Paul Caballero | Euskal Herria liburuak

Badakizu polinizazioa zer den? Eta intsektuen eta loreen arteko harremana nolakoa den?
Sartu nahi duzu erle baten lurrazpiko etxean? Goazen ba! Malenen adiskide berri eta bitxiarekin egingo dugu hegan eta polinizazioaren munduan sartuko gara. Intsektuentzat etxe bat egiten ikasiko duzu eta beste hainbat gauza berezi, izugarri, erakargarri eta dibertigarriak deskubrituko dituzu.

Malen intsektuen munduan ipuina etxeko bihurrei intsektuak zertan diren azaltzeko eta haien interesa pizteko modu bikaina da. Umeen neurriko kontakizun honek intsektuen eta landareen mundu liluragarrietarako atea zabalduko die modu kitzikagarrian. Ipuin ilustratua den heinean, atsegin handiz irakurriko dute. Eta mamia ere baduenez, euren buruak jantzi eta inguruko naturak zelan funtzionatzen duen ikasiko dute.

Ilustrazioak Paul Caballero marrazkilariaren lana dira. Testuak, berriz, Argiñe Areitiok idatzi ditu, Iñaki Larretxi biologoaren aholkularitzaz. Liburu hau Adi Natura bildumaren baitan argitaratu da. Ume eta gazteei zuzendutako liburuak plazaratzen dira bilduma horretan. Orain arte hiru ipuin gehiago kaleratu ditu: Nork hil du trikua?, Narrasean eta Koloretako intsektuak.

Malen intsektuen munduan zertan den jakiteko, lagin bat utzi dugu lerroon azpian. Gozatu!

MALEN_sareak Deskargatu

Aurton 35 urte beteko ditu Sua Edizioak argitaletxeak. Bide luzea, polita eta oparoa izan da baina oraingo honetan atzera barik aurrera begiratu nahi dugu. Izan ere, gure motxilak tontor eta montor beterik daude, baina, zabaltzen baditugu, oroitzapenak adina proiektu eta asmo berri aurkituko ditugu. Eta gaur horietako batzuk aurkeztu nahi dizkizuegu, gaztetxoei begirako sail berri bat ireki baitugu, Adi bilduma, eta hiru liburu kitzikagarrirekin dator.

Adi bildumaren filosofia natura eta gaztetxoen arteko harremana erraztea da. Alegia, gure inguru hurbila ezagutzera ematea eta harekiko interesa eta jakin-mina piztea. Helburu horrekin jaio da, esate baterako, Basoko sekretuak, gazte naturalisten koadernoa. Koadernoak landare eta animalia espezieak ezagutzeko gakoak eskainiko dizkie gaztetxoei, haien arrastoak non eta nola aurkitu, haien ohituren eta bizitokien berri eman. Horrez gain, badakartza naturan esperimentuak eta jarduerak egiteko irizpideak.Hona hemen aurrerapen txiki bat:

basoko-sekretuak-sareak Deskargatu

Ipuinak ere bide egokia izan daitezke txikienak naturarekiko harremanetan sartzeko. Horretara datoz Narrasean eta Nork hil du trikua? liburuak. Lehenengoak (3-6 urte) etxe inguruko animaliak ezagutzera ematea du helburu. Bigarrenak, berriz, (8-10 urte) trikuaren heriotza argitu nahi du, nobela beltza balitz bezala. Auto batek harrapatuta hil da? Beste animalia batek eraso egin ote dio? Isilpeko ehiztariren batek akaso?

Eta hau guztiau gutxi balitz, Piricuentos. Cuentos y rutas montañeras con niños liburua atera du Sua Edizioak-ek. Bertan Pirinioetan umeekin egiteko moduko ibilbide andana dakar eta, horiei atxikita, paraje horietan bertan girotutako ipuin ederrak, ilustrazio zoragarriekin. Liburu paregabea.