Bada sasoia! Euskal Herriko zuhaitzen gida, euskaraz

EH_Zuhaitzak_azala

Bada sasoia! Udazkenarekin batera dator Euskal Herriko zuhaitzen gida. Zuhaitz askok jantzirik ederrenak erakusten dituzten aroan heldu zaigu espezie ezaugarrienen gidaliburu eder hau.

Euskal Herriko zuhaitzen gidaliburuak gurean hazten diren espezieak batu ditu, hala autoktonotzat jotzen ditugunak nola, kanpotik etorrita bertakotu egin direnak. Katalogo honetan ehun espezie aurkituko dituzue, zuhaitz eta zuhaixka, eta horiekin gure oihan, mendi, ibar, itsasertz eta ibaiertzetako arbolak ezagutu ahal izango dituzu.

Espezie bakoitzari dagokion informazio zehatza dago gidaliburuan: izen zientifikoa eta izen arruntak hala euskaraz nola gaztelaniaz, etimologia, espezie bakoitzeko atalen deskribapen botaniko zehatza identifikazioa errazteko, bizileku motak eta Euskal Herrian daukan hedadura, jarduera ekonomikoetarako eta medikuntzarako eduki dituen erabilerak ahaztu barik. Hiztegi botaniko txikia eta medikuntzari buruzko ohar sorta bat ere badakar.

Ilustrazio ederrak Calros Silvar marrazkigileari zor zaizkio. Testu orokorrak, aldiz, Henrique Niño Ricoik idatzi ditu. Euskal Herriari dagozkion datuak Sua Edizioetako erredakzioak osatu ditu.

This slideshow requires JavaScript.

Mendi ibilbideak, zuhaitz apartekoen bila

EH27_ARBOLES_mtdoMendi ibilbideak, zuhaitzak aurkitzeko. Hori da “Rutas para descubrir árboles monumentales” liburuak proposatzen digun plana. Euskal Herria Liburuak bildumako ale berria Jonathan Rubines eta Marta Villotak idatzi dute. Lagundu egiguzu, plazer baduzu, herriko izaki bizidun zaharrenak ezagutzera!

Liburuak 35 ibilbide bildu ditu, Euskal Herrian barrena. Urratsak eman ahala, zuhaitz menderakaitzak, baso sarriak, oihan joriak eta garapenak suntsitu duen paisaiaren azken gotorlekuak agertuko zaizkigu begien aurrean. Eta, batez ere, ale paregabeak ikusiko ditugu, parerik gabeak zaharrenak, ederrenak, garaienak edo, are, sakratuak direlako.

EH27_ARBOLES_174-175

Pagoak aurkituko ditugu, hala tantaiak nola motzak, Holtzarteko pagadi zabaletakoak, adibidez, edo Albertiakoak, guda-zelaiaren gainean hazitakoak. Haritzak ere badira, Lizarragakoak kasu, gaztainondoak Apinaiz edo Karrantzan, haginak, lizarrak, arteak, ametzak, madariondoak, artelatzak, azkarrak, hurritzak…

Eta, batez ere, zuhaitz apartekoak ditugu zain, Mendazako Hiru Hanka Artea esate baterako, edo Etxagueko haritza, Artzentaleseko Kontzejuko zuhaitza eta, zelan ez, Gernikako Arbola.

Txango bakoitzarekin dagokion ibilbidearen eta agertuko zaizkigun zuhaitz espezieen ezaugarrien deskribapen zehatza aurkituko dugu. Eta, horrez gain, mapa, jakingarriak eta argazkiak.

Egileek ondo baino hobeto ezagutzen dute gure landare paisaia. Marta Villota Gálvezek mendi ingeniaritza doktoregoa dauka eta paisaietan aditua da. Bere doktorego-tesia Arabako zuhaitz apartekoei eskaini zion. Bere aldetik, Jonathan Rubines biologoa da eta natur eremu babestuen kudeatzaile gisa egiten du lan. Bilduma honetan bertan “Guía de huellas, señales y rastros de animales” argitaratu du, eta Natura bilduman, berriz, “Guía de mamíferos de Euskal Herria”.