Euskal Herria bildumako liburu berriko azal ikusgarriak ozen dio ezin dugula ezetzik eman. Parque natural de Armañón y Karrantza liburuak gure parke naturalik ezezagunera eta inguruetako mendietara joateko gonbitea dakar, eta, esan legez, ezingo diogu muzin egin. Are gutxiago, gonbidapena Mar Ramírez gidari eta komunikatzaile adituaren eta Juan Carlos Muñoz argazkilari bikainaren eskutik datorrela ikustean.

Egileok hogeita bi ibilbide eta mendi-igoera aukeratu dituzte eremu horretako zokondorik ederrenetako batzuk gure esku jartzeko. Karrantza eta Turtzioz artean zabaltzen den parke naturalaren esparruan, Raneroko haitzetako karst ikusgarritik (Pozalaguako kobazulo ezaguna haren bihotzean gorderik dago) Los Jorrios mendiko tontor zuriraino altxor ugari ditugu zain, halanola, Sopeñako artadia edo Remendongo hariztia, Bizkaiko hariztirik zabalena.

Gainerako ibilbideak Karrantzan barrena murgilduko dira pagadi, ur-jauzi, haitz segail eta itzal handiko gailurretarako bidean. Besteak beste, Zalama mendira (1.343 m) eramango gaituzte, alegia, Enkarterri eskualdeko tontorrik garaienera.

Mendia, natura, historia eta aisialdia bat eginda daude Armañon eta Karrantzan Euskal Herriko mendebaldeko muturrerako bisita ezinbestekoa izan dadin. Ondo ibili!