Atzera dago salgai “40 rutas senderistas por las Merindades de Burgos” liburua

Egunotan itzuli da liburu-dendetara “40 rutas senderistas por las Merindades”, Burgosko iparraldeko eskualde zoragarri horretako ibilbide balizatuak biltzen dituen gida. Pablo Moralesen testu eta argazkiez osatuta, 2017an argitaratu zen eta azken hilabeteotan agortuta zegoen. Orain bigarren edizioa kaleratu da.

Burgosko Merindades bailara historikoa Bizkaia bezain handia da hedaduraz baina oso populazio txikia dauka. Mendebaldean, Kantabriako mugan, Alfoz de Santa Gadea dago eta bertatik Bizkaia eta Arabaraino dator, Mena, Losa eta Tobalina ibarrak Gaubea, Aiara eta Enkarterrien auzoak dira eta. Ebro ibaiak erditik ebakitzen du eta eskualdean zazpi eremu natural eder eta eskutada bat monumentu-multzo ikusgarri gorde ditu. Ojo Guareñan hasi eta Puentedey ederreraino, Ebroko haitzartea, Erdi Arotik atera berria dirudien Frías harrigarria, Montes Obarenes-San Zadornil parke naturala, ur-jauzi liluragarriak eta pagadi amaigabeak kateatzen dira 40 ibilbide aukeratu hauetan.

Lekuon ederra izan da liburuaren arrakastaren gakoetako bat. Bestea, ibilbideon ezaugarriak, xendazaletasunaren atalean sartzen baitira txango hauek. Alegia, aldatsak ez dira handiak eta ibilbideak ez dira inoiz lau ordutik gorago joaten. Gainera, beti ibiliko gara bide seinaleztatuetan barrena, gehien-gehienetan Ibilbide Laburretan (PR) eta gainerakoetan Ibilbide Luzeetako (GR) zati batzuetan.

Kalean da “53 rutas por senderos PR de Bizkaia” liburuaren bigarren edizioa

Zazpi hilabete nahikoa izan dira “53 rutas por senderos PR de Bizkaia” liburuaren lehenengo edizioa agortzeko. Maiatzaren azken egunetan heldu zen liburu-dendetara PR bideetako gidaliburu eder hau eta dagoeneko klasiko bihurtzeko bidean dago. Egunotan jarri da salgai bigarren edizioa.

Ricardo Hernani mendizale ezagunak idatzi du liburua. Orotara 230 orrialde dauzka eta bertan Bizkaiko PR bide homologatu guztiak batu ditu. Harrigarria bada ere, horietako asko ez dira mendizaleek normalean aukeratzen dituzten inguruetakoak eta, izatekotan ere, natur eremu ezaugarrietako alderdi ezezagunetatik zabaltzen dira.

Liburu honetako ezaugarri nagusia aniztasuna da. Gustu guztiak ase uzteko moduko ibilbide sorta dakar: itsas ondoko lapatzak, zingirak eta talaiak, bertoko basoak, ibaiak eta ur-jauziak, ermitak eta baserriak, zubi eta galtzada zaharrak eta, jakina, tontor lerdenak. Askotan, paraje bakartiak izango dira; beti, ederrak.

“53 rutas por senderos PR” liburuak Bizkaia ezezagunean barrena garamatza

Ekarpen asko dakartza aldean “53 rutas por senderos PR de Bizkaia” liburuak. Ricardo Hernanik egindako lan horrek, ostera, badu oharkabean igaro litekeen bertute aipagarri bat: ibilbideetako asko Bizkaiko geografiaren bazter ezezagunetan murgiltzen dira, haien edertasuna gure esku jarriz.

Nahikoa da liburuko aurkibideari erreparatzea ikusteko mendizaleek gutxitan bisitatzen dituzten eremu asko ageri direla. Horra hor, esate baterako, Zeberio ibarra, edo Arrigorriagako ibilbide biak, edo Alonsotegi eta Sodupe inguruetan dabiltzan ibilbideak… Eta zer esan Otxandio inguruko baso sarrietatik tipi-tapa ibiltzeko proposamen kitzikagarriez edo Ea aldeko kresal usainez mela-mela eginda ibiltzeko planez? Itzelak direla, jakina.

Natur eremu ospetsuetan barrena dabilenean ere, liburuak ibilbide ezohikoak proposatzen ditu, hala nola Gautegiz Arteaga eta Muxikako txangoak Urdaibai aldean, edo Legarmendiko zeharkaldi bikaina Urkiolako parke naturalean.

Ibilbideotan, beraz, Bizkaiaren beste aurpegi bat ezagutuko dugu, gutxitan ageri dena baina sorpresaz eta edertasunaz mukuru beteta. Lerroon azpian, liburuaren ibilbideen aurkibidea utzi dugu, pdf formatuan. Ondo ibili!