Haitzetako zuloak, Karrantza eta Arcenatik Biarritz eta Leireraino

Posted on 05/05/2015 by Euskal Herria bilduma

Sartzaleta (Allinibarra, Nafarroa). Lokizko haitzetan induskatutako zulo ikusgarria.

Aste gutxi batzuk besterik ez du behar izan Ventanas naturales liburuak mendizaleen arreta bereganatzeko. Santi Yanizen lanak eduki berritzaileari zor dio arrakasta hori. Euskal Herria Liburuak bildumako titulu horrek orain arte oharkabean igaro litezkeen leku zoragarriak plazaratu ditu. Horietako eskutada bat besterik ez zen berez ezaguna (Jentilzubi, Baltzola, Atekagaitz …).

Horixe da, hain zuzen, liburuaren bertute nagusia, naturaren altxor horiek -50, orotara- argitara atera, dagozkien ezaugarriez aurkeztu, benetako garrantzia aitortu eta mendizaleen esku utzi izana alegia. Zeintzuk dira altxor horiek? Behean argitaratu dugu liburuko aurkibidea, aukeratutako 50 zuloekin. Batzuen ospea Euskal Herri osora zabaldu da, baina gehienak lekuan bertan besterik ez dituzte ezagutzen. Eta batzuetan, ezta hori ere ez. Horra hor aukera, beraz, nahi duenarentzat, Euskal Herria sakonago ezagutzeko eta, batez ere, paisaiari beste era batera begiratzeko.

Mendia elkartasunerako bide bihurtu du Baltistan fundazioak

Posted on 27/04/2015 by Euskal Herria bilduma

Erantzun

Arrasaten Baltistan Fundazioak egindako aurkezpenaren irudia.

Baltistan fundazioa hezkuntza eta genero berdintasunerako proiektuak garatzen ari da Pakistango Hushe ibarrean (Baltistan bailara). Fundazioak elkartasuna du xede, mendian nagusi diren baloreak –lankidetza, naturarekiko begirunea, irmotasuna, lana gogor egitea eta baikortasuna, besteak beste- aintzat harturik.

Fundazioak garatu dituen eginkizunetako bat bailarako umeen heziketa hobetuko duten irakasleak eta hezitzaileak formatzea da. Azken urteetan aldaketa handiak izan dira ibarrean, nahiz eta, fundazioko arduradunen iritziz, “emakumeak unibertsitatera joatearen aurkako erresistentzia handia izan den; ez dute ulertzen emakumeek zergatik joan behar duten eskolara edo unibertsitatera”.

Baltistan fundazioak iragan martxoaren 26an aurkeztu zituen egitasmoak, Arrasaten. Hitzaldian egon ziren, besteak beste, fundazioko lehendakaria, Jose María Ruiz, eta idazkaria, Inaxio Arregi.

Informazio gehiago: www.baltistan.eus

Excursiones a ventanas naturales, bidaia ikusgarria Santi Yanizen eskutik

Posted on 11/03/2015 by Euskal Herria bilduma

Ez gara oso oker ibiliko Euskal Herria bildumako liburu berria, Excursiones a ventanas naturales alegia, euskal mendizaleen artean klasiko bihurtuko dela esaten badugu. Badauzka eduki horretarako behar beste dohain. Alde batetik, gure mendietako haitzetan zabaldutako zulo, lehio eta zubietara eramango gaitu, leku liluragarriak, sorginduak, elezaharrei atxikiak edo natur balio handiko bazterretan txertatuak.

Beste aldetik, egileak ahalegin itzela egin du liburua irakurtzen dutenen harridura sortzeko eta lortu ere lortu du. Berrogeita hamar dira erakusten dizkigun haitzetako zuloak, tartean direla klasiko guztiak (Atxulaor Itxinan, Atekagaitz Itxasun, Sandriati edo San Adrian Aizkorrin…) eta lekuan lekuko bizilagunek besterik ezagutzen ez duten beste asko ere (Karrantza, Arcena, Arkamo eta Entziako mendietakoak, Irunberriko Trinitatea…). Itsasbazterrari ere erreparatu dio, hasi Bakion eta Biarritzeraino.

Hori dena gutxi balitz, testuak jakingarriz beterik datoz, haitzetako zuloen kokapena zehatz-mehatz azaltzen duten mapak alboan dituztela. Eta, jakina, argazkiak. Santi Yanizek ohi duen maisutasunaz islatu ditu leku liluragarri horiek, sarritan une gogoangarrietan harrapaturik, alegia, argiek edo eguraldiek itxura sorgindua erantsi dietenean.