“Euskal Herria furgonetaz”, herria goitik behera ibiltzeko gida bikaina

Posted on 24/03/2023 by Euskal Herria bilduma

Bazegoen liburu honen premia. Aspalditik. Gure herria goitik behera eta ezker-eskuin furgonetaz ibiltzeko gida bikain bat behar genuen. Bada, hemen dago Euskal Herria furgonetaz. Ibilbiderik onenak, Nagore Lizarraldek eta Arkaitz Apalategik ondu duten liburu aparta. Hogeita bost ibilbide zazpi herrialdeetan barrena eroso ibiltzeko lekuan lekuko harribitxi eta altxorrekin gozatzen.

Nafarroa, Araba, Bizkaia eta Gipuzkoan bostna ibilbide proposatzen ditu liburu honek. Eta azken bostak Ipar Euskal Herriari eskainita daude. Tartean dira bost hiriburu: Iruñea, Gasteiz, Bilbo, Baiona eta Donostia. Eta, jakina, kilometroak urratu ahala, eskualde eder asko zeharkatuko ditugu: kostalde osoa (Baionatik Muskizeraino), Enkarterri, Arabako Errioxa, Nafarroako Pirinioa, Goierri, Nafarroa Beherea, Erribera…

Argazki, errepide-mapa, deskribapen eta jakingarri ugariz jantzita dator gida hau. Non aparkatu, furgonetarekin non lo egin eta erosketak non egin ere jaso dute egileek, datu praktikoak horrelakoetan ezinbestekoak direlako. Eta autokarabana guneen kokapen zehatza jakinarazteko, QR kodeak erantsi dituzte. Ezin praktikoago.

Nagore Lizarralde eta Arkaitz Apalategik eskarmentu handia daukate furgonetaz bidaiatzen. Blog bat ere badaukate, ehfurgo.eus, euren bidaien berri emateko. Orain digitaletik paperera egin dute jauzi, eta emaitza bikaina da.

“Euskal Herriko bira”ren nondik norako kitzikagarriak

Posted on 13/01/2022 by Euskal Herria bilduma

Erantzun

Zer esana ematen ari da Euskal Herriko Bira. Autoz egiteko ibilbide handia liburu berria. Izan ere, Jordi Bastartek idatzitako gida honek bederatzi etapa eta 1.130 kilometroko ibilbidea marraztu du zazpi herrialdeetan barrena gure herria hobeto ezagutzeko, bertatik bertara gozatzeko eta, azken finean, gehiago maitatzeko. Baina, nondik nora doa Euskal Herriko Bira? Galdera ona, nondik norakoak benetan kitzikagarriak dira eta.

Alde batetik, ibilbidea euskal kostalde osoari itsatsita doakio, hasi Muskizen eta Baionako barraraino. Kresalaren ostean, ibar berdeetako eta mendi altuetako belar bustiaren usaina segituko dio. Ondoren, oihan zabalak, gari-sailak, ardantzeak eta haitzarteak tartekatuko dira gure bidean, bat-batean basamortuarekin tupust egin arte. Eskualde bakartiak zeharkatuko ditugu, baina baita hiriburu guztiak (Maule izan ezik) eta hiri nagusietako asko.

Horixe da, hain zuzen, bidaia honen ezaugarririk behinena: kilometro gutxitan paisaia sorta joria ikusiko dugu: ur-jauzi ikusgarriak, gatz-harana, milioi bat lagun bizi den metropolia, haitzulo ikusgarriak, Erdi Aroko hiribilduak, portuetako giroa, Bardeetako mortuak, Larrako goi-mendia, mahastiak… Beheko irudian ageri da liburuak proposatzen duen ibilbidea.

Jakina, liburua ez da mapa hutsa. Etapa bakoitzaren nondik norakoekin batera, zazpi jakingarri, proposamen, ideia eta otordu kitzikagarri dakar gu tentatzeko. Azken finean, egun osoko ibilbidea 130en bat kilometrokoa bada batez beste, bidean egingo ditugun geldialdiek markatuko dute gure bidaia. Lerron azpian klik eginda, pdf deskargatu ahal duzue, ibilbidearekin, sarrerarekin eta orrialde pare batekin, liburuaren erakusgarri. Ondo ibili!

eh_enrutaeus Deskargatu

“Euskal Herriko bira”, bederatzi etapetako itzuli zoragarria autoz

Posted on 10/12/2021 by Euskal Herria bilduma

Erantzun

Itzuli liluragarri baten proposamenarekin dator oraingoan Sua Edizioak: Euskal Herriko Bira. Autoz egiteko ibilbide handia. Gure herria ipar-hego eta ezker-eskuin ibiltzeko gonbitea da. Bederatzi etapatan 1.130 kilometro egin eta itsasoa, goi mendiak, basamortua, labore-sailak, Erdi Aroko herriak, oihan sarriak, baserri bakartiak eta hiri modernoak bertatik bertara ikusi. Esperientzia kitzikagarria, Euskal Herria ezagutuz gozatzeko.

Etapa bakoitza, batez beste, 120 kilometro luze da. Norberak nahi duen lekuan has dezake, jakina, baina liburuak Bilbo hartu du abiapuntu. Bertatik Baionaraino helduko gara itsasertzari estu-estu atxikita, Donostia, Biarritz eta beste leku zoragarri askotan gelditu ondoren. Jarraian, Pirinioetako isurialde biak ibiliko ditugu, ipar aldekoa lehenengo eta hego aldekoa gero, Iruñera iritsi aurretik. Nafarroako erdialdetik Zangoza, Erriberri, Gares edo Lizarra bezalako mugarriak bisitatuko ditugu, Arabako Errioxan sartu orduko. Mendialdea, Lautada, Gasteiz, Aiaraldea eta Enkarterri zeharkatu eta Ezkerraldetik itzulia osatuko dugu. Euskal Herriaren zazpi aurpegi ikusiko ditugu.

Liburuak jakingarri guztiak ematen dizkigu: zer ikusi edo zer egin leku bakoitzean, nondik jo, baita bidean agertuko zaizkigun beste tentazio batzuen berri ere. Beraz, guk erabakiko dugu autoa non eta noiz gelditu, zerekin gozatu, zenbat denbora eman…

Liburua Jordi Bastart kazetari adituak idatzi du. Bidaia-liburu andana idatzita dago (tartean Sua Edizioaken En Ruta bildumako Grand Tour de Catalunya) eta ondo baino hobeto ezagutzen du Euskal Herria. Gainera, Sua Edizioak-ek ere bere ekarpena egin du Euskal Herriko Bira. Autoz egiteko ibilbide handiak euskal kulturaren ikuspegia ere jaso dezan. Elkarlan horretatik jaio da ibilbide liluragarri hau. Ondo ibili!