“Mundu bat motxilan”, Alex Txikonen menditazioak

mundubatmotxilan_SUA

Liburu berezia, harribitxia, kaleratu berri du Sua Edizioak-ek. Aurrekaririk gabeko liburua da gurean, berritzailea, kitzikagarria eta hunkigarria. “Mundu bat motxilan. Alex Txikonen menditazioak” Everesterako bidaia bat da Lemoako mendizalearen eskutik, baina askoz gehiago ere bada, bizitzan, mendian eta mendizaletasunean murgiltzeko, baloreez hausnartzeko eta naturaz gozatzeko gonbita dakar eta. Unai Ormaetxeak osatu ditu Txikonen ibilera eta urratsak eman ahala sortu diren gogoetak, pasadizoak, istorioak eta historia handiak. Ez da biografia bat, bizitzari buruzko bere ikuspegia emateko ahalegina baizik.

Menditazioak berba asmatu du Ormaetxeak, Alex Txikonen barne bidaia honen berri emateko. Menditazioak direlako, beste ezer baino gehiago, Everestera negu betean eta oxigeno barik igo nahi duen mendizalearen gogoetak. Horrela, bidean aurkituko dituen paisaia, kultura eta pertsonen gainean hausnartzearekin batera, mendiarekin lotutako zazpi kontu eta istorio azalduko zaizkigu. Txikonek horiek baliatuko ditu bizitzaren gaineko balore nagusietako batzuk mahai gainean ipintzeko. Kontua ez baita gailurrera iristea, zelan jokatzen dugun baino.

20191202_124418

Alex Txikon eta Unai Ormaetxea.

Bidaia kitzikagarri honetan César Llagunoren ilustrazio ederrak izango ditugu bidelagun. Haien bitartez azalduko zaizkigu mendi tontor haietako parajeak eta Txikonek kontatzen dizkigun istorioak. Horrez gain, Rafa Ugaldek sarrera idatzi du eta Juanra Madariagak hitzostea.

Unai Ormaetxea (Zornotza, 1974) eta Alex Txikon (Lemoa, 1981) aspaldiko lagunak dira. Proiektu hau elkarlanean gauzatu dute. Liburua beren-beregi ondu dute gazte-jendeari begira. Hala ere, gazte nahi heldu, edonork irakurtzeko eta gozatzeko modukoa da.

This slideshow requires JavaScript.

“Everest. Herri oso bat gailurrean” komikiaren bigarren edizioa, salgai

_everest_komikaCUBIERTA2.indd

Harrera beroa egin diote mendizaleek “Everest. Herri oso bat gailurrean” komikiari. Kaleratu eta aste gutxira agortu egin dute. Horretaz, argitaratzaileek, Mendifilm Festival eta Sua Edizioak alegia, bigarren edizioa atondu eta salgai paratu berri dute.

Durangoko Azokan bertan igarri zen harreraren beroa. Suako standean gehien saldutako liburua izan zen komikiaren euskarazko bertsioa. Harrezkero, lehenengo inpresio hori baieztatu baino ez da egin. Hortik dator bigarren edizio hau, mendizale eta, oro har, euskal gaietan interesatuta dauden guztien jakin-mina asetzeko asmoz. Liburuaz gehiago jakiteko, sakatu hemen.

Everest, herria gailurrera eraman zuen balentriaren komikia

_everest_komikaCUBIERTA2.indd

Mendizaletasuna kirola baino zerbait gehiago da euskaldunontzat. Gure izaerari sakon atxikita doan jarduera da. Euskalduna izateko modu bat, kasik. Eta mendian egindako balentriak, gure historiaren kinka larri batzuetan, herri garaipentzat jo izan ditugu. Beharbada, une gogoangarrienak Everesterako lehenengo espedizio biak izan ziren, 1974koa (Tximist espedizioa) eta 1980koa. Haien historia kitzikagarria komiki bihurtu dute Ramon Olasagastik eta César Llagunok.

2 orri_cmyk

“Everest. Herri oso bat gailurrean” liburuak espedizio haiek gainditu zituzten oztopoak kontatzen ditu: finantzazioa, eragozpen politikoak, erorikoak, etsipenak, porrotak, zalantzak… eta baita erakutsitako adorea, grina, ilusioa eta jakintza. 1980ko maiatzaren 14an Martin Zabaletak ikurriña munduko tontorrean haizatu zuenean, herri oso bat zuen alboan, hain izan baitzen igoera hura talde-lan zabalaren emaitza.

Historia hori Ramon Olasagastik josi du eta César Llagunok jarri du irudietan. Horrela sortu da komiki hau, bera ere talde-lanaren emaitza, Sua Edizioak eta Mendifilm Festival jaialdia elkarlanean aritu dira eta argitaratzeko.

This slideshow requires JavaScript.