EH liburuak bildumako harpidedun berrientzat, motxila eta asteburua landetxean opari

Posted on 17/12/2014 by Euskal Herria bilduma

Euskal Herria Liburuak bildumako harpidedun egiten bazara, Sua Edizioak argitaletxeak Ternua motxila bat eta landetxean asteburuko egonaldia oparituko dizkizu. Eskaintza ezin tentagarriagoa, beraz, gure herriaren sekretuak irakurleen esku lagatzen dituen liburu sortarekin bat egiteko.

Euskal Herria aldizkari ospetsuaren oinordekoa izanik, Euskal Herria Liburuak bildumak sei titulu argitaratzen ditu urtean, betiere mendiaz, naturaz, kulturaz eta bidaiez. Lehenengo urte honetan gure herria maite dutenentzat klasiko bihurtu diren liburuak plazaratu ditu, Excursiones a Nacederos, Ama Lurra edo Guía de Vías Verdes kasu.

Bildumak sei liburu berri kaleratuko ditu 2015ean. Haietako batzuk, seguru, Euskal Herrian barrena ibiltzea gustatzen zaienen kuttunak bilakatuko dira. Harpidetzak orain arteko prezioari eutsi dio (48 euro gehi bidalketa gastuak), alegia, saltokietan baino %50 merkeago. Horrez gain, harpidedunek %25eko deskontua daukate Sua Edizioak argitaletxearen liburu eta mapetan. Eta, esan bezala, harpidedun eginez gero, Ternua motxila eta asteburua landa-etxean opari. Gozatu Euskal Herria Liburuak bildumarekin!

Euskal Herria liburua, Hamaika telebistan

Bideoa

Erantzun

Elkar fundazioak eta Sua argitaletxeak plazaratu berri duten Euskal Herria liburuaren gaineko erreportajea egin du Hamaika Telebistak. Gure herria zer den, nolakoa den lurraldea, zelakoak diren herritarrak, gure historia, hizkuntza eta paisaiak… Hori dena dago laburbilduta Euskal Herria liburuan. Eta lau hizkuntzetan argitaratu da, euskaraz, gaztelaniaz, frantsesez eta ingelesez. Hizkuntza bakoitzak bere liburua dauka.

Erreportajea ikusteko, sakatu beheko estekan edo liburuaren irudiaren gainean.

http://www.bideometa.net/node/79071/browser_bideoa?is_hide_h1=1

Decrecimiento y buen vivir, zer pentsatua ematen duen liburua

Posted on 04/12/2014 by Euskal Herria bilduma

Erantzun

Gero eta gehiago dira abisua ozen eman duten adituak. Lurra bidegurutzera iristear dago. Eta erabaki beharko dugu: hil ala bizi. Gero eta hurbilago daukagu jasangarria ez den muga arlo nagusietan: klima, oihan-galtzea, ur kutsatuak, biodibertsitatearen murrizketa…

Kinka larri horri aterabidea eskaini nahian desazkundearen teoria sortu da eta bere baitan jokaera jasangarri andana bildu ditu. Besteak beste, elikadura subiranotasuna, ekonomia soziala, ekoizpen eta kontsumo kooperatibak eta era horretako esperientziak. Baina baita hegoaldean ondu dituzten proposamenak, Sumak Kawsay (Bizitze Ona, Ongi Bizitzea edo Biziera Ona) esaten zaiona adibidez. Azken batean, inora ez bide daraman gehiegizko kontsumoa sustatzen jarraitu aurretik, kontuan hartu eta eztabaida sakona merezi duten ideiak.

Sua Edizioakek ia 30 urtez gure ingurua zaintzen laguntzeko ahaleginak egin ditu eta horregatik ekarpen eta gogoeta horiei lekua egin nahi izan die. Euskal Herria Liburuak bildumako titulu berria, Decrecimiento y Buen Vivir Mugarik Gabe gobernuz kanpoko elkarteko hiru adituk idatzi dute. Puri Pérez Rojok, Maite Ezquerro Sáenz eta Jesús González Pazosek denok ulertzeko moduko hizkeraz jardun dute elikadura subiranotasunaz, ekonomia feministaz, elkartasunaren ekonomiaz eta garraio zein energia ereduez, besteak beste. Gainera, liburuan hiru elkarrizketa mamitsu daude: Carlos Taibo irakaslea, Yayo Herrero antropologoa eta Fernando Huanacuni pentsalari aimarari egindakoak alegia.