Gipuzkoan barrena, 80 ibilbide eder

cubierta SendeGIP.indd

Itsasoaren eta mendiaren arteko besarkadatik sortu da Gipuzkoako paisaia paregabea. Uretara amiltzen diren mendiak, kosta zelatatzeko talaiarena egiten duten muino apalak, barrualdeko ibarretako ermita batzuei darien itsas zaporea, ontzigintza elikatu duten oihanak… “80 rutas senderistas por Gipuzkoa” irakurtzen duenak, gidaritzat hartzen duenak, itsas haizearen laztana sentituko du aurpegian, kresal usainaz oxigenatuko da, olatuen marmarraz lasaituko da eta, nola ez, Bizkaiko Golkoa bere gorenean ikusiko du.

Hori gutxi balitz, mendi altuetara ere igoko da, urtegietako ertzetatik ibiliko da, kondairatik datozen pagadietan barrena murgilduko da eta sakanetatik gora joango da, horiek ere Gipuzkoako geografiak gordetzen diren altxorrak direlako. Eta bada gehiagorik: hirian barrenako ibilbideak, natura-parkeak, padurak, meatzeak…

Liburu honek 80 proposamen batu ditu. Goiz pasa ederra izan daitezke, ia denak umeekin egiteko modukoak, gehienak aldats gogorrik gabekoak. Askotan bide seinaleztatuetatik igarotzen dira. Edonork egiteko moduko xendazaletasuna, beraz.

Ibilbide horietatik gehien-gehienak Sua Edizioak-ek azken urteotan argitaratutako liburu eta aldizkarietan agertu dira. Denak errebisatu eta eguneratu dira. Ibilbideak aldean dakartza deskribapena, fitxa teknikoa eta mapa, baita argazkiak ere. Liburuko kontrazaleko barrualdean txango guztiak ageri dira, Gipuzkoako mapan egoki jarrita.

This slideshow requires JavaScript.

Suak Asturiaseko 31 ibilbide argitaratu ditu xendazaleentzat

cubierta SEND_AS.indd

Liburu-dendetan dago “31 rutas senderistas por Asturias”, Sonia Romok eta Manuel Blancok elkarlanean osatutako liburua. Asturiaseko geografia xarmagarriko eremu babestuetan barrena xendazaleentzako ibilbide gogoangarriak aukeratu dituzte.

Liburuko orrialdeetan Picos de Europako parke nazionala, Somiedo, Ponga edo Fuentes de Narcea natura-parkeak, Muniellos, Barayo edo Cueva de Caldas bezalako natura-erreserbak eta Río Eo, Oscos y Tierras de Burón biosferako erreserba ageri dira. Horiek gutxi balira, babestutako paisaiak sartu dituzte (10), baita natura-monumentuak ere (6).

Hortaz, liburuak Asturiaseko naturaren ondarearen alerik preziatuenak eskaintzen ditu. Ibilbideok egin nahi dituenak zain ditu ibaiak, haitzarteak, ur-jauziak haitzuloak, meandroak, trokak, itsaslabarrak eta mendi itzelak.

Egileak Manuel Blanco eta Sonia Romo dira. Biek ala biek, ondo baino hobeto ezagutzen dituzte Asturiaseko parajeok. Senderismo por Asturias enpresan dihardute lanean, natura, etnografia eta ondare artistikoa zein industriala ezagutzeko ibilbideak eskaintzen.

“Senderismo” bilduman, ondoko liburu hauek argitaratu ditu Suak orain arte: “57 rutas senderistas por Euskal Herria”, “40 rutas senderistas por las Merindades de Burgos” eta “100 rutas senderistas por Navarra”.

This slideshow requires JavaScript.

Burgosko iparraldeko altxorrak, denon eskura

cubierta_SEND_BUR.indd

Sua argitaletxeak 40 rutas senderistas por las Merindades de Burgos liburua kaleratu berri du. Bertan, Burgosko iparraldeko natura eta kultura arloko altxorrak ezagutzeko parada emango diguten ibilbide labur zoragarriak aurkituko ditugu. Bideok aukeratzea, deskribatzea eta argazki ederretan betikotzea eskualdea zehatz-mehatz ezagutzen duen Pablo Moreno Moralesek egin du.

Burgosko Merindades bailara historikoa Bizkaia bezain handia da zabaleraz baina oso populazio txikia dauka. Mendebaldean, Kantabriako mugan, Alfoz de Santa Gadea dago eta bertatik Bizkaia eta Arabaraino dator, Mena, Losa eta Tobalina ibarrak Gaubea, Aiara eta Enkarterrien auzoak dira eta. Ebro ibaiak erditik ebakitzendu eta eskualdean zazpi eremu natural eder eta eskutada bat monumentu-multzo ikusgarri gorde ditu. Ojo Guareñan hasi eta Puentedey ederreraino, Ebroko haitzartea, Erdi Arotik atera berria dirudien Frías harrigarria, Montes Obarenes-San Zadornil parke naturala, ur-jauzi liluragarriak eta pagadi amaigabeak kateatzen dira 40 ibilbide aukeratu hauetan.

Xendazaletasunaren atalean sartzen dira txango hauek. Alegia, aldatsak ez dira handiak eta ibilbideak ez dira inoiz lau ordutik gorago joaten. Gainera, beti ibiliko gara bide seinaleztatuetan barrena, gehien-gehienetan Ibilbide Laburretan (PR) eta gainerakoetan Ibilbide Luzeetako (GR) zati batzuetan.

This slideshow requires JavaScript.

Txango bakoitzarekin batera, ibilbidea zehatz-mehatz azaltzen duen testua, jakingarri teknikoak, inguruetan bisita bat egiteko proposamena, jakingarri interesgarri bat, ibilbidearen mapa eta argazki zoragarriak aurkeztu ditu liburuak. Alegia, eskualde harrigarri horrekin gozatzeko behar dugun guztia.

Pablo Morenok biziki maite ditu argazkilaritza eta natura. Arlo horietan lan batzuk plazaratu ditu. Hauxe da Sua Edizioak-ekin argitaratu duen lehenengo liburua.

SenderismoBurgos.indd