Zeintzuk dira Euskal Herriko mendirik ederrenak?

Posted on 03/07/2024 by Euskal Herria bilduma

Roge Blasco kazetari ezagunak Txusma Perez Azacetari egin dio elkarrizketa Ascensiones a las montañas más bellas liburu berria hizpide hartuta. Goiko bideoan ikus dezakegu. Solasaldirako aukeratu duten parajea ezin egokiagoa da, tontor ederrak dituela ezker-eskuin: Mugarra, Alluitz, Untzillatx, Anboto… Horiek Txusma Perez Azacetaren zerrendan ageri dira. Eta zurean?

Segurutik, nork bere zerrenda egingo luke. Gailur batzuk aukeraketa gehientsuenetan agertuko dira; beste batzuk, berriz, banaka batzuenetan baino ez. Azken finean, kontua ez da liburukoak ote diren Euskal Herriko mendirik ederrenak ebaztea, Txusmak aukeratu dituen guztiak mendi eder-ederrak direla baizik. Eta diogunaren erakusgarri, lerroon azpian liburuko aurkibidea paratu dugu, mendi zerrenda osoarekin. Tartean ote dira zure kutunak?

EH63_montañas+bellas_SAREAK Deskargatu

Araban umeekin egiteko ibilbideak

Posted on 30/05/2024 by Euskal Herria bilduma

Erantzun

Araban umeekin egiteko moduko 35 ibilbide aukeratu, osatu eta aurkeztu ditu Gorka Lopez mendizale adituak. Herrialdeko eskualde guztietan barrena eramango gaitu, baso, tontor, ibai, arlo eta zelaiz zelai, beti ere zokondo zoragarrien bila. Txango eta igoera hauetan haurrek nahiz helduek hartuko dute gozatua. Hori da Umeekin egiteko ibilbideak. Araba liburuaren gakoa.

Horrelako liburua egiteak erronka handia du: etengabe aldatzen ari den eta eskakizun desberdinetako adinak dituzten umeen eta gazten mendi-beharrak asetzea. Hala ere, adina alde batera utzita, ohiturak eta menditik ibiltzeko abileziak izango dira erabakigarriak txikienek zer ibilbide mota egin ditzaketen argitzeko.

Arabako 35 txango hauek errazenetik zailenera daude antolatuta, eta helduon esku geratzen da asmatzea, denborak, altitudeak eta desnibelak ikusita, zein den aproposena etxeko txikienekin egiteko. Egileak beste faktore batzuk ere kontutan hartu ditu, hala nola, zoru-mota, zoru hori nola dagoen egoera meteorologikoaren arabera (hezetasuna, adibidez), pasabide zorabiagarriak, igoera gogorrak edo bestelako oztopoak…, ibilbiderik egokiena aukeratzeko ezaugarri lagungarriak, alegia.

Hori esanda, dena prest dago, beraz, natura ezagutzeko eta Arabako zenbait kobazulo, baseliza, belardi, aintzira eta gailurrez gozatzeko abenturarako. Ibilbide bakoitzak haurren jakin-mina piztuko duen informazio interesgarria duen laukitxoa darama.

Hiru dira, dagoeneko, umeekin egiteko proposamenak dakartzaten liburuak: Arabakoaz gain, Umeekin egiteko ibilbideak. Gipuzkoa eta, gaztelaniaz, Rutas con niños por Navarra.

“Ascensiones a las montañas más bellas”, mendi ederrenak zain ditugu

Posted on 23/05/2024 by Euskal Herria bilduma

Anbotoko erpina, Udalatxetik ikusita. Horrela tentatzen gaitu Ascensiones a las montañas más bellas liburuak, Euskal Herria bildumako ale berriak. Eta argazkia tentagarria izan bada, eder-ederra, botak jantzi eta aitaren batean bertara joateko gogoa pizten duen horietakoa. Nork esango dio ezetz paraje horietara igotzeari? Bada, zalantzarik gabe, beste horrenbeste gertatuko zaigu Txusma Pérez Azacetak osatu duen bildumako gainerako tontorrekin.

Izan ere, egileak bere mendi ederrenen zerrenda osatu du eta horietara igotzeko planak bilatu ditu. Zerrendan badira ezinbesteko mendiak, Orhi, Anboto, Aratz, Larrunarri/Txindoki edo Iparla kasu, baina baita hain ezagunak ez direnak ere. Horra hor, bestela, Soratxipi, Soila edo Pagazelai. Badira bimilako harroak, Ezkaurre eta Arlas esaterako, baina mendi apalak ere ez dira falta, oinak itsasoan dituen Ogoño ikusgarria kasu.

Argazki ederrez egokituta dator liburua, baita jakingarri ugariz hornituta ere. Eta Ramon Portilla alpinistak munduko mendi ederrenen bere aukeraketa erantsi dio, hango eta hemengoekin gozatua har dezagun.

Txusma Pérez Azaceta mendizale aditua da, zazpi libururen egile. Bilduma honetan arrakasta handiko liburuak plazaratu ditu, hala nola Rutas circulares fáciles, Las otras cumbres edo Cañadas y senderos de pastores.