Liburu-dendetan da Alex Txikonen “Manaslu neguan” liburu berria

Posted on 14/11/2023 by Euskal Herria bilduma

Heldu egin da. Alex Txikonen Manaslu neguan liburu berria gure artean da, liburu-denda guztietan. Bertan aurkituko dugu Manasluko igoera Lemoako mendizaleak berak kontatuta. Aurtengo urtarrilaren 6an iritsi zen tontorrera, igoera eta jaitsiera latzak eginda. Balentria hori, izatez, hiru urteko ahalegina izan da, lehenengo espedizio biak sari barik gelditu zirelako. Baina horiek ere badira tontorrerako bideko atalak, Alexek berak gogora ekartzen duen bezala, tontorra bidea bera delako.

Kontakizun zintzoa osatu du Txikonek. Sentitu bezala jaso ditu gertakizunak, bizipenetatik abiatuta, okerrak eta sufrimendua ezkutatu gabe. Berarekin batera ibiliko gara mendi mazela izoztuetan gora eta behera, serac beldurgarrien artean, hotz gorriaren mende eta haizeteak erruki barik astinduta. Chhepal, Lama, Mayla, Simone eta beste lagun asko izango ditugu alboan. Eta harritu ere egingo gara, Manaslurako bidea Sierra Leonatik ere igaro daitekeelako eta hara-hona gabiltzala Pasang Temba aspaldiko lagunarekin elkartuko garelako.

Liburu mardula da, hala edukiz nola orrialdez (224 orrialde), argazkitzarrez egoki horniturik. Hogei ataletan xehatzen du, urratsez urrats, tontorrerainoko bidea.

Reinhold Messnerrek mezu bat dakarkigu: zain dezagun mendia

Posted on 31/10/2023 by Euskal Herria bilduma

Erantzun

Reinhold Messner mendizale ospetsuak lau haizetara zabaldu nahi du bere deia: zain dezagun mendia. Zaindu behar dugu ez badugu nahi masa-turismoak hondora eraman dezan. Europako goi-mendia bere ezaugarriz hustu eta arriskurik gabeko eremu atsegin, abegikor eta seguru bilakatzen ari gara, kirolak praktikatzeko parke tematiko hutsa. Kaletarrok mendira joan beharrean, hirigunera jaitsi dugu mendia.

Reinhold Messnerren deia: Zain dezagun mendia liburuan jaso ditu bere kezka, hausnarketa eta proposamenak. Izan ere, urteetako eskarmentu, bizipen eta jakintzatik abiatuta, Messnerrek gogoeta partekatu du mendia eta natura maite duten guztiekin. Arazoaren larriaz jabetzea da lehenengo urratsa. Irtenbideak proposatzea, bigarrena. Eta horretara dator liburu hau.

Liburu honek euskal mendizaleari ere emango dio zer pentsatua. Izenburutik bertatik, Zain Dezagun Mendiak azken hamarkadetako hamaika borrokaren oihartzunak ekartzen baitizkigu euskaldunoi: Zain Dezagun Busturialdea edo Zain Dezagun Belagua historikoetatik gaur egun arte, zenbat halako gure bazterretan? Zenbat Zain Dezagun gehiago beharko ditugu oraindik? Arlo horretan, bere txikian, ekarpen handia egiten du liburu honek, arazoa mahai gainean jartzeaz gain, irtenbideak bideratzen hasteko irizpideak ere proposatzen dituelako.

Eta gogoetaren mamiaz gain, liburuak Euskal Herriko begirada ere jaso du. Izan ere, Juanjo San Sebastian mendizaleak eta Ramon Olasagasti kazetariak idatzi dituzte, hurrenez hurren, sarrera-testua eta epilogoa.

“Rutas para observar aves”, hegaztiak ikustera joateko bidelaguna

Posted on 06/10/2023 by Euskal Herria bilduma

Erantzun

Gure ibilaldietan egin ditzakegun jarduera kitzikagarrienetako bat hegaztiak ikustea da. Gustura ibiliko gara, inguratzen gaituen naturarekin bat egiteko aukera emango digu eta, hegaztien edertasunaz gozatzen garen bitartean, gu ere naturaren parte garela sentituko dugu berriro. Zeregin interesgarri hori proposatzen digu Euskal Herria Liburuak bildumako ale berriak. Rutas para observar aves liburua Jonathan Rubines eta José María Fernández-García adituek atondu dute.

Bere baitan, liburuak hogeita hamar ibilbide bildu ditu. Euskal Herri osoan zehar banatzen dira eta mota guztietako hegazti eta ekosistemak jaso ditu: ur-hegaztiak, kostaldekoak eta itsasokoak, haitzetakoak, mendietakoak, oihanetakoak, estepakoak eta pasean igarotzen direnak. Horrela, gure herriko paisaia sorta zabala jaso ez ezik, naturaren edertasunaz eta hegaztiez gozatzeko lekurik egokienak ezagutuko ditugu.

Jakina, liburuak arlo ornitologikoan Euskal Herrian nabarmendu diren lekuetara eramango gaitu, hasi Organbidexka lepo libretik (Zuberoa) eta buka Urdaibai Bird Center (Bizkaia) edo Ataria (Gasteiz) bezalako begiraleku berrietan, Pitillasko aintzira, Nafarroako haitzarteak eta kostaldeko itsadarrak bezalako klasikoak ahaztu gabe.

Ibilbide bakoitzak hegazti espezie nagusi bat jaso du. Hori deskribatuta dakar eta,gainera, ibilbidearen mapa eta argazki ikusgarriak. Irudi ederrok liburua lasai ikuskatzera gonbidatuko gaituzte lehenengo eta kanpora hegaztiek ikustera joatera gero. Ondo ibili!