Heldu da “Rutas circulares fáciles” liburuaren bigarren edizioa

Joan den abuztuan agertu zen liburu-dendetan “Rutas circulares fáciles”, Euskal Herrian barrena egiteko 45 mendi-txango biltzen dituen liburua. Mendizaleek eta, oro har, publiko zabalak, harrera beroa eman zioten hasieratik bertatik. Horren ondorioz, sei hilabete egin orduko liburua agortu da. Orain heldu da liburu-dendetara bigarren edizioa.

Mendi ostera zirkular sorta hau mota guztietako natura-eremuetan barrena ibiltzen dira, izan itsaslabar harroak, izan Pirinioetako gailur segailak. Oihanak, haitzarteak, goi-ordokiak, tontor bakartiak, labore-sailez estalitako ibarrak, ikuspegi zabaleko muinoak… horiek eta beste asko agertuko zaizkigu ttipi-ttapa goazela Euskal Herriko txoko ederrenetatik. Are gehiago: urtaroaren arabera aukeratu ditzakegu gure txangoak, ahalik eta gozatu handiena lortzeko.

Ibiilbide bakoitzarekin, fitxa teknikoa, mapa eta argazkiak erantsi dizkiogu. Egilea, Txusma Perez Azaceta, Euskal Herria osoa goitik behera eta hegotik iparrera ibilita dago. Euskal mendiei buruzko liburu andana argitaratu du eta horietako batzuk, honez gero, klasiko hutsak dira.

Ezagutzen ez duzuenontzat, lerroon azpian, aurkibidea, sarrera eta mendi igoera bat utzi dugu, liburuaren mamiaren erakusgarri. Ondo ibili!

“Montes de Gipuzkoa”, mendizaleen ezinbesteko bidelaguna

Oso harrera beroa eman diote mendizaleek “Guía de montes de Gipuzkoa” liburuaren seigarren edizioari (Sua Edizioak, 2020ko maiatza). Arrakastaren gakoa, duda barik, egileek egindako lanean dago. Txusma Perez Azacetak eta Iñaki Alcaldek Gipuzkoako 155 menditara igotzen diren 95 ibilbide bildu dituzte.

Gauza jakina da gida honek Euskal Herriko mendi katalogoko tontor guztiak jaso dituela. Ibilbide bakoitzak mendibidearen nondik norako guztiak eskaintzen ditu, argazki, mapa eta jakingarriekin lagunduta.

Lerroon azpiko estekan pdfa utzi dugu. Bertan aurkituko dituzue liburuko aurkibidea, non igoera guztiak banan-bana ageri diren, eta, opari, Aralar aldeko hiru igoera. Ondo ibili!

“Guía de los montes de Navarra”, Nafarroako mendi guztiak liburu batean

Nafarroako mendien biblia esaten diote, eta badute horretarako arrazoi sendorik. “Guía de los montes de Navarra” (Sua Edizioak, 2019) liburu mamitsuaren laugarren edizioak 231 igoera eta 522 gailur bildu ditu bere orrialdeetan. Kopuru ikaragarria, egileak, Juan Mari Feliu mendizale adituak alegia, bere gain hartu duen lanaren neurria ematen diguna. Aurreko edizioa ikuskatu, zuzendu eta handitu zuen eta horretarako liburuan ageri diren tontor guztietara igo zen.

Nafarroak, bere zabalean, mota guztietako mendiak eskaintzen ditu, hasi Hiru Erregeen Mahai sabai subalpetarretik eta buka Bardeetako muino bakartietan, Higa edo Beriain gisako mendi lerdenak, Orhi bezalako mitoak eta isurialde atlantikoa zimurtzen duten mendilerro apalak ahantzi gabe. Igoera batzuk goizpasa atseginean geldituko dira; beste batzuk, berriz, egun osoa eta ahalegin handia eskatuko digute.

Guzti-guztiak, tartean direla Euskal Herriko Mendien Katalogoko Nafarroako 215 gailurrak, liburu honetan ageri dira, nola igo egoki azalduta. Aldean mapa txiki bat eta, sarritan, argazkia edukiko dute. Lerroon azpiko estekan mendi guztien zerrenda eta Baztan aldeko igoera sorta bat utzi dizuegu. Ondo ibili!