Udan, mendia eta hondartza

Posted on 16/07/2014 by Euskal Herria bilduma

Argazkia: Txusma Perez Azaceta.

Garai egokia da, zinez, udakoa, mendizaleak kostaldera hurreratzeko. Tontor apalak izaten dira itsasbazterrean daudenak, altuera xumekoak. Baina, ordainean, ikuspegi ederrak eskaintzen dituzte, talaia bikainak izan baitira mendeetan itsasoko zerumuga zelatatzeko. Eta, gainera, aukera ematen dute hondartzan, portu ondoan edo kala bakartiren batean txonbo egiteko.

Mendi asko izan daitezke horrelako goizpasa egiteko egoki-egokiak. Serantes Santurtzin, Ermua Gorlizen, Katillotxu Mundakan, Ogoño Elantxoben, Otoio Lekeition, Deba eta Zumaia arteko eremuak, Mollarri Zarautzen, Mendizorrotz Orion, Igeldo eta Ulia Donostian, Jaizkibel Pasaia eta Hondarribia artean… Lapurdin ez dago halako talaia garbirik, baina Itsasertzeko Xendrak aukera paregabea ematen du era horretako planak egiteko.

Esaten dugunaren lekuko, goiko argazkia, lehenengo igandean Zarauzko Mollarrin hartutako irudi bitxia: mendizaleak eta surfzaleak ilaran, mendian behera, Zarauzko hondartza helburu. Eta urrutian, Getariako San Anton, zelatari.

Itsasondoan ibiltzea laket zaienentzat argitaratu zuen Sua Edizioak-ek ‘Trekking de la Costa Vasca’ gidaliburu bikaina. Ander Izagirreren testuez eta Alberto Muroren argazkiez, Baionan hasi eta Cobaron (Muskiz) aldean amaitu, euskal kostaldea tipi-tapa urratzeko gonbitea dakar, hamahiru etapatan.

‘Vías Verdes’, Euskal Herria oinez eta bizikletaz gozatzeko liburua

Posted on 23/06/2014 by Euskal Herria bilduma

Antzina, lokomotora herdoilduak gure txoko malkartsuetan barrena ibiltzen ziren, txistu eta marru. Ausart haiek edonora iristen ziren, izan Irunberriko Arroila, Leitzaran ibarra, edo Durangaldeko gailurrak. Gaur gomuta besterik ez dira, baina haiek urratutako bideetatik txirrindulariak eta oinezkoak ibiltzen dira, leku zoragarrietatik paseo ederrean.

Euskal Herriko bide berde guztiak (bide berde esaten zaie bizikletaz ibiltzeko atondutako trenbide zaharrei) bildu ditu Euskal Herria liburuak bildumako hirugarren aleak. ‘Vías Verdes, bidegorris y caminos naturales’ du izena eta Alberto Muro idazle eta argazkilariak egin du. Bide berdeak ez ezik, gorriak ere batu ditu, bidegorririk xarmagarrienak aukeratu eta erantsi baitizkio liburuari. Bizikleta maite duten guztiek badute leku zoragarri andana batean ibiltzea naturaren erdian, modu seguruan eta malda pikorik igo beharrik gabe. Horietako gehienetatik, oinez ere joan daiteke, tipi-tapa, gozo-gozo.

Orotara, liburuak 39 bide berde eta bidegorri bildu ditu, Euskal Herri osoan barrena: Araba, Bizkaia, Gipuzkoa, Lapurdi eta Nafarroa. Hasi klasikoekin, Plazaola edo Tarazonica kasu, eta buka Aturri ibaiko ertzetik, Zadorrako urtegiak inguratzen edo Urdaibain barrena. Xehetasun handiko testuak, argazkiak eta ibilbideetako mapak dira pedalari eraginez Euskal Herria ezagutzeko gonbite honen osagaiak. Ezingo duzu ezetz esan!

Ekialdeko Pirinioetako lakuak, urak zeruetatik dingilizka

Posted on 22/06/2014 by Euskal Herria bilduma

Erantzun

Mendira igotzeak ahalegina eskatzen du beti, baina hamaika ordain gozo ematen du trukean: bidea, lagun artea eta, gehienetan, esker oneko gailurra. Askotan ikuspegiak izaten dira tontorrak gorde duen saria, baina batzuetan sorgindutako parajeak aurkituko ditugu. Esate baterako, ur ilunetako lakuak haitz harroen artean barreiaturik, zipriztinak balira bezala, inguruan, zelatari, izei bakanak dituztela.

Horietakoak anitz daude Kataluniako Pirinioetan. Goi mendi eremu batzuetan harrigarria da aintzira kopurua. Sua Edizioak argitaletxeak ‘Las mejores ascensiones a los lagos más bellos del Pirineo Oriental’ kaleratu berri du. Yvette Delgado Pererak idatzi du. Hogeita bat ibilbide marraztu ditu goi mendietako 70 laku sorgindu mirestera joateko.

Aukera polita da Katalunia bisitatzeko eta bertako mendi lakurik ederrenak bertatik bertara ikusteko. Horietako batzuek andanaka hartzen dituzte bisitariak, hain dira ezagunak. Beste batzuk, ostera, bakartiak dira, baina lehenengoak bezain liluragarriak.