Gorobel mendilerroko mapa berria kalean dago

Posted on by
Erantzun

Euskal Herriko mendilerro berezienetako baten mapa plazaratu berri du Sua Edizioak-ek 1:25.000 eskalan: Gorobel [Sálvada]. Gaztelako mesetako ertza Aiaraldeko ibarren gainean amiltzen den eremua paradisu naturala da, hala fauna nola landaredi aldetik altxor ugariren gordeleku, paisaiaz, ikuspegiz eta mendiz ederto hornituta dagoela ahaztu barik.

Mapa berriak Anguloko mendatetik (mendebaldean) Goiuriko ur-jauzirainoko (Urkabustaiz, ekialdean) tartea bildu du. Beraz, bertan ageri dira, besteak beste, Nerbioiko ur-jauzia eta Delikako arroila, Arrastaria ibar osoa (Delikaz gain, Tertanga, Artomaña eta Aloria), Urduña, Amurrio eta Aiarako hegoaldea, baita Burgosko Losa eta Mena ibarretako zenbait herri ere. Mendiei dagokienez, Urieta, Aro, Eskutxi, Ungino, Iturrigorri, Bedarbide, Txarlazo, Beratza/San Pedro eta Babio, ageri dira, besteak beste.

Mapak mendizaleen gustuko ibilbide proposamen sorta bat dakar: zazpi txango, lau zeharkaldi eta hamasei igoera. Mapa honetan goiz-pasa ederrak egiteko leku asko dago, Maroñoko urtegia, Santiago mendiko begiratokia eta Goiuriko ur-jauzia, esaterako.

Mapas Pirenaicos sailean ohi den bezala, Miguel Angulo kartografo adituak ondu du Gorobel mendilerroko mapa hau. Honekin batera, Andiako mendilerroko mapa berrargitaratu du Sua Edizioak-ek, eta Pirinioetako lau mapa gehiago plazaratu: Berguedà eta Alta Ribagorça (Katalunia) eta Bielsa eta Valle de Tena (Aragoi).

“Euskal Herria. 56 ibilbide xendazaleentzat”, gure herria goitik behera ibiltzeko makulua

Posted on by
Erantzun

Liburu ederra ondu du Mikel Arrizabalagak Euskal Herriko paraje sorta eder bat guztion esku jartzeko. Euskal Herria. 56 ibilbide xendazaleentzat liburu berriak zazpi herrialdeetan barrena eramango gaitu mendi, oihan, ibai, haitzarte, begiratoki, ur-jauzi eta galtzada zaharren bila.

Azaletik bertatik ematen digu abisua, Atxarre menditik Oka ibaiaren bokale paregabea erakusten duen argazkiaren bidez: liburu honek Euskal Herriko leku zoragarriak erakutsiko dizkigu, ezker-eskuin, ipar eta hego, paisaia mota asko daudelako zazpi herrialdeetan eta denetan ederrik dago. Orrialdeotan zain ditugu itsasaldeko talaiarik ederrenak, oihan sarriak, ibaiak eta aintzirak, ur-jauziak eta padurak, tontorrak eta haitzarteak, gazteluak, ermitak eta megalitoak.

Proposamen guztiak xendazaleentzat pentsatuta daude. Alegia, desnibel gutxiko ibilbideak dira, eta ez oso luzeak. Ibilbideen deskribapenei argazki ederrak, jakingarri praktikoak eta mapa bana erantsi zaizkie, arazorik gabe egin ahal izateko.

Mikel Arrizabalaga mendizale aditua da eta zazpi hedabidetan kolaboratu izan du. Sua Edizioak-ekin, besteak beste, Aiako Harria parke naturala eta Jaizkibel liburua plazaratuta dago.

Liburuko orrialdeetan kuku bat egin nahi dutenentzat, lerroon azpian lagin bat utzi dugu. Ondo ibili!

SND_EH56ibilbide_sareakDownload

“Edurne Pasaban”, mendi ibilbide kitzikigarriaren komikia

Posted on by
Erantzun

Euskal Herriko mendizaletasunean, Himalaiako mendiei dagokienez batez ere, erreferentzia nagusietako bat Edurne Pasaban izan da, munduko 14 zortzimilakoak igo zituen lehen emakumea. Edurne komikian, bere kirol ibilbidea modu kitzikagarrian ezagutuko dugu, berarekin batera ibiliko baikara tontor helezinetarako bidean.

Bide hura zelan hasi eta norekin egin zuen topo ere jakingo dugu. Agertuko dira, jakina, beste emakume batzuk, hala nola, Pili Ganuza, Amaia Aranzabal, Miriam Garcia Pascual, Gerlinde Kaltenbruner, baita gizonak ere: Juanito Oiarzabal, Juan Vallejo, Mikel Zabalza…… Eta berarekin batera, elurrak hartuko du protagonismoa. Komikiaren ardatza izango da, bere izenarekin eta bizitzarekin lotura argia baitu.

Komikiaren gidoia Ramon Olasagasti kazetari adituari zor zaio. Komikigintzaz, berriz, César Llaguno, Felipe H. Navarro eta Pedro Villarejo arduratu dira. Sua Edizioak argitaletxearen eta Mendi Film festibalaren arteko edizioa da, eta euskal mendizaletasunaren mugarriak biltzea helburu duen bildumaren laugarren titulua da. Aurrekoak honako hauek izan dira: Everest. Herri oso bat gailurrean; Iñurrategi anaiak. Mendiari bihotz emanak;  eta Andres Espinosa. Bakarrik eta libre.

Goi-mailako sokada horrek emaitza paregabeen gailurrera eraman gaitu. Lerroon azpian, lagin bat utzi dugu, esaten dugunaren erakusgarri:

Edurne_SAREAKDeskargatu