Liburu bete elkartasuna Himalayako bizilagunentzat

Posted on 24/05/2018 by Euskal Herria bilduma

SOS Himalaya

Sua Edizioak argitaletxeak “SOS Himalaya, relatos solidarios” liburua kaleratu berri du. Hogeita hamar kontakizunez osatuta dator, beste horrenbeste alpinistek goi mendi haietan izandako bizipenez gainezka. Hala ere, liburu honen berezitasuna bere elkartasun gogoari zor zaio: egile guztiek dagozkien eskubideak eman ditutzte Himalayako ibar batean ospitale baten eraikuntza fintzantzatzeko. Argitaletxeak ere bere ekarpena egin du: egile eskubideak ez ezik, liburu honetako etekinak proiektu horretara bideratuko dira.

Liburua Iñaki Ochoa de Olza alpinistaren heriotzaren hamargarren urteurrenean kaleratu da. 2008ko maiatzean hil zen, Annapurnako magaletan. Bera erreskatatzeko ahaleginak elkartasun uholdea piztu zuen nafar mendizalea ezagutzen zutenen artean, baina ez zen nahikoa izan. Orain beste ahalegin bat sortu da, elkartasuna ikur, Iñakiren izena daraman fundazioaren bidez –Fundación Iñaki Ochoa de Olza SOS Himalaya- Nepalen, Makalu 5 ibarrean, ospitalea martxan jartzen laguntzeko.

Liburuaren hitzaurreak Sherpa Pasang, Migma Dorjee Sherpa eta Juan Manuel Sotillosi zor zaizkie. Ondoren, 30 kontakizun, Himalayako argazki itzelekin tartekaturik. Ondoko hauek dira testuen egileak: Koldo Aldaz, Sebastián Alvaro, Josep Manuel Anglada, Xavi Arias, Gregorio Ariz, Josu Bereziartua, Oscar Cadiach, Jordi Corominas, Kike de Pablo, Oscar Gogorza, Alberto Iñurrategi, Kilian Jornet, Chus Lago, Ferrán Latorre, Juanra Madariaga, Nives Meroi, Juanito Oiarzabal, Edurne Pasaban, Carlos Pauner, Jordi Pons, Ramón Portilla, Eneko eta Iker Pou anaiak, Juanjo San Sebastián, Araceli Segarra, Carlos Suarez, Jordi Tosas, Alex Txikon, Felipe Uriarte, Silvia Vidal, Julio Villar eta Mikel Zabalza.

Horien guztien ahaleginaren eta elkartasunaren emaitza da liburu hau. Orain irakurleon txanda da. Gure esku dago ametsa gauzatzea.

Aiako Harria eta Jaizkibel mapa batean bildu ditu Suak

Posted on 23/04/2018 by Euskal Herria bilduma

Erantzun

MP_AiakoHarria_Jaizkibel

Egunotan kaleratu du Sua argitaletxeak Aiako Harria eta Jaizkibel aldeei dagokien mapa berria. Mapas Pirenaicos bildumaren barruan agertu da. Aiako Harria natura-parkea 6.000 hektareako eremu babestua da, granitozko hiru gailur lerdenen inguruan eratua. Jaizkibel, ordea, itsaslabar eremu luze eta bakartia da, bere horretan iraun duena gaur arte. Horrelako gutxi daude euskal kostaldean.

Kartografia 1:25.000 eskalan atera du Suak eta Miguel Angulo adituari zor zaio. Maparekin batera liburuxka dakar, inguru horietako ibilbide markadun guztien berri emateaz gain hamabost bat igoera eta txango proposatzen duena.

Mapa honen barruan Aiako Harria natura-parkea ageri da, baita hegoalderago dagoen alderdia ere (Artikutzako urtegia, Kopako Harria, Izu mendia…). Eta iparreko alderdian Txingudiko badia bere osoan dakar eta, mendebalderago, Jaizkibelgo eremua, Hondarribitik Pasai Donibaneraino. Leiho txiki batean Pasai San Pedro eta Donostia arteko itsasertza ere ageri da, Ulia mendiaren inguruak alegia.

Mapa dakarren liburuxkan mapan marraztutako ibilbide markadun guztien deskribapen zehatza aurkituko dugu. Mikel Arrizabalaga mendizale adituak jaso ditu eta, gainera, Jaizkibel eta Aiako Harriko lekurik ezaugarrienetan barrena ibiltzeko 15 txango eta igoera proposatu dizkigu. Aukera bikaina, beraz, Euskal Herriko leku zoragarrienetako batzuetan barrena ibiltzeko eta gozatzeko.

Gorbeiako natura-parkea, 24 ibilbidetan

Posted on 16/04/2018 by Euskal Herria bilduma

Erantzun

This slideshow requires JavaScript.

Alberto Murok atondu eta Euskal Herria liburuak bildumak argitaratu duen “Parque Natural de Gorbeia” liburuak 24 ibilbide dakartza eremu zoragarri horretan barrena ibiltzeko eta gozatzeko. Egun bakar baten egiteko moduko txangoak eta igoerak dira, baina elkar lotu litezke nahieran, zeharkaldi itzelak egin ahal izateko.

Mendigunearen hegoaldean Oketa mendiko pagadietan murgiltzen diren ibilbideak nabarmendu litezke, baina baita Gorbeiako gurutzeraino bide desberdinetatik igotzen direnak ere, Baias ibaiari segika abiatzen direnak edo Altubeko oihan zabalen gerizan ibiltzen direnak ahaztu gabe.

Ipar isurialdetik, ostera, Gorbeiako tontorrerainoko igoerez gain, aukeratutako ibilaldi sorta honetan Arnoko mendiak eta Sintxitako troka bezalako leku xarmagarriak daude. Atal berezia eman dio egileak, hala merezi duelako, Itxinako mendigune harrigarriari. Haren inguruan edo barrenean sei ibilbide proposatu dizkigu.

Hona hemen “Parque natural de Gorbeia” liburuak dakarren ibibide zerrenda osoa, natura-parkeko mapan dagokien lekuan jarrita. Egin klik irudiaren gainean handiago ikusteko.