“Rutas circulares por espacios protegidos”, gure natura eremuetako ibilbiderik onenak

Posted on 12/09/2024 by Euskal Herria bilduma

Euskal Herriko naturaren zokondorik ederrenak lege-babesaz hornitutako barrutietan txertatuta daude. Horrela izaten da gehienetan, behinik behin. Horregatik, Begoña Fernandez eta Paulo Etxeberriaren Rutas circulares por espacios protegidos liburuak gure herriko bazterrik zoragarrienetan barrena egiteko ibilbide ezin kitzikagarriagoak dakartza.

Liburuko orrialdeetan euskal mendigune nagusiak agertuko zaizkigu, tontor harroenak gure zain dituztela. Oihan trinkoek eta basorik zabalenek ere zirikatuko gaituzte, haien itzalpean gozo-gozo ibiltzera joango ote garen. Eta han dira ibaiak, padurak, ur-jauziak, meatze zaharrak… Euskal Herri osoko altxorrak ezagutzeko gonbit tentagarria egin digu liburuak.

Jakin nahi izanez gero liburuaren edukia zertan den, lerroon azpiko loturan pdfa eskuragarri dago. Hor azaltzen da aurkibidea, liburuko sarrera eta Gorobel mendietako ibilbidea, esaten dugunaren erakusgarri. Ondo ibili!

EH64_Espacios_Protegidos-SAREAK Deskargatu

Araban umeekin egiteko ibilbideak

Posted on 30/05/2024 by Euskal Herria bilduma

Erantzun

Araban umeekin egiteko moduko 35 ibilbide aukeratu, osatu eta aurkeztu ditu Gorka Lopez mendizale adituak. Herrialdeko eskualde guztietan barrena eramango gaitu, baso, tontor, ibai, arlo eta zelaiz zelai, beti ere zokondo zoragarrien bila. Txango eta igoera hauetan haurrek nahiz helduek hartuko dute gozatua. Hori da Umeekin egiteko ibilbideak. Araba liburuaren gakoa.

Horrelako liburua egiteak erronka handia du: etengabe aldatzen ari den eta eskakizun desberdinetako adinak dituzten umeen eta gazten mendi-beharrak asetzea. Hala ere, adina alde batera utzita, ohiturak eta menditik ibiltzeko abileziak izango dira erabakigarriak txikienek zer ibilbide mota egin ditzaketen argitzeko.

Arabako 35 txango hauek errazenetik zailenera daude antolatuta, eta helduon esku geratzen da asmatzea, denborak, altitudeak eta desnibelak ikusita, zein den aproposena etxeko txikienekin egiteko. Egileak beste faktore batzuk ere kontutan hartu ditu, hala nola, zoru-mota, zoru hori nola dagoen egoera meteorologikoaren arabera (hezetasuna, adibidez), pasabide zorabiagarriak, igoera gogorrak edo bestelako oztopoak…, ibilbiderik egokiena aukeratzeko ezaugarri lagungarriak, alegia.

Hori esanda, dena prest dago, beraz, natura ezagutzeko eta Arabako zenbait kobazulo, baseliza, belardi, aintzira eta gailurrez gozatzeko abenturarako. Ibilbide bakoitzak haurren jakin-mina piztuko duen informazio interesgarria duen laukitxoa darama.

Hiru dira, dagoeneko, umeekin egiteko proposamenak dakartzaten liburuak: Arabakoaz gain, Umeekin egiteko ibilbideak. Gipuzkoa eta, gaztelaniaz, Rutas con niños por Navarra.

Gipuzkoan umeekin egiteko ibilbide sorta bikaina

Posted on 19/01/2024 by Euskal Herria bilduma

Erantzun

Liburu honetan hogeita sei ibilbide aurkituko ditugu. Baina txango sorta eder horrek ezaugarri berezi bat dauka: umeekin egiteko pentsatuta daude. Gipuzkoako eskualde guztietan barrena, edertasun natural handiko edo ondare historiko nabarmeneko lekuetara eramango gaituzte. Beti, haurren gaitasunetara egokitutako desnibelekin eta distantziekin.

Horrela, ibilbide berak bi aldaera eskaintzen ditu: bata laburra, txikienekin gozatzeko, eta bestea luzeagoa, indarrak eta adina lagun dituenak erakartzeko. Ibilbide bakoitzari buruzko informazio gehigarria eskaintzen du liburuak, baita bideoak eta ibilbide bakoitzaren mapa deskargatzeko QR kodeak ere.

Kostaldeko labar eta hondartzetatik Aizkorri eta Aralar aldeko mendietara, eta Udalatxeko magaletatik Jaitzubiako zingiretara, Gipuzkoa osoa ezagutzeko eta bere natura- eta ondare-altxorrak bertatik bertara ikusteko gonbita dakar aldean.

Liburua euskaraz (Umeekin egiteko ibilbideak. Gipuzkoa) eta gaztelaniaz (Rutas en familia por Gipuzkoa) kaleratu da.

Egilea, Iñaki Alcalde, eskarmentu handiko mendizalea da eta, gainera, mendi liburuak eta artikuluak idazten trebatuta dago. Besteak beste, Guía de montes de Gipuzkoa gidaliburu arrakastatsua ondu zuen, Txusma Perez Azacetarekin batera. Dagoeneko, seigarren edizio argitaratu dira.