Andia eta Etxauriko mendietako mapa dakar Suak

Posted on 07/12/2016 by Euskal Herria bilduma

mp-andia-etxauri-azaltxiki

Mapas Pireinaicos bildumako ale berri bi kaleratu ditu Sua Edizioak-ek, zein baino zein erakargarriagoa mendizaleentzat. Alde batetik, Andia mendigune osoa eta Etxauriko haitzak mapa batean bildu ditu Suak, herritar askoren gogoko alderdia alegia; eta, bestetik, Posets-Perdiguero aldeko mapa ere argitaratu du, Pirinioetako mendialde bisitatuenetako bat hain zuzen.

Andia eta Etxauriko maparen hedadura zein den jakiteko esango dugu ertzetan Arbizu, Irurtzun, Etxauri eta Dulantz mendia daudela. Beraz, lan kartografiko honen baitan ageri dira Beriain edo Sarbil bezalako tontor ospetsuak, Ollaran eta Goñerriko ibarrak, Erdi Aroko gazteluak (Gaztelu), Oskiateko haitzartea edo Euskal Herriko erdigune geografikoa.

Ohi den bezala, mapa Miguel Angulo kartografoari zor zaio eta 1:25.000 eskalan egin du. Atxikita daraman liburuxkan Gorka Lopez mendizale adituak diseinatutako 15 txango, igoera eta paseo bildu ditu.

Posets-Perdiguero

Mapas Pirenaicos bildumako bigarren nobedadea Llardana/Posets eta Perdiguerori eskainitakoa da. Alegia, Gistain eta Benasque ibarren arteko mendigune itzelari. Mapa honetan ere, egileak Miguel Angulo (kartografia) eta Gorka Lopez (liburuxkako 15 igoerak) dira.

Mapas Pirenaicos bildumako lau ale berri: Belagua, Anboto, Gorbeia eta Bidasoa

Posted on 14/09/2015 by Euskal Herria bilduma

Erantzun

Mapas Pirenaicos bilduma arrakastatsuak lau izenburu berri ekarri ditu azken asteetan liburudendetara. Mendizaleen kuttunak dira, gainera, mapa berriek islatu dituzten eremuak. Egin kontu: Belagua-Zuriza, Gorbeiako parke naturala, Anboto-Udalatx (Urkiolako parke naturala) eta Bidasoa-Bertiz eskualdea (Bertizko parke naturala barne).

Bilduma honetan ohi den bezala, Miguel Angulo adituak osatu ditu lau mapok. Erabat gaurkotuta daude, GPSrako egokiturik eta 1:25.000 eskalan aurkezturik, xehetasun guztiak jasotzeko. Besteak beste, eskualde horietako ibilbide seinaleztatu guztiak (SL, PR, GR…) islatu dituzte mapa hauek.

Gainera, mapek liburuxka ere badakarte. Sua Edizioak eta Gorka Lopez mendizale saiatuak adostu eta gasteiztar idazleak garatutako hamabost txango eta igoera aurkituko dituzue bertan, zein baino zein erakargarriago. Ibilbide horietako trackak Suaren webgunean aurkituko dituzue, deskargarako listo.

Dagoeneko hamalau dira Mapas Pirenaicos 1:25.000 bildumako tituluak. Horietako hamar Euskal Herriko eskualdeei dagozkie, ia denak mendizaletasunari estu lotutakoak: Iratiko Oihana, Baztan, Aizkorri-Aratz, Aralar, Urbasa eta Leire, orain aurkeztutako lau horiekin batera.

2014an agertu zenetik, bilduma horrek arrakasta handia lortu du mendizaleen artean. Hain da horrela ezen denbora gutxian mapa bilduma horretako titulu batzuk agortu eta berriz argitaratu behar izan diren.

Balaitus-Vignemale eta Maladeta-Aneto, Mapas Pireinacos ataleko ale berriak

Posted on 11/03/2015 by Euskal Herria bilduma

Erantzun

Sua Edizioak argitaletxeak Mapas Pirenaicos bildumako mapa berri bi kaleratu ditu, ohi bezala, 1:25.000 eskalan. Biak ala biak Pirinioetako erdialdeko natur eremuak dira, mendizaleek biziki maite dituzten horietakoak: Maladeta-Aneto eta Balaitus-Vignemale hain zuzen ere.

Mapa Miguel Angulo espezialistak egin du gaur egungo teknikarik aurreratuenak erabiliz. Gainera, GPSrako erreferentziak dakartza. Lan kartografiko hauetan seinaleztatutako ibilbide guztiak islatu dira, baita Gorka Lopezek Suarentzat bereziki atondutako hamabost ibilbideak ere. Ibilbide horiek (txangoak zein mendi igoerak) maparekin batera saltzen den liburuxkan ageri dira zehatz-mehatz azaldurik.

Beraz, mapetan jasota daude Aneto, Gran Facha, Vignemale, Maladeta edo Balaitus bezalako mendi handietarako igoerak, baina baita laku eta haitzarteetan barrena egiteko txangoak ere (Ibon de Cregüeña, Gorgas de Alba…). Gorka Lopezek diseinatutako ibilbide guztien trackak Suaren web gunetik jaitsi ahal izango dira laster batean.

Mapas Pirenaicos bilduma 2014an sortu zen. Mendizaleek harrera beroa egin diote. Hala Pirinioetako nola Euskal Herriko natur eremu garrantzitsunetako kartografia eskaintzen du, 1:25.000 eskalan.