“Rutas para fotografiar la naturaleza”, natura eta argazkiak batzen dituen liburua

Posted on 26/11/2024 by Euskal Herria bilduma

Euskal Herria bildumako liburu berria begietatik sartuko zaigu, dudarik gabe, baina azala ez ezik, mamia ere badu, eta ez nolanahikoa. Xabier Sukunza mendizale argazkilariak egin digun gonbita guztioi balio zaigu, baita argazkiak segapotoz ere egiten ez dutenei ere. Rutas para fotografiar la naturaleza liburuan 22 ibilbide proposatu ditu mendiaz eta naturaz gozatzeko eta argazkigintzan trebatzeko.

Liburuak bost atal nagusi ditu: mendiko ibilbideak (Ioar, Udalatx, Lokiz…), itsasaldekoak (Gipuzkoako flyscha, Gaztelugatxe, Mundaka…), oihan eta ur-jauzietakoak (Iruerreka, Belaustegi, Urbasa, Oieleku…) ordoki eta mortuak (Baigorri, Bardea…) eta gau bibakak (Zemeto eta Auñamendi). Ibilbideak deskribatzeaz gain, argazkiak non, noiz eta zelan egin proposatu du egileak. Beste atal batean, gainera, argazkigintaren oinarrizko jakingarriak azaldu ditu.

Jakina, liburuan ageri dira Sukunzak irakurleei proposatzen dizkien argazkietako batzuk. Oro har, liburuko orrialdeak pasa ahala gozatu ederra hartuko dugu, pasaia argazki sorta zoragarriekin.

Xabier Sukunza (Lizarra, 1995) mendizalea eta argazkilaria da. El Mundo de los Pirineoseko 2022ko egutegiko argazkien egilea da. Aurten ere Rutas para vivaquear y fotografiar estrellas. Pirineo Occidental y Central liburua plazaratu du.

“Lau elementuen erronka”, Pou anaiak beren gorenean

Posted on 20/11/2024 by Euskal Herria bilduma

Erantzun

Gutxitan bezala, liburu honen azalak ezin hobeto islatzen du bere barrualdeko mamia. Hormatzar ezinezkotik gora doaz anaiak, bihotz eta arima ekinean, amildegian dingilizka, helburu helezinaren bila. Horrelakoa da Lau elementuen erronka, Iker eta Eneko Pou eskalatzaileen azken urteotako jarduna bildu duen liburua, goi-mendia eta abentura sinesgaitzak barra-barra, gasteiztar eskalatzaileon bizitzetako ezinbesteko osagaiak dira eta.

Aupa Pou! arrakastatsuan ireki zuten bidetik jarraitu dute bigarren liburu honetan. Ura, sua, airea eta lurra dira lau elementuak eta Pou anaiek eurei lotutako erronkei ekin diete azken urteotan munduko bazter urrunetan: Himalaia, Santo Tomé, Andeetako mendietan… Eskalada gaitzak, ez sinesteko modukoak, natura basati eta, sarritan, kupidagabe baten erdian.

Liburuan ibilera harrigarri horien kontakizuna jaso dute, argazki zoragarrien laguntzaz. Bideoetarako estekak ere tartekatu dituzte, egindakoaren neurria modu are konpletoagoan har dezagun. Emaitza bikaina da, goi-mendiko bizimodua bere horretan islatuta 280 orrialdetan barrena. Eta hori guztia gutxi balitz, eskalada munduko beste anaia ospetsu batzuek, Thomas eta Alexander Huberrek alegia, idatzi dute hitzaurrea.

Nahi baduzue lehenengo begiratua eman, hemen daukazue:

POU_4elementuakEUSK_sareak Deskargatu

“Castillos y palacios”, gaztelu eta jauregien ondare harrigarria

Posted on 30/09/2024 by Euskal Herria bilduma

Erantzun

Gutako zenbatek daki lerro hauen gainean ageri den gaztelu ederraren berri? Eta nor egon da bertan? Euskal Herria bildumako liburu berriak gaztelu eta jauregi sorta xarmagarri eta harrigarria jarri digu begien aurrean. Izan ere, ondare horretako zati handi bat, zergatik ez dakigula, oraindik ere erabat ezezaguna da euskal herritar askorentzat.

Berrehun orrialdeetan, Castillos y palacios. Planes por sus alrededores liburuak gotorleku horien bilakaera jaso du, hasi Erdi Aroko errege eta jaunen gazteluetatik eta XX. mendearen hasierako forteekin amaitu. Egileak, Javi Pascualek, gaztelu bakoitzaren ibilbide historikoa marraztu, gaur egungo bisitaren kronika egin eta inguruetan mendi, natura edo kultura arloko txango edo planak proposatu ditu.

Orotara mila urtean eraikitako hogeita hiru gaztelu bisitatu ditu, zazpi herrialdeetan barrena. Liburuak Erdi Aroko gazteluak dakartza (Maule, Baiona, Cortes edo Donostia), Aro Modernoko zitadelak (Donibane Garazi, Iruñea), XIX. mendeko gotorleku historizistak (Butroe, Abadia) eta XX. mende hasieran amaitu zuten Oiartzungo trintxera eremuko forte sorta. Alegia milagarren urtearen bueltan abiatu eta 1900 urte ingururaino helduko gara gaztelurik gaztelu ibiliz. Gainera, eranskin bat ere badakar eskutada bat gaztelu gehiagorekin eta Artaxoako Zerkoaren aipamen bereziarekin.

Hau Javi Pascual Otaloraren bosgarren liburua da, denak Euskal Herria bildumanaren baitan. Hona hemen aurrekoaka: La gran ruta de los faros (2023), Excursiones por riberas de ríos (2021), Pueblos de Araba con encanto (2020) y Pueblos de Bizkaia con encanto (2019).