Balaitus-Vignemale eta Maladeta-Aneto, Mapas Pireinacos ataleko ale berriak

Posted on 11/03/2015 by Euskal Herria bilduma

Sua Edizioak argitaletxeak Mapas Pirenaicos bildumako mapa berri bi kaleratu ditu, ohi bezala, 1:25.000 eskalan. Biak ala biak Pirinioetako erdialdeko natur eremuak dira, mendizaleek biziki maite dituzten horietakoak: Maladeta-Aneto eta Balaitus-Vignemale hain zuzen ere.

Mapa Miguel Angulo espezialistak egin du gaur egungo teknikarik aurreratuenak erabiliz. Gainera, GPSrako erreferentziak dakartza. Lan kartografiko hauetan seinaleztatutako ibilbide guztiak islatu dira, baita Gorka Lopezek Suarentzat bereziki atondutako hamabost ibilbideak ere. Ibilbide horiek (txangoak zein mendi igoerak) maparekin batera saltzen den liburuxkan ageri dira zehatz-mehatz azaldurik.

Beraz, mapetan jasota daude Aneto, Gran Facha, Vignemale, Maladeta edo Balaitus bezalako mendi handietarako igoerak, baina baita laku eta haitzarteetan barrena egiteko txangoak ere (Ibon de Cregüeña, Gorgas de Alba…). Gorka Lopezek diseinatutako ibilbide guztien trackak Suaren web gunetik jaitsi ahal izango dira laster batean.

Mapas Pirenaicos bilduma 2014an sortu zen. Mendizaleek harrera beroa egin diote. Hala Pirinioetako nola Euskal Herriko natur eremu garrantzitsunetako kartografia eskaintzen du, 1:25.000 eskalan.

Sua.eus berrian, produktu digitalen txokoa

Posted on 11/02/2015 by Euskal Herria bilduma

Erantzun

Sua argitaletxeak web gunearen helbidea aldatu ez ezik, edukiak berritu egin ditu. Aurrerantzean sua.eus helbidean, orain arteko zerbitzu guztiez gain, produktu digitalei eskainitako atala aurkituko duzue, besteak beste.

Izan ere, ‘Sua digital’ izenburupean lau aukera zabaltzen dira. Lehenengoan, Mapas Pirenaicos bilduma berriko ibilbideei dagozkien trackak daude. Bertatik jaitsi daitezke, doan. Gogoratu ibilbide horiek Gorka Lopez mendizale adituak diseinatu dituela, beren-beregi Suarako.

Bigarrenean Pirinioetako hiru handien zeharkaldiko trackak daude eskuragarri. Hori ere Gorka Lopezek diseinatutakoa da eta Monte Perdido, Posets eta Aneto lotzen ditu.

Hirugarrenean, ostera, Sua argitaletxearen mapen bertsio digitalak aurkituko dituzue. CompeGPSrako daude egokiturik. Azkenik, La Alta Ruta Pirenaica liburuaren bertsio digitala era jarri da erosgai Sua digital atal berri horretan.

Edonola ere, nobedade gehiago badago: Suaren 2015. urteko katalogoa eskuragarri dago, nobedadeak argitaratu ahala haien berri jasotzeko aukera berritu da eta Suak diseinatutako zeharkaldietarako beren-beregi atondutako atala sortu da. Eta jakina, Sua argitaletxearen produktu guztien berri ematen du, Euskal Herria Liburuak eta El Mundo de los Pirineos tartean direla.

Txokoetako isilpeko errezetak, etxera

Posted on 26/01/2015 by Euskal Herria bilduma

Erantzun

Zaporez beteta ekin dio urteari Euskal Herria Liburuak bildumak. Los secretos del txoko a su cocina liburu berriak 218 errezeta bildu ditu helburu argi batekin: denon esku jartzea gure gastronomiaren sekretu guztiak. Hasi arrautzak frijitzen eta segi haragi eta arrain sorta zabalarekin harik eta gourmet afizionatuen eta sukaldean ganoraz hasi nahi dutenen gutiziak ase arte.

Egileak, Andoni Diazek alegia, bere kasa ikasi du txoko eta sozietateetan, batetik, eta lehiaketa gastronomikoetan bestetik. Urte askotako jardunaren ondorioz ikasitako sekretuak denon eskura paratu ditu orain, jatekoak prestatzeko grina eta plazera sentitzen dutenentzat aberasgarri.

Liburuak hamairu atal ditu. Hasi zopa, krema, entsaladak eta hasierako platerekin hasi da. Ondoren, arrautza, tortilla, barazki, lekale, pasta eta arrozen arloak jorratu ditu. Horien ostean, arrain, itsaski, hegazti, ehizaki, haragi, ziza eta onddoen arloan murgildu da. Amaitu orduko, saltsak, saldak, mahonesa, azkenburukoak, olioak eta likoreak zelan prestatu azaldu du. On egin!