Oso harrera beroa eman diote mendizaleek “Guía de montes de Gipuzkoa” liburuaren seigarren edizioari (Sua Edizioak, 2020ko maiatza). Arrakastaren gakoa, duda barik, egileek egindako lanean dago. Txusma Perez Azacetak eta Iñaki Alcaldek Gipuzkoako 155 menditara igotzen diren 95 ibilbide bildu dituzte.
Gauza jakina da gida honek Euskal Herriko mendi katalogoko tontor guztiak jaso dituela. Ibilbide bakoitzak mendibidearen nondik norako guztiak eskaintzen ditu, argazki, mapa eta jakingarriekin lagunduta.
Lerroon azpiko estekan pdfa utzi dugu. Bertan aurkituko dituzue liburuko aurkibidea, non igoera guztiak banan-bana ageri diren, eta, opari, Aralar aldeko hiru igoera. Ondo ibili!
Iñurrategi anaiak dira Sua Edizioak-ek eta Mendifilm Festivalek elkarlanean argitaratutako komiki berriaren protagonistak. Lehenengoa “Everest. Herri oso bat gailurrean” izan bazen, oraingoan “Iñurrategi anaiak. Bihotza mendiari emanak” lan kitzikagarriarekin datoz. Ramon Olasagastiren gidoiaz eta César Llagunoren marrazkiez osatu da anaia bien ibilbideen kontakizun zirraragarria.
Euskal mendizaletasunaren historian aparteko sokada izan da Felix eta Alberto Iñurrategik osatutakoa: soka sendo bat, egiteko modu bat, sokalagunekiko nahiz babesleekiko leialtasun bat, mendia bere hedadura osoan aintzat hartzen jakin duen begirada bat. Mendia ez baita gailurra soilik, mendia batez ere bidea da, eta mendirako bidean dauden herriak, eta herri horietan bizi den jendea…
Gasherbrum II, hamabigarren zortzimilakoa elkarrekin igo eta gero, beherakoan istripua izan eta hil egin zen Felix. “Bihar ere argituko du egunak”, esan ohi zuen Felixek sarri, adore premian zenari bihotz emateko, eta ausaz mendiari ez ezik bizitzari aurre egiteko modu horrek biziarazi zuen berriro pultsua. Mendiari bihotz emanak bizi izan ziren, bizi da oraindik ere Alberto, mendiak ematen zielako bihotz. Gerozko urteotan, Felix hil ondoren sortutako Baltistan Fundazioaren eskutik, altuera xumeagoan gailur zailagoak ere bilatu dituzte, Hushe ibarreko baltiarren bizimodua zertxobait duintzea, besteak beste.
Ez da esan beharrik 2020ak bizitza aldatu digula, goitik behera. Eta aldaketa bortitz horrek Durangoko Azoka ere jo du. Ez da presentziala izango, baina egin, egingo da, plaza birtuala izango da eta. Eta Euskal Herria Liburuak, Sua Edizioetako gainerako argitalpenekin batera, bertan egon da. Sakatu esteka honetan eta aurtengo gure nobedade guztiak aurkituko dituzu. Denetara 35 liburu azalduko dira, behean ageri den “gehiago ikusi”n klik egin ezkero.
Hor agertuko zaizkigu Euskal Herria bildumako 2020ko liburu guztiak (datorren astean kaleratuko den “Pueblos de Araba con encanto” izan ezik). Hor topatuko dugu El Mundo de los Pirineoseko egutegia, Durangoko Azokako klasiko bat. Eta hor azalduko dira Sua Edizioak-ek euskaraz eta erdaraz argitaratu dituen azken liburuak: Alex Txikonen “Mendi biluzia” eta Ramon Olasagasti eta Cesar Llagunoren artean ondu duten “Iñurrategi Anaiak. Mendiari bihotz emanak” komikia.
Eta, horiez gain, aurtengo gainerako nobedadeak eta irakurleek estimu handitan dauzkaten liburuetako batzuk ere aurkituko ditugu.
Gogoan eduki Azoka birtuala abenduaren 4 eta 8 bitartean egongo dela erosketetarako zabalik, baina dagoeneko liburuak erreserbatu daitezkeela.
