“Parque natural y sierra de Aralar”, mendira jotzeko gonbit tentagarria

Posted on 27/05/2019 by Euskal Herria bilduma

EH33_ARALAR(cubierta).indd

“Parque natural y sierra de Aralar”, Euskal Herria bildumako liburu berria alegia, eskuetan hartzea nahikoa da mendira jotzeko tentazio kitzikagarria sentitzeko. Zehatzago esanda, Gipuzkoa eta Nafarroa artean zabaltzen den mendigune horretako edozein mendira, gure herriko paisaien eta kultur ondasunen arragoa baitira. Tentatuko gaituzte inguru hartako leku zoragarrietara igotzeko proposamenek eta tokian tokiko edertasun menderagaitza fideltsasun osoz islatu duten argazki zoragarriek.

Liburuan hogeitahiru proposamen aurkituko ditugu, mendigune osoan zehar ibiltzeko, hala Gipuzkoako alderdian (parke natural gisa sailkatuta dagoena) nola Nafarroakoan. Igoerak, zeharkaldiak, txangoak eta ibilbide laburrak dira, beti ere Aralarko zokondo ederren bila. Larre zabalak, gailur harroak, hariztiak, pagadiak, artadiak, ur-jauziak, leize eta eremu karstikoak… Aralar zertan den erakutsiko diguten proposamen horietan lurraren taupadak sentituko ditugu.

Egilea, Juanjo Garbizu, mendizale porrokatua da. Arlo honetaz duen eskarmentua eta jakinduria liburu, gida eta youtuben daukan kanalaren bidez zabaldu du.

Bilduma honetan ohi den bezala, proposamen guztiak zehazki deskribatuta ageri dira, jakingarriz egoki hornituta eta aldean mapa eta argazki dotoreak ekartzen dituzte. Mendira jotzeko tentaldiari nork eutsiko?

This slideshow requires JavaScript.

“Rutas por el Pirineo Vasco”, gure mendi handiak ezagutzeko liburua

Posted on 25/04/2019 by Euskal Herria bilduma

Erantzun

EH32_PIRI VASCO

Euskal Herriaren baitan Pirinieotako zati txiki bat besterik ez badago ere, hura da gure mendilerro nagusia, gure mendiak goi mailara iristen diren lekua. Jaizkibelen hasi eta Hiru Erregeen Mahaiaraino, zazpi paisaia eta kultur ondare joria aurkituko dugu etenik gabe. Geografia horretan barrena ibiltzera gonbidatzen gaitu Gorka Lopez mendizale adituaren “Rutas por el Pirineo Vasco” liburuak. Orotara 29 ibilbide osatu ditu bazterrok ezagutu, gozatu eta maita ditzagun.

Liburuak hiru atal nagusi dakartza, Pirinioetako euskal lurralde bakoitzarentzat bana. Lehenengo, itsas aldeko ibarrak, Baztan eta Baigorri alderaino zabaltzen direnak. Ondoren, erdialdeko haranak, Kintoa eta Iratiko oihan ospetsuen artean kokatuta daudenak alegia. Azkenik, ekialdeko ibarrak, Orhin hasi eta Hiru Erregeen Mahaiaraino iristen direnak, goi mailako mendiak. Horiez gain, liburuko hiru proposamen Pirinioz hegoalderago dauden hiru menditara igotzen dira.

Gure liburuetan ohi den bezala, ibilbide bakoitzak deskripaben zehatza, mapa indikatiboa, jakingarri praktikoak eta argazkiak dakartza. Horiez gain, igoerari lotutako gai bat jorratzen da, labur. Xoldoko Gainatik Auñamendira, anitz dira liburuko aurkibidean ageri diren mendi handiak: Bianditz, Alkaxuri, Iparla, Adartza, Orhi, Keleta, Kartxela, Lakhura… Zeharkaldiak ere badira, Izaba eta Linzaren artekoa esate baterako, edo Orreagatik Orbaizetako Olara doana.

Egilea, Gorka Lopez, mendizalea, idazlea eta argazkilaria da. Baina, horrez gain, goitik behera ezagutzen ditu Pirinioak. Zazpi artikulu, liburu, bidaia gidaliburu eta mapa argitaratu ditu gure mendilerro nagusiaren gainean.

This slideshow requires JavaScript.

30 urtez Suako zuzendari izan den Javier Pascual saritu du Mendizale Federazioak

Posted on 19/02/2019 by Euskal Herria bilduma

Erantzun

Mendizaletasun gala 2019_sariak-6

Jose Ramon Alonso, Federazioko presidentea, Javier Pascual eta Mikel Arrizabalaga.

Javier Pascualek, azken 30 urteotan Sua argitaletxeko zuzendaria izan denak alegia, “Euskal mendizaletasunaren adiskideak” saria jaso zuen joan den ostiralean, otsailaren 15ean, Elorrion Euskal Mendizale Federazioak egin zuen urteko sarien ekitaldian.

Mikel Arrizabalaga idazle eta mendizaleak eman zion saria. Hauexek izan ziren haren hitzak:

“Tibertar esaera zahar batek halaxe dio: ‘Azkar joan nahi baduzu, bakarrik ibili; urrutira nahi baduzu, lagunekin joan’.

Eta horixe da gure hurrengo sarituaren merituetako bat. Taldean, elkarlanean, auzolanean 30 urteko ibilbide bikaina burutu du Sua argitaletxean zuzendari moduan, mendiarekin, eta batik bat Euskal Herriko mendiekin, lotura duten era guztietako argitalpenak sortu, editatu eta zabalduz: liburuak, mapak, aldizkariak, gidak eta abar luze bat. Euskal Herriko zein beste leku askotako txoko eta inguruak modu ezin ederragoan erakutsi dizkigute urte hauetan guztietan, gure mendiak eta herriak, gure kultura eta usadio zaharrak, gure jendea eta paisaiak biluztu eta gure gozamenerako eskainiz.

Garai hauetan, non alderdi digitalak gure eguneroko bizitzan geroz eta presentzia handiagoa duen (ia erabatekoa ez esateagatik), paper euskarrian argitaratzen jarraitzea bada meritua. Merkatu digital honetan bizirik irautea ez da lan erraza, eta zalantzarik gabe, ahalegin hori Sua argitaletxearen zuzendariari ere zor diogu.

Horregatik, gaur, ekitaldi honetan, euskal mendizaletasunaren adiskideak saria 30 urte luzean Sua argitaletxearen zuzendaria izan den Javi Pascuali ematea erabaki da”.

Zorionak Javiri eta saridun guztiei!

IMG_20190215_201835