Baserriak Lekarozko Arrazkazan auzoan.

Hilaren 4an uholde bortitzek Elizondo eta Erratzu gogor astindu bazituzten ere, Baztan eta Malerreka aldean arin ibili dira kalteak konpontzeko, bazterrak garbitzeko eta dena txukun eta behar bezala edukitzeko. Lan handia egin dute, gehiena ibarreko biztanleen auzolanari esker. Ahalegin itzel horren ondorioz, datorren asteburuan berriz ere bisitariak hartzeko moduan egongo direla iragarri dute.

Eskualdeko turismo erakudeak, Bertiz Partzuergo Turistikoak alegia, oharra kaleratu du jakinarazteko “Baztan Bidasoa irrikaz dagoela datorkigun asteburu eguzkitsua aprobetxatzeko”. Hala herritarrek nola landa-etxeak, hotelak, kanpinak, jatetxeak, ostatuak eta zerbitzu elkarteak “gogo haundiz daude, beti bezala, zerbitzua ahalik eta hoberen emateko Baztan Bidasoan egonaldia ahaztezina izan dadin”.

Baztan aldera jotzeko gogoaz zeudenak, beraz, ez ditzatela planak alda. Eta inguru kaltetua lagundu nahi duenak, egote hutsarekin lagun dezake bertara egun edo asteburu pasa joanda. Paradisu berdea gure zain dago.