Nafarroako Natur Mirariak, gozamen hutsa

Posted on 01/12/2016 by Euskal Herria bilduma

Sorginduko gaituen liburua da Nafarroako Natur Mirariak-Maravillas Naturales de Navarra, Sua Edizioak-ek egunotan argitaratu duen liburu elebidun zoragarria. Bertan bildu ditu, Santi Yanizen testuen eta argazkien bidez, Nafarroako natur ondareko alerik preziatuenak. Bardeetako lur elkorretatik hasi eta Biduze ibai emaritsuraino, eta Azueloko haitzetatik Larrako alpetar eremuraino.

Ozen eta argi esan du egileak berak liburuaren aitzinsolasean: Nafarroa paregabea da paisaia sorta itzelari esker. Kilometro gutxitan igarotzen da ordeka nabarretatik muino berdeetara eta bertatik zuriz janzten diren haitz garaietara. Libururako 34 paraje aukeratu dira, esaten dugunaren erakusgarri. Argazkiak ikusita zalantza guztiak uxatuko ditugu, leku guzti horien edertasuna barra-barra zabaltzen dute eta.

Liburuko orrialdeetan barrena Larraun bezalako ibai bihurriak agertuko zaizkigu, edo Aritzakun eta Urritzate bezalako ibar ahaztuak, Mueseko monolitoen gisako harrizko eskulturak… Eta, jakina, natur mirari ezagun guztiak: Iratiko oihana, Urederrako iturburua, Bertizko Jaurerria, Belagua eta Larra, Bardeetako basamortua, Arbaiungo Atea…

Argazkiekin batera eremu bakoitzeko arima zizelkatzen duten testuak idatzi ditu Santi Yanizek. Liburua ele bitan dator, euskaraz eta gaztelaniaz.

This slideshow requires JavaScript.

Euskal Herriko loreen gidaliburua, kalean

Posted on 04/11/2016 by Euskal Herria bilduma

Erantzun

flores_guiamtdotxiki Geografia txikia izan arren, Euskal Herriak ekosistema sorta oparoa daukanez, biologia aldetik ere eremu joria da. Europan ezagutzen diren lore eta landare espezieen %20 gure herrialdeetako bazterren batean hazten da.

“Guía de flores de Euskal Herria” gidaliburu honek ehun espezie botaniko jaso ditu, hala berezkoak nola kanpotik ekarritakoak. Identifikazioa errazteko asmoz, fitxa bakoitzak deskribapena dakar (ezaugarriak, bizilekuak, loratze aroa…) alboan lore bakoitzaren argazkia duela. Gainera, espezie bakoitzak herrian daukan hedadura mapan islatu du eta landareei eman ahal zaizkien erabilerak ere atal batean bildu.

Irudiak eta testuak Joana Garcíak osatu ditu. Elikaduran eta naturan aditua, mendizalea eta argazkilaria da Joana Garcia, baita naturopata ere. Suarekin beste liburu bat argitaratu du, 2016an, Antxon Burciorekin elkarlanean eginda: “Nutrición, seguridad y salud en la montaña”.

“Guía de flores de Euskal Herria” Natura gidaliburu bildumaren baitan kaleratu du Suak. Orain arte atal horretan beste gidaliburu bi plazaratu ditu: “Hegaztien gida” eta “Zuhaitzen gida”, biak Euskal Herrikoak.

This slideshow requires JavaScript.

Guía de huellas, naturan barrena ibiltzeko bidaide ezinhobea

Posted on 11/11/2015 by Euskal Herria bilduma

Erantzun

Euskal Herria bildumako liburu berriak zer esana emango du. Baita zer ikusi eta zer gozatu ere. “Guía de huellas, señales y rastros de animales” gidaliburu berria tresna ezibestekoa izango da natura maite dugunn guztiontzat, mendian barrena goazenean animalien ibilien lorratz eta aztarnak ezagutzen eta ulertzen irakatsiko digu eta.

Liburuak sei atal dauzka. Horietan animalien joan-etorrien arrastoak jorratu ditu, baita elikadurarenak (gorotzak, jan izanaren lorratzak…)eta bestelako kontuak ere: habiak eta gordelekuak, jokaeren zantzuak eta gorpuzkiak. Deskribapen zehatzak ez ezik, testuarekin batera ulermena eta alderaketak erraztuko dituzten argazki eta marrazki lagungarriak dakartza.

Animalia espeziei dagokienez, Euskal Herrikoak besterik ez ditu landu, nahiz eta kasu batzuetan oso presentzia urria eduki, hartza kasu. Ugaztun handiekin (orein, hartz eta sarrioak) hasi eta karraskari txikiekin amaiatu, hegaztiak edo klasiko handiak (basurdea, otsoa) ahaztu barik.

Lan bikain honen egilea Jonathan Rubines gasteiztarra da. Biologo ikasketaz, ingurugiro aholkulari gisa egiten du lan baina, batez ere, natura maite du.