Liburu Egunerako proposamenak

Posted on 23/04/2021 by Euskal Herria bilduma

Liburu Eguna da gaur eta, beti bezala, aukerak ugariak dira. Sua Edizioak ere prest da gomendio txiki batzuk egiteko, aisialdia, mendia, kultura eta natura liburuen bidez ezagutzeko tentazioan eror gaitezen.

Mendi literatura maite duzuenentzat, gomendioa erraza da. Egunotan heldu da liburu-dendetara Aupa Pou. Bizitzari sokaz lotuta, Eneko Pouk idatzita gasteiztar anaia eskalatzaile bien kirol ibilbide abenturazalea jasotzeko. Arlo horretatik irten gabe, Alex Txikonen Mendi biluzia kitzikagarriak ez du inor epel utziko.

Euskal Herria bilduman zer esan handia eman duen Las mejores rutas en BTT liburua nabarmendu daiteke. Iván Ruiz Rotaeche mendizale eta txirrindulari adituak idatzi du.

Mendi giden artean, azken urte biotan berriztatu direnak oso gomendagarrik dira. Hala Guía de los montes de Navarra erraldoia (Juan Mari Feliu, 2019), nola Gipuzkoakoa (Iñaki Alcalde/Txusma Perez Azaceta, 2020) eta Arabakoa (Josean Gil-Garcia, 2021). Mendi igoera ikaragarri ederrak egingo ditugu Euskal Herrian bertan.

Askoz gehiago dago Suaren katalogoan. Komikiak (Iñurrategi anaiena, berriena), bildumak (El Mundo de los Pirineos, Galicia, Aragón…), mapak (Urdaibai, Valderejo…) eta beste asko. Liburu-dendetan daude, noiz agertuko garen begira. Ondo ibili Liburu Egunean!

“Montes de Araba”, klasikoa sasoi betean itzuli da

Posted on 16/04/2021 by Euskal Herria bilduma

Erantzun

Bosgarren edizioa dago egunotan salgai liburu-dendetan eta ia hogeita hamar urte igaro dira lehenengoz argitaratu zenetik. Baina gazte, lerden eta sasoitsu itzuli da klasikoa. “Guía de montes de Araba” liburuak hilabete darama salduenen zerrendan eta harrera ezin beroagoa egin diote euskal mendizaleek.

Bosgarren edizio hau goitik behera berrituta dago eta 320 igoera dakartza. Orotara, 126 mendi tontor bisitatu ditu egileak, Josean Gil-Garcia mendizale adituak alegia. Eskualdeka antolatuta datoz, gailur bakoitza bere deskribapen, jakingarri, mapa eta argazkiekin.

Bada, liburu-dendetan harrera ezin hobea egin diote mendizaleek, azken asteetan salduenen zerrendan sartu arte. Elkar taldeko liburu-dendetan, adibidez, aurreko astean bigarren salduena izan zen erdarazko ez-fizkio atalean eta asteon laugarren dago.

Eta hedabideek ere oihartzun zabala eman diote klasikoari. Hemen uzten dizkizuegu, adibide gisa, naiz.eusen Andoni Arabaolazak agertutako aipamena (euskaraz) eta Radio Euskaldin Roge Blascok Josean Gil-Garciari egindako elkarrizketa (erdaraz, 22:25 minututik aurrera).

Hortaz, argi dago. Klasikoa sasoitsu itzuli da eta deika daukagu. Jantzi botak eta… mendira!

“Montes de Araba”, 320 mendi igoera bikain

Posted on 26/03/2021 by Euskal Herria bilduma

Erantzun

“Guía de montes de Araba” liburu klasikoaren bosgarren edizioa goitik behera zaharberrituta dator. Josean Gil-Garcia mendizale adituak banan-bana ikuskatu ditu ibilbide guztiak, gaur egun zertan diren ikusi du, egoera txarrean daudenak edo interesa galdu dutenak baztertu eta bide berriak aurkitu ditu. Emaitza bikaina da. Arabako 126 mendira heltzeko 320 igoera dakartza, ohi bezala ederki deskribatuta, jakingarri guztiekin, mapa eta argazki banarekin.

Liburu mardula da “Guía de montes de Araba”. Bertan daude federazioaren Euskal Herriko mendien katalogoko Arabako tontor guzti-guztiak. Eta bat gehiago, Arrayuelas ere tartean dago eta. Horien bidez Arabako paisaien aniztasuna eta joritasuna ezagutzeko parada izango dugu, hasi ibar atlantikoetako mendietan eta amaitu Toloñon eta Valderejon, tartean daudela Aratz edo Gorbeia bezalako handiak, Entzia aldeko goi-lautadako gailurrak edo Badaiako tontor bakartiak.

Josean Gil-Garcia mendizale aditua da eta urte asko dira dibulgazio lanetan hasi zenetik. Sua Edizioak-ekin liburu asko plazaratu ditu eta, horrez gain, Berria egunkarian ere mendi ibilbideak argitaratzen ditu. Beheko bideoan, liburua aurkeztuko digu.