Aiako Harria parke naturala eta Jaizkibel, guztion eskura

Posted on 28/02/2023 by Euskal Herria bilduma

Zer esana ematen ari da Aiako Harria parke naturala eta Jaizkibel liburu berriak. Batetik, lehenengoz Euskal Herria bilduman euskaraz ere kaleratu delako. Are gehiago, jatorrizkoa euskarazko bertsioa da. Bestetik, gidaliburu bikain eta erakargarria delako, ezinbesteko laguna parke naturaleko eta Jaizkibelgo zokondorik ederrenak bertatik bertara ikusteko.

Orotara, Mikel Arrizabalagak ondu duen liburuan 26 ibilbide aurkituko ditugu, 15 Aiako Harria parke naturalaren baitan edo inguruetan, eta gainerakoak Jaizkibel aldekoak. Gutxi batzuk zeharkaldiak edo igoera maldatsuak dira. Gehienak, berriz, goizpasa polita egiteko moduko plan ederrak. Denak, seguru, asebeteko gaituzten mendi-irteera zoragarriak.

Tontorrak, oihanak, ur-jauziak, ibar esekiak, labarrak, zelaiak, errekak, urtegiak, isilpeko bidezidorrak, meatzeak eta milaka kontu zahar eta berria izango ditugu bidaide. Nahi baduzu gehiago jakin, sakatu lerro hauen azpiko lotura. Bertan daude liburuko lehenengo orrialdeak, aurkibidea barne. Ondo ibili!

eh55_aiakoharria_eusk Deskargatu

“Aiako Harria eta Jaizkibel”, Euskal Herria bildumako ale berri ikusgarria… eta euskaraz

Posted on 27/01/2023 by Euskal Herria bilduma

Erantzun

Euskal Herria Liburuak bildumako 2023ko lehenengo liburuak zer esana emango du. Batetik, edukia oso erakargarria delako, Aiako Harria parke naturala eta Jaizkibel baitira protagonista, Gipuzkoako ipar-ekialdeko harribitxiak alegia. Bestetik, lehenengoz, bildumako liburu bat euskaraz agertu da. Mikel Arrizabalagaren jatorrizko testuak Aiako Harria parke naturala eta Jaizkibel liburua osatu du. Gaztelaniara itzulita, erdaraz ere argitaratu da: Parque natural de Aiako Harria y Jaizkibel.

Liburu honek Mapas Pirenaicos sortako Aiako Harria y Jaizkibel (2018) liburukiko edukiak gaurkotu eta osatu ditu. Orotara, hogeita sei ibilbide proposatzen ditu baso, gailur, sakan eta itsaso gainean eskegitako haranetan barrena. Aiako Harria parke naturaleko atalean mendi igoerak eta zeharkaldiak bildu ditu, baita goiz-pasa egiteko moduko mendi-irteerak ere. Tipi tapa goazela, ur-jauzi ikusgarriak, pagadi paregabeak, mairu-baratzeak, meatze zaharrak eta natura paisaia bikainak aurkituko ditugu. Jaizkibelen, berriz, itsaslabar bakartietako altxorrak dira nagusi: malkarrak itsasora amiltzen, haran eskegiak, higadurak zizelkatutako artelanak, urruneko kalak…

Bestetik, esan legez, hau da Euskal Herria Liburuak bildumak euskaraz plazaratu duen lehenengo alea. Alde horretatik, mugarri txiki bat ere bada, etorkizunari begira urratu nahi dugun bidean aurrerapausoa. Datozen urteotan bildumako ale gehiago euskaraz argitaratuko dira.

Egilea Mikel Arrizabalaga Aizpurua da. Mendizale aditua, hamaika argitalpen sinatu ditu azken hamarkadetan, hala liburu moduan nola aldizkarietan (Pyrenaica, Nora…) eta egunkarietan (Berria).

“Parque natural de Bardenas”, beste mundu baterako atea

Posted on 11/11/2022 by Euskal Herria bilduma

Erantzun

Bardeetako paisaia ez da Europako paisaia. Salbuespena da, kontinente osoan leku gutxitan aurki daitezkeen ekosistemak eta habitatak osatu eta gorde dituelako. Bada, mundu ezberdin horretara sartzeko ate ezin egokiagoa da Parque natural de Bardenas liburua. Gorka Lopez mendizale adituaren eskutik, goitik behera eta ezker-eskuin zeharkatuko dugu parke naturala eta, horrela, haren zokondo ezaugarrienak ere bertatik bertara ezagutu, ikusi eta zaintzen lagunduko dugu.

Orotara, Bardeetako parken natural eta biosferako erreserba 45.000 hektarea zabal da, dena estepa, muino gorri, labore-sail eta oihan. Ekosistema hauetako askok ez dute parerik gurean, beste latitude batzuetako ezaugarriei erantzuten diete eta. Hortaz, altxor ekologiko baten aurrean gaude. Liburu honek modu egokian ezagutzeko aukera ematen digu.

Horretarako, Gorka Lopezek hogeitabost ibilbide proposatu eta deskribatu dizkigu, hala Bardea Zurian nola Bardea Beltzan barrena modu egokian ibiltzeko. Horrez gain, parke naturala bttz zeharkatzeko hiru ibilbide ere jaso ditu. Eta gure bidaiaren osagarri, Erriberako herri nagusietako bidaia-gida ere atondu du, Bardeetako bisita are gozoagoa izan dadin.

Beheko bideoan, Gorka Lopezek berak azaldu ditu liburuaren nondik norakoak. Ondo ibili!