Guía de huellas, naturan barrena ibiltzeko bidaide ezinhobea

Posted on 11/11/2015 by Euskal Herria bilduma

Euskal Herria bildumako liburu berriak zer esana emango du. Baita zer ikusi eta zer gozatu ere. “Guía de huellas, señales y rastros de animales” gidaliburu berria tresna ezibestekoa izango da natura maite dugunn guztiontzat, mendian barrena goazenean animalien ibilien lorratz eta aztarnak ezagutzen eta ulertzen irakatsiko digu eta.

Liburuak sei atal dauzka. Horietan animalien joan-etorrien arrastoak jorratu ditu, baita elikadurarenak (gorotzak, jan izanaren lorratzak…)eta bestelako kontuak ere: habiak eta gordelekuak, jokaeren zantzuak eta gorpuzkiak. Deskribapen zehatzak ez ezik, testuarekin batera ulermena eta alderaketak erraztuko dituzten argazki eta marrazki lagungarriak dakartza.

Animalia espeziei dagokienez, Euskal Herrikoak besterik ez ditu landu, nahiz eta kasu batzuetan oso presentzia urria eduki, hartza kasu. Ugaztun handiekin (orein, hartz eta sarrioak) hasi eta karraskari txikiekin amaiatu, hegaztiak edo klasiko handiak (basurdea, otsoa) ahaztu barik.

Lan bikain honen egilea Jonathan Rubines gasteiztarra da. Biologo ikasketaz, ingurugiro aholkulari gisa egiten du lan baina, batez ere, natura maite du.

Sei ideia bikain: Euskal Herria Liburuak bildumaren proposamenak 2016rako

Posted on 11/11/2015 by Euskal Herria bilduma

Erantzun

Argazkilariak, mendizaleak eta kazetariak lanean ari dira dagoeneko Euskal Herria Liburuak bildumaren 2016ko liburuak prestatzen. Sei ideia bikain aukeratu ditugu gure herria begi berriz ikusteko, bazter eder ahaztuak berpizteko eta kostaldetik zein ordokietatik eta menditik zein harresi zaharretatik gozatua har dezagun. Hauek izango dira 2016ko sei liburuak:

1 Pueblos amurallados. Hektor Ortega (urtarrila-otsaila). Behiala, euskal hiribildu gehienak harresiz babestuta egon ziren. Gerora galdu egin ziren, suntsiturik, desitxuraturik edo ahazturik. Orain, argitara ateratzen ari dira berriro. Liburu honeki gorde diren guztiak bisitatuko ditu, baita ondare ikusgarri hori bisitatzeko ibilbideak proposatu ere.

2 Los mejores paseos por la costa vasca. Santiago Yaniz (martxoa-apirila). Argazkilari eta kazetari ezaguna da Santiago Yaniz. Haren eskutik joango gara euskal kostaldean barrena, lekurik ederrenen bila. Batzuetan natura agertuko zaigu lerden, besteetan pertsonek egindakoa ematen dio balioa. Batzuek eta besteek, denek sorginduko gaituzte.

3 Nutrición, seguridad y salud. Joana García eta Antxon Burcio (maiatza-ekaina). Mendian ibiltzeko, txangoak egiteko, kirolean jarduteko, behar-beharrezkoa da segurtasuna, osasuna eta elikadura zaintzea. Joana García elikaduran eta mendian adituak eta Antxon Burcio mendizaleak errazago jarriko digute.

4 Rincones que te sorprenderán. Alberto Muro (uztaila-abuztua). Euskal Herriak badauzka, oraindik ere, bisitaria harri eta zur lagatzeko moduko lekuak. Txango sorta honek argi eta garbi erakutsiko digu. Bidaia kitzikagarri honetan aditu handi bat hartuko dugu gidari, Alberto Muro argazkilari eta kazetaria alegia.

5 Excursiones a lugares históricos. Hektor Ortega (iraila-urria). Historiak bere hatzamarrekin leku asko markatu ditu Euskal Herrian. Proposamen sorta honekin gure herria eta gure paisaiak ezagutuko ditugu, iraganaldiko pasarterik interesgarrienen bila.

6 Llanuras. Senderismo sin desniveles. Santiago Yaniz (azaroa-abendua). Ez da derrigorra maldan gora ibiltzea Euskal Herrian barrena gozatzeko. Santiago Yaniz argazkilari eta kazetariak horrela erakutsikok digu. Liburu honetan hamaika txango proposatuko dizkigu aldaparik gabeko bideetatik leku zoragarrietara heltzeko.

El ecologista en casa, etxean eduki beharreko gidaliburua

Posted on 01/09/2015 by Euskal Herria bilduma

Erantzun

Udak ekarri digun “La guía práctica del ecologista en casa” liburua ezinbestekoa izango da biodibertsitateari eusteko beharrizana gure baitan sentitzen dugunontzat. Euskal Herria Liburuak bildumako ale berriak informazio zehatza eta eragingarria dakar gure eguneroko ohiturak ingurugiroarekiko begirunerantz aldatzeko. Aholku sorta erraza eta praktikoa da, azken finean denon esku dago eta.

Liburuak praktikara eraman nahi du ingurugiroa zaintzeko gizartean antzematen den ardura. Grina hori gero eta handiagoa da, baina gauzatzeko bideak behar ditu. Helburu horrekin gidaliburu honek hamaika aholku aletu ditu, eguneroko bizimoduan eragiteko, hala etxean (garbiketa, tresna elektrikoak, energia gutxiago gastatzea, jantziak, norberaren atonketa, brikolajea, erreziklajea…) nola bulegoan edo ikastetxeetan. Gidaliburuak baditu, halaber, kontsumo ohiturak eta aisialdiko jarduerak egokiago egiteko proposamenak.

Egilea Cesar Barba dugu, ibilbide luzeko kazetaria eta Sua argitaletxeko zein El Mundo de los Pirineos aldizkariko aspaldiko kolaboratzailea.