‘La Alta Ruta Pirenaica’ ebookean eta mugikorretarako mapak plazaratu ditu Suak

Posted on 07/10/2014 by Euskal Herria bilduma

Pirinioetako goialdeak lotzen dituen zeharkaldia da ‘La Alta Ruta Pirenaica’ liburuko protagonista. Itzal handiko liburu horren edizio digitala eskuragarri jarri du Suak. Editorialaren web gunean aurkituko duzue, baita Elkarren, estatu espainoleko liburudenda digitaletan, iBooks, Amazon eta beste askotan ere. Laster Google Booksetan ere.

Norberaren interesaren edo gustuaren arabera argitalpen hori eReader bidez irakur daiteke (DRM Adobe euskarriaz), tabletean (Android nahiz Ipad), mugikorrean (Android eta Iphone) eta, jakina, mota guztietako ordenagailuetan (Mac eta Windows).

Teknologia berriekin lotuta, badugu albiste gehiagorik. Urteak dira Sua argitaletxearen kartografia era digitalean dagoela, CompeGPS atari entzutetsuan eskuragarri, eta orain badago modua jaisteko GPS TwoNav-era ez ezik, mugikorrera, tabletera eta gainerako euskarrietara. Bertan aurkituko dituzu Pirinioetako eta Euskal Herriko mapak, 1:25.000 eta 1:15.000 eskaletakoak.

Hegaztiak ikusteko arorik ederrena, ate joka

Posted on 12/09/2014 by Euskal Herria bilduma

Erantzun

Hegaztiak ikusten Plaiaundi aldean (Txingudi, Irun). Argazkia: Sua Artxiboa.

Lehengo astean joan ziren enarak Ibarrangeluko baserriko etartetik, beste leku askotatik bezala. Agur esan barik joan ziren, uda gurean eman ostean, Afrika helmuga. Agur esan gabe baina datorren urtean atzera etortzeko asmo irmoaz. Lehengo astean joan ziren, halaber, Urdaibaiko paduretako arrano arrantzale gazteak, Afrikarako haien lehenengo hegaldia egitera. Joan-etorrikoa izan dadila!

Enarak badoaz, uda hondarretan dagoen seinale. Udazkenean hegazti-saldo itzelak gehiago batuko dira, hala bortu eta harrateetan nola padura eta hezeguneetan, migrazioan doazela. Aro egokia da kostaldetik sartzen direnak ikusteko (Jaizkibel, Matxitxakoko itsasargi zaharreko behatoki zabaldu berria…), zein mendate altuetatik haien zain egoteko (Lindus, Organbidexka…). Sasoi polita da, halaber, itsasbazterreko paduretan babesten diren ehunka aleak zertan diren ikustera joateko (Urdaibai Bird Center, Txingudiko Plaiaundi, Aturriko eta Urdazuriko zingirak…). Eta, ezin ahaztu, barrualdeko hezeguneetan milaka hegazti batuko dira ikuskizun zoragarriak eskainiz, adibidez, Pitillas eta Vianako Las Cañas aintziretan, Salburuan (Ataria begiralekua), Guardiakoetan edo Urrrunaga zein Uribarri-Ganboako urtegietan.

Eta hegaztiak ikustera joanez gero, lagungarria izango zaigu Euskal Herriko hegaztien gidaliburu bikaina. Bertako testuei eta Calros Silvarren marrazki ikusgarrien bidez erraza izango da paraje eder horietako hegaztiak zeintzuk diren zehaztea.

Euskal Herriko Donejakue bideak, tentazio hutsa

Posted on 28/07/2014 by Euskal Herria bilduma

Erantzun

Euskal Herria Liburuak bildumako azal berria.

Abuztuko bigarren astean kaleratuko da ‘Todos los Caminos de Santiago que cruzan Euskal Herria’ (Euskal Herriko Donejakue bide guztiak). Ander Izagirre kazetari eta bidaiari adituak idatzi du. Gidaliburua Euskal Herria bildumako laugarren zenbakia izango da.

Izenburutik bertatik iragartzen duen bezala, Euskal Herria korritzen duten Donejakue bide guztiak batu ditu liburu berri horrek, hasi bide nagusitik (frantses bidea edo Nafarroako bidea esaten zaiona) eta segi itsasbazterreko bidetik (Camino del Norte edo Kostaldeko bidea, Baiona-Cobarón), Gipuzkoa eta Arabatik doana (Barnealdeko Bidea, Irun-Haro), Baztangoa (Baiona-Iruñea) eta Aragoikoa (Jakatik Gareseraino doa bertan Nafarroakoarekin bat egiteko). Barnealdeko Bidearen aldaerak ere jaso ditu gidaliburuak.

Ibibide bakoitza etapatan banatuta azalduko ditu gidaliburuak. Atal bakoitzean deskribapen zehatza (hala ibilbidea nola aurrera egin ahala azalduko zaizkigun harribitxiak), mapa, argazkiak eta gida praktikoa aurkituko du irakurleak. Eta hori guztia Ander Izagirrek ohi duen idazkera atsegin eta erakargarriaz. Donostiarra kazetari, idazle eta bidaiari petoa dugu eta hori igarri egiten da. ‘Todos los Caminos de Santiago que cruzan Euskal Herria’, gidaliburua eta… tentazio hutsa.