“Guía de los montes de Navarra”, Nafarroako mendi guztiak liburu batean

Nafarroako mendien biblia esaten diote, eta badute horretarako arrazoi sendorik. “Guía de los montes de Navarra” (Sua Edizioak, 2019) liburu mamitsuaren laugarren edizioak 231 igoera eta 522 gailur bildu ditu bere orrialdeetan. Kopuru ikaragarria, egileak, Juan Mari Feliu mendizale adituak alegia, bere gain hartu duen lanaren neurria ematen diguna. Aurreko edizioa ikuskatu, zuzendu eta handitu zuen eta horretarako liburuan ageri diren tontor guztietara igo zen.

Nafarroak, bere zabalean, mota guztietako mendiak eskaintzen ditu, hasi Hiru Erregeen Mahai sabai subalpetarretik eta buka Bardeetako muino bakartietan, Higa edo Beriain gisako mendi lerdenak, Orhi bezalako mitoak eta isurialde atlantikoa zimurtzen duten mendilerro apalak ahantzi gabe. Igoera batzuk goizpasa atseginean geldituko dira; beste batzuk, berriz, egun osoa eta ahalegin handia eskatuko digute.

Guzti-guztiak, tartean direla Euskal Herriko Mendien Katalogoko Nafarroako 215 gailurrak, liburu honetan ageri dira, nola igo egoki azalduta. Aldean mapa txiki bat eta, sarritan, argazkia edukiko dute. Lerroon azpiko estekan mendi guztien zerrenda eta Baztan aldeko igoera sorta bat utzi dizuegu. Ondo ibili!

“Cumbres anejas”, hurrengo urratsa non eman

Euskal Herria bildumako “Cumbres anejas” liburuak aukera sorta zabaltzea du helburu. Euskal Herritik hurrean dauden mendi ederrak aukeratu eta jorratu dituzte Javi Urrutia eta Rafa Bartolomé mendizale adituek. Gailur harro, bitxi eta erakargarriak dira, Kantabria, Burgos, Errioxa, Soria, Huesca eta Bearno eskualdeetako mugazain prestuak. Han daude, guk harainoko urratsa noiz emango.

Tentagarria da liburu hau mendizalearentzat. Bertan aurkituko ditu Castro Valnera bezalako klasikoak, Kantabria eta Burgos arteko mugan, Zalama zelatatzen; edo Burgosko Tobalina ibarraren buru dagoen Umión lerdena, eta Ebro gainean erraldoi ageri den Moncayo harroa, euskalduntzat jo ohi dugun Auñamendi mitikoa… Orotara 57 mendi igoera proposatu dituzte eta lerroon azpian utzi dugun estekan sakatuta gailur horien zerrenda osoa deskarga daiteke. Aurkibidearekin batera, ibilbide bi paratu ditugu, tentazioan sartu nahi duzuenentzat. Ondo ibili!

“Rutas circulares fáciles”, Euskal Herriko mendiak ezagutzeko gonbita

EH40_Rutas_circulares_fáciles

Udari etekina atera nahi dionak Euskal Herria Liburuak bildumako ale berrian aurkituko du nondik nora jo. Txusma Perez Azaceta mendizale adituaren eskutik “Rutas circulares fáciles” liburua dator, zeinak 45 ibilbide zirkular bildu dituen, denak zailtasun teknikorik edo bestelako eragozpenik gabekoak eta, jakina, denak Euskal Herrian barrena.

Izan ere, txango eta igoera hauek Euskal Herriko mendien, ibarren, oihanen eta haitzarteen bila abiatzen dira. Basoetan ibili nahi duenak Soila, Itxina, Artikutza edo Bertizko ibilbideak aukera ditzake. Itsasoaren kresal usainaz biziberritu gura duenak, berriz, kostaldeko talaia ederrak dauzka esku-eskura: Ogoño, Ermua (Gorliz), Pagoeta edo Mitxitxola (Jaizkibel). Zelai eta muinoak kateatu nahi izan ezkero, Harana ibarra, Lokizko ordekak, Puron ibaiko arroila, Saldropoko hezegunea edo are Oriol, Txulato edo Montenegro mendiak bisita genitzake. Eta uda tontor garaienetara igotzeko baliatu nahi badugu, egunak luzeagoak eta argia indartsuagoa dela probestuz, liburuak zerrenda ederra dakar aldean, hala klasikoak (Toloño, Orhi, Artzanburu, Lakhura) nola bakartiagoak (Imeleku, Unamendi, Bachicabo, Elimendi).

Egilea, Txusma Perez Azaceta, Euskal Herria osoa goitik behera eta hegotik iparrera ibilita dago. Euskal mendiei buruzko liburu andana argitaratu du eta horietako batzuk, honez gero, klasiko hutsak dira.

Lerroon azpiko estekan, liburuaren aurkibidea, sarrera eta ibilbide bat utzi dizuegu, dastaketa egin nahi baduzue. Ondo ibili!

EH40_sareak