“Parque natural y sierra de Aralar”, mendira joateko deia

Posted on 27/07/2020 by Euskal Herria bilduma

ARALAR_insta

Gipuzkoa eta Nafarroaren artean, Aralar mendilerroa Euskal Herriko gune natural pribilegiatuetako bat da. Antzinatik populatutako eremu malkartsu honek mendi ikonikoak, artzain-larreak, oihan zabalak, ur-jauzi eta iturburu magikoak, harkaitz harroak, ibar isilak eta itzal handiko santutegiak batzen ditu. Juanjo Garbizu mendizale adituaren “Parque natural y Sierra de Aralar” (Sua Edizioak, 2019) liburuak mendilerro osoa ezagutzeko eta gozatzeko igoerak, zeharkaldiak, txangoak eta ibilaldiak proposatzen ditu, bai Gipuzkoan (parke natural kategoriarekin babestuta dago), bai Nafarroan.

Lerro hauen azpiko estekan aurkibidea eta liburuak dituen hogeita hiru proposamenetako bi utziko ditugu: Pardarri Guardetxetik eta Larraone Amezketatik. Euskal Herrian mendiaz gozatzeko plan itzelak. Ondo ibili!

EH33_ARALAR-1

“Rutas singulares con hamaiketako”, mendia hain dago zerutik hurbil!

Posted on 24/07/2020 by Euskal Herria bilduma

Erantzun

hamaiketakos_insta

Gustuko zaletasuna eduki ezkero, mendizaletasuna esate baterako, zorionekoak gara. Zaletasun hori bide ondoko gastronomiaren plazer txiki baina paregabeekin neurrian bateratu ezkero, zerutik oso hurbil egongo gara. Hori da “Rutas singulares con hamaiketako” (Sua Edizioak, 2015) liburuak proposatzen diguna. Alberto Muroren testuek eta argazkiek 46 txango deskribatzen dituzte, mendi igoera ederrak guzti-gutiak, eta, gainera, guztietan hamaiketakoa non egin gomendatzen digute, dela aterpetxe, ostatu, benta edo taberna.

Naturaren erdian, beraz, igoera politari ekingo diogu, gailurrera heldu arte. Ondoren, tontorretik behera hasi eta berehala, edo bide erdian, edo beharbada abiapuntuan, zain edukiko ditugu arraultza frijituak eta txorizoa, edo agian ogi-mamiak, odolosteak edo beste edozein “zartagineko”. Horiek ahoan, konturatuko gara gailurretik jaitsi arren zerutik oso hurbil jarraitzen dugula.

Lerroon azpiko estekan, liburuko proposamenetarik bi utzi dizkizuegu, dastaketa egiteko. Ondo ibili eta on egin!

hamaiketakos

“Montes de Gipuzkoa”, herrialdeko 155 gailur liburu batean

Posted on 22/07/2020 by Euskal Herria bilduma

Erantzun

00-GM GIPUZKOA

Urteko gertakizun nabarmenetakoa izan da, duda barik, mendi liburuen atalean: “Montes de Gipuzkoa” gidaliburua berriro kaleratu du Sua Edizioak-ek, gaur egunean jarrita eta goitik behera errebisatuta. Seigarren edizioa da eta merezi zuen merezi liburu honek biziberritzea, hamarkada bitan Gipuzkoako mendizaleentzat ezinbesteko iparrorratza izan baita. Gainera, dozena bat urte igaro da aurreko edizioa kaleratu zenetik.

Jatorrizko liburua Iñaki Alcalde Olivaresi eta Txusma Perez Azacetari zor zaie. Oraingoan, azken hori mendi guztietara igo da berriro, ibilbideak gaur egun zertan diren bertatik bertara jakiteko eta igoera bide berri gutxi batzuk eransteko. Edizio berriak 95 igoera eta 155 gailur bildu ditu. Tartean dira Euskal Herriko Mendi Katalogoko Gipuzkoako tontor guztiak.

Lerroon azpiko estekan pdfa utzi dugu. Bertan aurkituko dituzue liburuko aurkibidea, non igoera guztiak banan-bana ageri diren, eta, opari, Leitzaran aldeko hiru igoera. Ondo ibili!

GM_GIPUZKOA_sareak2