> Suaren nobedadeak | Euskal Herria liburuak

Mapas Pirenaicos bilduma arrakastatsuak lau izenburu berri ekarri ditu azken asteetan liburudendetara. Mendizaleen kuttunak dira, gainera, mapa berriek islatu dituzten eremuak. Egin kontu: Belagua-Zuriza, Gorbeiako parke naturala, Anboto-Udalatx (Urkiolako parke naturala) eta Bidasoa-Bertiz eskualdea (Bertizko parke naturala barne).

Bilduma honetan ohi den bezala, Miguel Angulo adituak osatu ditu lau mapok. Erabat gaurkotuta daude, GPSrako egokiturik eta 1:25.000 eskalan aurkezturik, xehetasun guztiak jasotzeko. Besteak beste, eskualde horietako ibilbide seinaleztatu guztiak (SL, PR, GR…) islatu dituzte mapa hauek.

Gainera, mapek liburuxka ere badakarte. Sua Edizioak eta Gorka Lopez mendizale saiatuak adostu eta gasteiztar idazleak garatutako hamabost txango eta igoera aurkituko dituzue bertan, zein baino zein erakargarriago. Ibilbide horietako trackak Suaren webgunean aurkituko dituzue, deskargarako listo.

Dagoeneko hamalau dira Mapas Pirenaicos 1:25.000 bildumako tituluak. Horietako hamar Euskal Herriko eskualdeei dagozkie, ia denak mendizaletasunari estu lotutakoak: Iratiko Oihana, Baztan, Aizkorri-Aratz, Aralar, Urbasa eta Leire, orain aurkeztutako lau horiekin batera.

2014an agertu zenetik, bilduma horrek arrakasta handia lortu du mendizaleen artean. Hain da horrela ezen denbora gutxian mapa bilduma horretako titulu batzuk agortu eta berriz argitaratu behar izan diren.

Egun hauetan iritsi da liburudendetara “57 rutas senderistas por Euskal Herria”, gure herriko bailara eta parke natural guztietan barrena ibiltzeko gidaliburu berria. Txusma Perez Azaceta adituak idatzi du eta egiterakoan beren-beregi eduki ditu gogoan aldapa gutxiko ibilbide ez oso luzeak maite dituztenak.

Izan ere, liburuko ibilbideak egoki-egokiak dira familia giroan egiteko edo, bestela, mendi xendazaletasunean hasi berriak direnentzat. Txango atseginak dira, sarritan zirkularrak eta beti aukeratuak: bisitatuko diren lekuen edertasunaren edo izaera paregabearen ondorioz aukeratutakoak alegia. Laburbilduz, Euskal Herriko eskualde eta natur eremu nagusi guztietan gozatzeko proposamenak dira, hasi Bardea edo Urdaibai aldean eta amaitu Iratiko oihanean, Karrantzan edo Valderejon.

Txango bakoitzarekin batera ibilbidearen deskribapena, mapa, argazkiak eta inguruetan planak egiteko gomendioak txertatu ditu gidaliburuak. Egilea, Txusma Perez Azaceta alegia, mendi liburuak egiten aditua da. Aurreko liburua, “Los mejores recorridos para conocer la montaña vasca”, 2013an plazaratu zuen Suak eta dagoeneko edizio bi egin ditu.

Liburu hau sorta baten lehen alea dugu. Izan ere, Sua Edizioak argitaletxeak xendazaletasunari lotuko zaion bilduma berria ireki du.