaren kresal usainaz biziberritu gura duenak, berriz, kostaldeko talaia ederrak dauzka esku-eskura: Ogoño, Ermua (Gorliz), Pagoeta edo Mitxitxola (Jaizkibel). Zelai eta muinoak kateatu nahi izan ezkero, Harana ibarra, Lokizko ordekak, Puron ibaiko arroila, Saldropoko hezegunea edo are Oriol, Txulato edo Montenegro mendiak bisita genitzake. Eta uda tontor garaienetara igotzeko baliatu nahi badugu, egunak luzeagoak eta argia indartsuagoa dela probestuz, liburuak zerrenda ederra dakar aldean, hala klasikoak (Toloño, Orhi, Artzanburu, Lakhura) nola bakartiagoak (Imeleku, Unamendi, Bachicabo, Elimendi).

Egilea, Txusma Perez Azaceta, Euskal Herria osoa goitik behera eta hegotik iparrera ibilita dago. Euskal mendiei buruzko liburu andana argitaratu du eta horietako batzuk, honez gero, klasiko hutsak dira.

Lerroon azpiko estekan, liburuaren aurkibidea, sarrera eta ibilbide bat utzi dizuegu, dastaketa egin nahi baduzue. Ondo ibili!

EH40_sareak