“Rutas para observar animales”, naturara itzultzeko gonbita

EH36_ANIMALES Observacion(cubierta).indd

Euskal Herria bildumak argitalpen paregabeaz esango dio agur 2019. urteari. “Rutas para observar animales” liburuak gure geografian barrena ibiltzeko 30 txango proposatzen ditu, animaliak bizi diren lekuak ezagutzeko eta, zortea lagun, beraiek ikusteko itxaropenaz. Egileak Juan Carlos Muñoz biologo eta argazkilaria eta Mar Ramirez natura-gidaria dira.

Ibilbideak Euskal Herri osoan zehar barreiatzen dira, ekosistema sorta joria osatu arte. Hasi Bizkaiko Golkoko uretan eta segi Pirinioetako goi gailurretaraino edo Bardeetako basamorturaino. Horietan gordetzen baitira, besteak beste, gure kostaldera hurreratzen diren zetazeo handiak, marruka aritzen diren oreinak, basoetan gordetzen diren tximeletak edo bortuetatik igarotzen diren milaka hegaztiak.

Lakuak, oihanak, mortuak, subalpetar paisaiak, zingirak, labarrak eta ibaiak dira bisitatzeko gonbita luzatzen diguten ekosistemetako batzuk, beti ere tentuz, isil-isilik, begirunez eta kalterik eragin barik ibiltzeko konpromisoarekin. Horrela jokatu ezkero, beharbada, gure natur eremuetako espezie batzuekin egingo dugu topo.

Testuak Mar Ramírez natura-gidari adituari zor zaizkio. Argazkiak, berriz, Juan Carlos Muñoz sarritan sarituari. Hala testuek nola irudiek fauna basatiaz gozatzeko atea irekiko digute eta, horrekin batera, gure natura ahal denik eta ondoen gordetzea beharrizan larria dela ohartuko gara.

This slideshow requires JavaScript.

Euskal Herriko ugaztunen gidaliburua argitaratu du Suak

MAMIFEROS_azaltxiki

Ugaztunekin lotura berezia daukagu. Orkatzaren marruak, izurdearen jauziak edo bidean azaldu zaizkigun otso lorratzak nahikoa izaten dira gure bihotzean zirrara eragiteko, beste edozein animaliak lortuko ez lukeen heinean. Eta, hala ere, ugaztun multzo handiak zeharo ezezagunak dira guretzat, batez ere espezie gehien biltzen dituztenak, karraskariak eta saguzaharrak kasu.

Euskal Herriko ugaztunen gidaliburu honetan Euskal Herriko basafaunako 99 ugaztun espezie batu ditugu, hala lehorrekoak nola itsasokoak. Liburua erabilgarria izateko jaio da. Eskuetan hartzen duenak espezie guztien fitxa multzo bikaina ez ezik, animalia bakoitza identifikatzeko gako sorta ere edukiko du aukeran, hasi oinarrizko jakintzetatik eta buka ikuspegi zientifikoagoan, kaskezurretako ezaugarri bereizleak espezieka jarrita. Gidaliburu honek irakurlea harrituko du ez baita orain arte gurean antzeko lanik argitaratu, eta batez ere erabilgarria izatea dauka helburu.

Testuak, ilustrazioak eta eskemak Jonathan Rubinesek egin ditu. Landa-azterketetan eskarmentu handiko biologoa izateaz gain, jakintza zientifikoa gizarteratzen ere aritu da. Landa-laneko eskarmentu horri esker sortu da gidaliburu honen edukia, espezieak identifikatzeko arazoak gainditzeko eratuta eta faunako atal harrigarri honekiko interesa eta jakin-mina asetzeko eta areagotzeko pentsatuta.

Aurretik ere argitaratuta dago Rubines Sua Edizioak-ekin. Izan ere, Euskal Herria liburuak bilduman plazaratu zuen “Guía de huellas, señales y rastros animales” gidaliburua.

Liburu hau  Guías Natura ataleko laugarren titulua da. Euskal Herriko natura ezagutzera eman nahi duen sail horretan bertan ondoko gidaliburu hauek ere plazaratu dira: “Guía de aves de Euskal Herria”, “Guía de árboles de Euskal Herria” eta “Guía de flores de Euskal Herria”.

 

This slideshow requires JavaScript.