Lehenengo edizioa agortuta, laster da liburudendetan euskal mendien gidaliburua

Posted on 22/06/2014 by Euskal Herria bilduma

Sua Edizioak argitaletxeak berriz argitaratu du ‘Los mejores recorridos para conocer la montaña vasca’ liburua. Lankide dugun Jesus M. Perez Azacetaren lan hori agortuta zegoen. 2012ko Durangoko Azokan aurkeztu zuen eta denbora gutxian klasiko bilakatu da gailurrak zailtasunaren arabera aukeratu eta sailkatu zituelako eta mendian ibiltzeko oinarrizko eskuliburua erantsi ziolako.

Liburua bost ataletan dago banatuta. Lehenengoan, txangorik errazenak, edonork egiteko modukoak. Bosgarrenean, ostera, igoerarik gaitzenak. Eta tartean, mailaz igo ahala zailtasunak ere areagotzen dituzten irteerak. Maila bakoitzean Euskal Herri osoko proposamenak aukeratu zituen Perez Azacetak, hasi Baltzolako haitzuloan (1. maila) eta amaitu Ezkaurren edo Hiru Erregeen Mahaian (5. maila). Tartekoetan, Uzturre, Itzaga edo San Tirtso haitzak daude, besteak beste.

Denetara 60 txango dira. Horiekin batera, tartekaturik, mendian ibiltzeko oinarrizko eskuliburuko aholkuak eta mendizaleek sarritan erabiltzen dituzten berba teknikoen hiztegi laburra dakartza.

Done Jakue bideen posterra, behin eta berriz agortzen den harribitxia

Posted on 19/06/2014 by Euskal Herria bilduma

Erantzun

Egunotan inprimategira itzuli da Sua Edizioak argitaletxearen poster arrakastatsuenetako bat. Done Jakue Bideen Mapaz ari gara, Pabetik eta Jakatik Finisterraraino dagoen lur eremua mapa panoramiko handi batean bildu duena.

Lan txukun hori Miguel Angulo kartografoak egin zuen eta lehenengoz 2007an argitaratu zen. Plazaratu berritan publikoak besoak zabalik hartu zuen eta, harrez gero, horrela segitu du. Ondorioz, hamaika bider agortu ditu botaldiak. 2014ko ekain honetakoa, seguru gaude, ez da azken berrargiltapena izango.

Done Jakue Bideen Mapak hemeretzi ibilbide bildu ditu, frantses bide ospetsuarekin hasi eta lekuan lekuko aldaera txikiekin buka, Baiona eta Iruñea Baztan ibarretik lotzen dituena kasu. Gainera, ikur bidez jakinarazi du non dauden erromesentzako aterpetxeak, baita bideko monumenturik handienak nabarmendu ere.

San Juan Xar, hilaren 24rako hitzordu paregabea

Posted on 19/06/2014 by Euskal Herria bilduma

Erantzun

Anitz dira euskal geografian paregabetzat jo genitzakeen lekuak. Eta, hala ere, gutxi dira San Juan Xar bezain paregabeak. Igantzin dago, Bortzirietan (Nafarroa). Batetik, ibai ertzeko oihan sarria da, hamaika espeziez osatua: lizarrak, hurritzak, haritzak…. Baina denen gaindi, bakarra delako, xarma, gurean oso urria den espeziea eta natur errerba honetan Eusakl Herriko berezko baso bakarra duena: hiru hektarea.

Bestetik, zuhaiztiaren erraietan ura darion haitzuloa dago. Antzina-antzinatik egin izan dute gurtu, ur sendagarriak direlakoan. Harpe hori ermita gisa atondu eta San Juanen babesean jarri zuten. Horregatik, datorren asteartean, hilak 24, urtero bezala, eskualdeko jende askok San Juan Xar aldera joko du tradizioa betetzera: hiru txorretetako batetik ura edanez gero, sendatu egingo dira edo eskatutako mesedea erdietsi egingo dute. Erromeria giroan, gainera, behar den bezala.

Asteartean nahiz beste inoiz, San Juan Xarrera hurbildu nahi duzuenentzat, mezu honi atxikita jarri dugu bertarako txangoa, ‘Rutas por los bosques más bellos’ liburutik hartuta. Hori Euskal Herria Liburuak bildumako bigarren zenbakia dugu, apirilean argitaratua, eta Santi Yaniz adituak egin zuen. Ondo ibili!