Hona hemen laku, urtegi eta hezeguneekin gozatzeko 36 proposamenak

Posted on 26/02/2018 by Euskal Herria bilduma

Hilabetea egin du liburudendetan “Paseos por lagos, embalses y humedales” liburuak. Publikoak harrera gozoa egin dio Josean Gi-Garcia mendizaleak atondutako liburu honi. Orotara 36 dira Euskal Herriko urtegi, aintzira eta hezeguneetara joateko biltzen dituen proposamenak.

Euskal Herria liburu bilduman ohi den bezala, proposamen bakoitzak bost osagai ditu: aukeratutako hezegunearen aurkezpen orokorra, ibilbidearen deskribapen zehatza, fitxa teknikoa, mapa eta inguru horretako koloretako argazkiak.

Hauek dira liburuak dakartzan 36 proposamenak:

indice

Aurkibidean ikusten den bezala, txango eta ibilbide sorta horretan barietate handia dago, hala iraupen eta zailtasunari dagokienez nola helmugetan: paseo laburrak, hiru-lau orduko txangoak, Arabako urmael txikiak, mendietako urtegiak, zohikaztegiak, padurak, bartak edo lakuak.

This slideshow requires JavaScript.

“Paseos por lagos, embalses y humedales”, leku paregabeetara joateko gonbitea

Posted on 19/01/2018 by Euskal Herria bilduma

Erantzun

EH25_LAGUNAS_cubierta.indd

Euskal Herria Liburuak bildumak indartsu ekin dio urte berriari. Lehenengo izenburuak, “Paseos por lagos, embalses y humedales” liburuak alegia, leku zoragarri eta, askotan, bakartietara joateko gonbitea dakarkigu. Josean Gil-García Argote mendizale adituaren eskutik ura protagonista den natur eremu ahaztezinak bisitatuko ditugu.

Liburuak hiru ataletan sailkatu ditu proposamenak, iraupenaren eta desnibelaren arabera: paseoak (laburrak eta errazak), ibilbideak (zailagoak baina eragozpen handirik gabekoak) eta txangoak (bi eta lau ordu arteko zirkuitu biribilak). Atal bakoitzean hamabina proposamen dakar liburuak, Euskal Herrian zehar barreiatutakoak, Enkarterritik nafar Erriberaraino eta Aturritik Ebroraino.

Ibilbide guztiek ura daukate ardatz. Hezeguneak dira, hala naturalak (lakuak, zohikaztegiak, padurak…) nola jendeak eratutakoak (urtegiak, urmaelak…), batzuetan ondo ezagunak, beste batzuetan bakartiak. Guzti-guztiak liburu honetan ageri dira, deskribapen xeheekin, ibilbide zehatzekin, jakingarri, argazki eta mapekin ongi hornituta.

Josean Gil-García Argote ibilbide luzeko mendizale eta komunikatzailea da, herria goitik behera ibilitakoa. Sua Edizioak argitaletxearekin liburu gehiago plazaratuta dago, hala nola “Montes desde Gasteiz”, “Montes de Araba” edo Cuadernos Pirenaicos bildumako Valderejoko liburu eta mapa.

This slideshow requires JavaScript.

“Santuarios y monasterios”, artea, gastronomia, historia eta txangoak batu dituen liburua

Posted on 28/11/2017 by Euskal Herria bilduma

Erantzun

EH24_MONASTERIOS_azala_MTD 2017ko azken liburua plazaratu berri du Euskal Herria Liburuak bildumak eta zer esana emango du. “Santuarios y monasterios” dauka izenburu eta Alberto Muro gidari eta argazkilariak egin du. Berrehun orrialdeetan barrena santutegi eta komenturik garrantzitsuenak jorratu ditu, artearen, gastronomiaren, historiaren eta txango zoragarrien bila.

Liburu horretan goi mendietako santutegiak agertuko zaizkigu, Kodes, Leire, Urkiola edo Arantzazu kasu, paraje bakartietakoak, hala nola Angosto (Gaubea) edo Baratzagaitz (Urraulgoiti), monumentu multzoak osatzen dituztenak (La Oliva, Kexaa…) eta gure historian itzal luzea lortu dutenak, Aralarko San Migel, Belloc edo Orreaga adibidez.

Orrialdez orrialde gutizia gastronomikoak azalduko zaizkigu, direla Aguraingo klaratarren edo Elorrioko domingotarren gozokiak, direla Irantzu edo Oroko santutegietako jatetxeak. Eta atal guztietan inguruetatik txango ederra egiteko proposamena txertatu du egileak, bisita bakoitza behar bezala biribiltzeko.

Orotara, 30 proposamen, Alberto Muroren testu eta argazki dotorez hornituta. Ibilbide oparoko egile hau liburu aipagarriak argitaratuta dago Euskal Herria Liburuak bilduman, hala nola dagoeneko lau edizio eduki dituen “Vías verdes” edo aurton kaleratutako “Dólmenes, crómlech y menhires”, besteak beste.

This slideshow requires JavaScript.