“Cumbres anejas”, hurrengo urratsa non eman

Posted on 18/09/2020 by Euskal Herria bilduma

Euskal Herria bildumako “Cumbres anejas” liburuak aukera sorta zabaltzea du helburu. Euskal Herritik hurrean dauden mendi ederrak aukeratu eta jorratu dituzte Javi Urrutia eta Rafa Bartolomé mendizale adituek. Gailur harro, bitxi eta erakargarriak dira, Kantabria, Burgos, Errioxa, Soria, Huesca eta Bearno eskualdeetako mugazain prestuak. Han daude, guk harainoko urratsa noiz emango.

Tentagarria da liburu hau mendizalearentzat. Bertan aurkituko ditu Castro Valnera bezalako klasikoak, Kantabria eta Burgos arteko mugan, Zalama zelatatzen; edo Burgosko Tobalina ibarraren buru dagoen Umión lerdena, eta Ebro gainean erraldoi ageri den Moncayo harroa, euskalduntzat jo ohi dugun Auñamendi mitikoa… Orotara 57 mendi igoera proposatu dituzte eta lerroon azpian utzi dugun estekan sakatuta gailur horien zerrenda osoa deskarga daiteke. Aurkibidearekin batera, ibilbide bi paratu ditugu, tentazioan sartu nahi duzuenentzat. Ondo ibili!

anejas_cumbres_eh39_80-85 Deskargatu

“53 rutas por senderos PR” liburuak Bizkaia ezezagunean barrena garamatza

Posted on 16/09/2020 by Euskal Herria bilduma

Erantzun

Ekarpen asko dakartza aldean “53 rutas por senderos PR de Bizkaia” liburuak. Ricardo Hernanik egindako lan horrek, ostera, badu oharkabean igaro litekeen bertute aipagarri bat: ibilbideetako asko Bizkaiko geografiaren bazter ezezagunetan murgiltzen dira, haien edertasuna gure esku jarriz.

Nahikoa da liburuko aurkibideari erreparatzea ikusteko mendizaleek gutxitan bisitatzen dituzten eremu asko ageri direla. Horra hor, esate baterako, Zeberio ibarra, edo Arrigorriagako ibilbide biak, edo Alonsotegi eta Sodupe inguruetan dabiltzan ibilbideak… Eta zer esan Otxandio inguruko baso sarrietatik tipi-tapa ibiltzeko proposamen kitzikagarriez edo Ea aldeko kresal usainez mela-mela eginda ibiltzeko planez? Itzelak direla, jakina.

Natur eremu ospetsuetan barrena dabilenean ere, liburuak ibilbide ezohikoak proposatzen ditu, hala nola Gautegiz Arteaga eta Muxikako txangoak Urdaibai aldean, edo Legarmendiko zeharkaldi bikaina Urkiolako parke naturalean.

Ibilbideotan, beraz, Bizkaiaren beste aurpegi bat ezagutuko dugu, gutxitan ageri dena baina sorpresaz eta edertasunaz mukuru beteta. Lerroon azpian, liburuaren ibilbideen aurkibidea utzi dugu, pdf formatuan. Ondo ibili!

prs-bizkaia6-7-1 Deskargatu

“Rutas circulares fáciles”, Euskal Herriko mendiak ezagutzeko gonbita

Posted on 07/08/2020 by Euskal Herria bilduma

Erantzun

EH40_Rutas_circulares_fáciles

Udari etekina atera nahi dionak Euskal Herria Liburuak bildumako ale berrian aurkituko du nondik nora jo. Txusma Perez Azaceta mendizale adituaren eskutik “Rutas circulares fáciles” liburua dator, zeinak 45 ibilbide zirkular bildu dituen, denak zailtasun teknikorik edo bestelako eragozpenik gabekoak eta, jakina, denak Euskal Herrian barrena.

Izan ere, txango eta igoera hauek Euskal Herriko mendien, ibarren, oihanen eta haitzarteen bila abiatzen dira. Basoetan ibili nahi duenak Soila, Itxina, Artikutza edo Bertizko ibilbideak aukera ditzake. Itsasoaren kresal usainaz biziberritu gura duenak, berriz, kostaldeko talaia ederrak dauzka esku-eskura: Ogoño, Ermua (Gorliz), Pagoeta edo Mitxitxola (Jaizkibel). Zelai eta muinoak kateatu nahi izan ezkero, Harana ibarra, Lokizko ordekak, Puron ibaiko arroila, Saldropoko hezegunea edo are Oriol, Txulato edo Montenegro mendiak bisita genitzake. Eta uda tontor garaienetara igotzeko baliatu nahi badugu, egunak luzeagoak eta argia indartsuagoa dela probestuz, liburuak zerrenda ederra dakar aldean, hala klasikoak (Toloño, Orhi, Artzanburu, Lakhura) nola bakartiagoak (Imeleku, Unamendi, Bachicabo, Elimendi).

Egilea, Txusma Perez Azaceta, Euskal Herria osoa goitik behera eta hegotik iparrera ibilita dago. Euskal mendiei buruzko liburu andana argitaratu du eta horietako batzuk, honez gero, klasiko hutsak dira.

Lerroon azpiko estekan, liburuaren aurkibidea, sarrera eta ibilbide bat utzi dizuegu, dastaketa egin nahi baduzue. Ondo ibili!

EH40_sareak