Hemen daude Euskal Herriko BTT ibilbiderik onenak

Posted on 11/03/2021 by Euskal Herria bilduma

Egun gutxi egin ditu gure artean eta dagoeneko zeresana ematen hasi da. Iván Ruiz Rotaecheren “Las mejores rutas en btt” liburuak herria goitik behera eta ezker-eskuin zeharkatzen duten hogeita hamar ibilbide zirkular dakartza bere baitan, bizikletaz Euskal Herriaz goza dezagun. Nahi duzu jakin ze ibilbide diren?

Lerroon azpian Iván “Rota”k hautatu, diseinatu eta korritu dituen hogeita hamar proposamenen zerrenda laga dugu. Haiekin batera, sarrera laburra eta ibilbideetako bat jarri dugu, Zumaiako flyscha eta euskal kostaldeko geoparkea, hain zuzen ere. Horrela liburua zertan den jakingo duzue. Ondo ibili!

eh43_bttsare Deskargatu

Bide batez: bildumaren itxura eta diseinua berriztatzeari ekin diogu. Ea gustatzen zaizuen!

“Las mejores rutas en BTT”, Euskal Herria bizikletaz ezagutzeko deia

Posted on 25/02/2021 by Euskal Herria bilduma

Erantzun

Euskal Herria Liburuak bildumako 2021eko lehenengo emaitzak, “Las mejores rutas en BTT” liburuak alegia, gure herriko natura-eremuetan barrena bizikletaz ibiltzeko gonbitea dakar. Gure geografia joria ezagutzeko ibilbide zirkularrak proposatu ditu, hala itsaslabar malkarren gainetik nola Bardeetako mortuetatik, Pirinioetako gailur harroak edo Arabako harizti zabalak ahaztu gabe. BTTz egiteko pentsatuta badaude ere, ibilbide hauek ezagutaraziko dizkiguten lekuetako batzuk oinez ere egin genitzake, hala nahi izanez gero.

Liburuak, gainera, nobedadeak dakartza. 2021. urtean zehar bildumako liburuek diseinua berritu eta eguneratuko dute, edukiak are erakargarriagoak egiteko ahaleginean. Esaten dugunaren erakusgarri bikaina da post honen buru paratu dugun liburuaren azal ederra.

Iván Ruiz Rotaechek idatzi ditu liburuko testuak eta egin ditu liburuko argazkiak. Mendizale eta txirrindulari iaioa, ondo baino hobeto ezagutzen ditu Euskal Herriko natura-eremuak. Pyrenaica aldizkariko erredakzio kontseiluko kidea da. Zer hobeto liburua Ivánek berak aurkeztea baino? Aurrera bideoa!

Euskal Herria liburuak, 2021eko uzta

Posted on 21/01/2021 by Euskal Herria bilduma

Erantzun

Euskal Herria Liburuak bildumak prest dauka 2021ean argitaratuko dituen liburuen zerrenda. Lehenengoa laster helduko da, “Las mejores rutas en BTT”. Eta jarraian, bost liburu eder etorriko dira, Euskal Herria hobeto ezagutzen eta bertatik bertara gozatzen lagunduko digutenak.

Esan bezala, otsailean “Las mejores rutas en BTT” liburu ederra agertuko da. Ivan Ruiz Rotaechek atondu du eta gure herria bizikletaz ezagutzeko aukera polita emango digu.

Martxoaren amaieran “Parque natural de Urbasa y Andia” liburuaren txanda izango da. Kike Zinkunegiren eskutik Euskal Herriko naturgune zabal eta ederrenetako baten barrena ibiliko gara.

Ondoren eta urtea amaitu bitartean, lau liburu gehiago argitaratuko ditu Euskal Herria bildumak: “Ascensiones a castillos”, Esther Merinorena, “Ascensiones desde refugios y albergues de montaña”, Txusma Perez Azacetarena, “Productos del país”, Alberto Murok ondutakoa, eta “Excursiones por riberas de ríos”, Javi Pascual Otaloraren eskutik. Ikusten denez, mendia, kultura, gastronomia eta natura egoki nahastuta aurkeztuko dizkigu liburu sorta berri honek.

Liburu guztiekin edo gehienekin interesatuta daudenentzat, harpidetza egiteko aukera dago. Horrela, liburuak nabarmen merkeago jasoko dituzte. Harpidetza egiteko, sakatu hemen.