Gure 28 herri harresidunak

Posted on 03/03/2016 by Euskal Herria bilduma

This slideshow requires JavaScript.

Itzela da Guía de los pueblos amurallados gidaliburuak piztu duen jakin-mina. Euskal Herria Liburuak bildumako ale horrek gure herrietan gorde diren harresien multzoaren gaineko interesa hauspotu du. Esaten dugunaren erakusgarri dira irakurleek egin dioten harrera beroa eta hedabideek eman dioten lekua.

Liburuak 28 herri harresidun batu ditu. Horietan zerka zaharren atal garrantzitsuak gorde dituzte. Lekuan lekuko harresien bilakaera historikoa eta gaur egungo egoera islatu ditu gidaliburuak. Horrez gain, bisitarako ibilbide bat proposatu eta antzinako zein gaur egungo defentsa horma horien kokapena zehazten dituen planoa erantsi zaio.

Liburuko 28 herri harresidunak ondoko hauek dira:

EH_PUEBLOS AMURALLADOS-1zuzen.indd Zerrenda horretakoez gain, 30en bat herri gehiago jaso ditu, laburrago, harresi zati apalagoak dituztelako.

Bestalde, herri harresidunen gidaliburua hizpide izan dute hedabide askok, hala prentsa idatzian (Berria), nola irratian (Bilboko Herri Irratia, Onda Vasca, Radio Vitoria, Radio Euskadi) eta tebistan (ETB1eko Azpimarra saioa).

“Guía de los pueblos amurallados”, gure iraganaldiko harrien xarma

Posted on 28/01/2016 by Euskal Herria bilduma

Erantzun

13 AMURALLADOStxiki

Euskal Herria Liburuak bildumak izenburu berritzaileaz ekin dio 2016ari. Izan ere, “Guía de los pueblos amurallados” (herri harresidunen gidaliburua) liburuak ez dauka kasik aurrekaririk gurean. Gidaliburu horretan harresia gorde duten 28 herri bildu eta deskribatu dituzte. Gainera, antzinako zerketako atalen bat zutik duten beste 30en baten berri ere eman dute, laburrago.

Euskal Herrian ez dago mundu mailan ospetsuak diren Dubrovnik, Carcassone edo Avilaren parekorik. Baina badira gurean herri harresidun asko, zein bere ezaugarriekin: hiriburu handiak (Iruñea), herrixka gotorrak (Salinillas de Buradón, Torralba del Río), erromatar aroko harresiak (Erriberri), Erdi Arokoak (Agurain, Artaxoa) edo Vauban ingeniari ospetsuak diseinatutakoak (Baiona).

Gidaliburu honetan harresi bakoitzaren historia eta bilakaera jaso dute, baita gertakizun garrantzitsuenen edo harrigarrienen berri eman ere. Beste atal batean, zerkaren gaur egungo egoera zertan den azaldu eta bisitatzeko ibilbidea proposatu du. Gainera, harresia planoan kokatu eta argazkiak erantsi dituzte. Azkenik, hiztegi labur bat ere atxiki diote liburuari, arkitektura militarraren berben esanahia azaltzeko.

“Guía de los pueblos amurallados” liburuaren bidez hedabideetan gutxitan azaltzen diren herri txiki zoragarriak aurkituko ditugu, ezagutzen ditugun beste batzuk bestela ikusiko ditugu, gure iraganaldiko pasarte kitzikagarriekin minberatuko gara eta gure ondarearen harribitxietan barrena gozatuko dugu, antzina gerla tokiak izan zirenak gaur egun, kasu batzuetan behintzat, elkarbizitzarako eta aisialdirako eremu gustagarri eta baketsuak bilakatu baitira.

Liburuaren egilea Hektor Ortega da, Sua argitaletxeko editorea. Bidaia gidaliburuak eta “Euskal Herria. Historia, paisaia, kultura” liburua idatzi ditu, besteak beste. Historia gaiez sarri jardun du, hala argitalpen dibulgatiboetan nola espezializatuetan.

“Los mejores recorridos para conocer los Pirineos”, ezinbesteko gidaliburua

Posted on 11/01/2016 by Euskal Herria bilduma

Erantzun

Sua argitaletxeak Los mejores recorridos para conocer los Pirineos gidaliburua kaleratu berri du. Pirinioak maite dituztenen artean klasiko bihurtuko da, seguru. Argitaletxeak 60 txangorik onenak hautatu ditu eta liburuan bildu ditu, hala paseoak nola igoerak. Egilea eskarmentu handiko mendizalea eta idazlea da, Gorka Lopez gasteiztarra hain zuzen.

Txangoak zailtasun mailaren arabera antolatu ditu Suak, hasi errazenetatik eta buka hirumilakorik ezaugarrienekin. Gainera, liburuko orrialdeetan barrena mendian ibiltzeko oinarrizko eskuliburua aurkituko dugu. Horregatik guztiagatik, Pirinioetan hasteko gidaliburu bikaina ere bada liburu hau.

Gorka Lopezek eskutik hartuko gaitu eta lehenengo ibilbide errazak egingo ditugu Añiscloko haitzartetik, Gavarnieko zirkutik edo Bosc de la Selva oihanetik. Urratsez urrats txangoen zailtasuna handituko da eta amaitu mendirik garaienetan amaituko dugu: Aneto, Monte Perdido, Balaitús… Jakina, Euskal Herria ere ageri da liburuan, ezin bestela izan Pirinioak aipatzen hasita. Besteak beste, Iñarbegiko erreka, Sorogain, Hiru Erregeen Mahaia, Larrun, Orhi edo Iratiko oihana bisitatuko ditugu.

Ibilbidearen deskribapen zehatzaz gain, txango bakoitzak mapa, kalitate handiko argazkiak, jakingarri teknikoak eta informazio osagarria dakartza. Gainera, arestian esan legez, liburuan barreiaturik daude mendian hasteko eskuliburuko atalak.