Inor ez da harrituko Alberto Muro eta Ane Otxoa de Alda, Guía de montes de Bizkaia liburuaren egileak alegia, mendian harrapatu ditugula jakitean. Hala izanda, ur-jauzi baten alboan gelditu eta mezu bat bidali digute, liburuaren berri emateko. Bizkaiko mendiak ezagutu, ibili eta zaindu nahi dituzten guztientzat, ezinbesteko liburua da hau. Hona hemen egileen mezua:
Bi urtean behin, Mendifilm jaialdiak eta Sua Edizioak-ek indarrak batzen dituzte euskal mendizaletasunaren gaineko komikia plazaratzeko. Aurtengoa hirugarrena da eta, zalantzarik gabe, zirrara eragingo du. Andres Espinosa. Bakarrik eta libre komikiak bere bizitza harrigarria islatu du. Aitzindaria izatea zer den erakutsiko digu!
Andres Espinosa Etxebarria (1903-1985) zornotzarrak balentria ikaragarriak egin zituen euskal mendizaletasuna abiatu berritan zegoenean. Euskal Herriko mendiak igo eta gero, atzerrira jo zuen abentura bila, baita aurkitu ere: Urriellu soka barik eskalatu zuen, Mulhacen, Veleta eta Teidera bakarrik igo zuen, Mont Blanc eta Cervino bakarrik eskalatu zituen lehenengoa izan zen, Afrika zeharkatu zuen Kilimanjaroko gailurrera heltzeko, Himalaiaraino joan zen bertako tontorren bila… 1936ko gerrak eten zion bidea, baina artean egindakoa edonor harri eta zur uzteko modukoa da.
Haren bizitza dakarren komikian Ramon Olasagastiri zor zaio testua. Ilustrazioak eta koloreak, berriz, César Llagunoren eta Felipe H. Navarroren eskutik etorri dira. Emaitza, zalantzarik gabe, bikaina da, Espinosak merezi zuen neurriko komiki ederra.
Aurretik beste komiki argitaratuta daude Sua Edizioak eta Mendifilm jaialdia elkarlanean. Lehenengoa, 2018an, Everest. Herri bat gailurrean izan zen. 2020an Iñurrategi anaiak. Mendiari bihotz emanak kaleratu zen. Zaletuek harrera ezin beroagoa eman zieten biei.
Hemen da aurtengo sorpresa, mendizaletasuna mahai-jolasen arlora heldu baita Bizkaia Mendiz Mendi jolasarekin. Familian olgetako pentsatuta dago eta, bide batez, ume-umetatik Bizkaiko mendien nondik norakoak ezagutzen hasteko.
Jolasaren helburua ehun mendien lehiaketako Bizkaiko 128 gailurrak igotzea da. Erronka betetzeko, aukera ekonomikoak eta gaitasun fisikoak uztartu behar ditugu. Biak behar bezala erabiltzea ezinbestekoa izango da partida jokatzeko.
Mendien puntuazioa zailtasunaren eta kokapenaren arabera banatu da; hortaz, garrantzitsua da helburuak aukeratzen jakitea, lortutako puntuen baturak ebatziko baitu irabazlea. Lagungarri izango zaizkigu laguntza-kartak, besteak beste deskontuak, aparteko puntuak eta hainbat bitarteko ematen dituztelako.
Natxo Agirrek diseinatutako jolas honek taula zabal bat, fitxak, kartak eta familia- edo lagun-giroan partida kitzikagarria egiteko jakingarriak dakartza. Ondo baino hobeto pasatuko dugu eta, gainera, txikitatik Bizkaiko mendien geografia ikasiko dugu. Bizkaia Mendiz Mendi euskaraz eta gaztelaniaz dator. Ondo pasa!
Euskal Herria liburuak 