Suak Ignaziotar Bidearen gidaliburua kaleratu du

CUBIERTA ignaciano.indd

Orotara 600 kilometrotik gora eta 27 etapa bete behar dira Loiolako santutegitik Manresaraino joateko. Leku bi horiek San Ignazioren bizitzan eragin handia eduki zuten eta orain ibilbide seinaleztatu batek lotzen ditu. Sua Edizioak-ek “Guía del Camino Ignaciano” argitaratu berri du, Loiolako Enekok duela ia 500 urte egin zuen bidaia egin nahi dutenentzat ezinbestekoa.

Ignaziotar Bidea 2012an sortu zuten santuak 1522an urratu zituen 650 kilometroak zedarritzeko. Orduko hartan Loiolako haren etxetik atera eta, krisi pertsonal sakonean zegoela, Montserrateko santutegiraino joan zen. Handik Manresa ondoko haitzulo batera aldatu zen. Bere azken helburua Jerusalen zen eta, geldialdiak geldialdi, azkenean hara ere iritsi zen, Bartzelonan ontziratu ostean. Bidaia hartan lehengo gerlaria fededun bihurtu zen: Loiolako Enekok zaldun jantziak erantzi eta arlote baten gisa bizi izan zen Manresako kobazuloan, haren bizitzaz eta erlijioaz gogoeta egiten zuen bitartean.

Gaur Loiola eta Manresa bitarteko bidea egin dezakegu gezi laranjei kasu eginez. Ibar berde euritsuetan barrena ibiliko gara, Errioxako mahastien ondotik, Erriberako olibadietatik, Kataluniako Bagéseko goi ordekatik eta Monegroseko basamortu bakartitik. Aizkorri, Entzia edo Kodeseko mendietako magaletatik gora eta behera aurrera egin ondoren katedral ederrak ikusiko ditugu (Tutera, Zaragoza…) Montserrateko santutegi mitikora heldu aurretik.

Gidaliburu hau hiru kazetari adituen lanaren emaitza da: Sergi Ramis, César Barba eta Daniel Burgui. Liburuak etapa guztien deskribapena dakar eta ibilbideko mugarririk garrantzitsuenak non dauden zehaztu ditu. Gainera, argazkiak, mapak eta bidean azalduko zaigun natura, historia eta kultura arloetako ondarearen gaineko jakingarriak bildu ditu.

This slideshow requires JavaScript.

Catalunya bilduma kaleratu du Suak

CT BOSCOSinternet

Liburu bilduma berria kaleratu berri du Suak: Catalunya. Izenak berak ezagutzera ematen duenez, Kataluniako mendia, aisialdia, natura eta kultura jorratuko ditu. Aurton, 2016an alegia, hiru liburu plazaratuko dira bilduma horren baitan.

Lehenengo biak liburudendetan daude dagoeneko. Alde batetik, Guía de vies verdes i camins naturals, bide berdeen eta natur bideen gidaliburua, Sergi Ramisek idatzi du. Gidaliburu horretan Kataluniako 39 bide berde jaso eta azaldu ditu.

Bigarrenak, ostera, oihanak jorratu ditu: Rutes pels boscos més bells. Egileak, César Barbak alegia, Kataluniako 45 baso eder aukeratu ditu. Ibilbide zoragarriak marraztu ditu gaztainadi, artadi, pagadi, izeidi, pinudi eta haltzadi abartsuen abaroan.

Bildumak segida edukiko du datozen hilabeteetan. Izan ere, urtea amaitu orduko “Pobles amb encant i excursions pels voltants” argitaratuko da. Sergi Ramisen eskutik Kataluniako herririk ederrenak ezagutuko ditu irakurleak.

CT BOSCOS LIBRO ABIERTOok

Ekialdeko Pirinioetako lakuak, urak zeruetatik dingilizka

portadaLAGOS.inddMendira igotzeak ahalegina eskatzen du beti, baina hamaika ordain gozo ematen du trukean: bidea, lagun artea eta, gehienetan, esker oneko gailurra. Askotan ikuspegiak izaten dira tontorrak gorde duen saria, baina batzuetan sorgindutako parajeak aurkituko ditugu. Esate baterako, ur ilunetako lakuak haitz harroen artean barreiaturik, zipriztinak balira bezala, inguruan, zelatari, izei bakanak dituztela.

Horietakoak anitz daude Kataluniako Pirinioetan. Goi mendi eremu batzuetan harrigarria da aintzira kopurua. Sua Edizioak argitaletxeak ‘Las mejores ascensiones a los lagos más bellos del Pirineo Oriental’ kaleratu berri du. Yvette Delgado Pererak idatzi du. Hogeita bat ibilbide marraztu ditu goi mendietako 70 laku sorgindu mirestera joateko.

Aukera polita da Katalunia bisitatzeko eta bertako mendi lakurik ederrenak bertatik bertara ikusteko. Horietako batzuek andanaka hartzen dituzte bisitariak, hain dira ezagunak. Beste batzuk, ostera, bakartiak dira, baina lehenengoak bezain liluragarriak.