Datorren igandean, ekainak 15, Ezkio-Itsasoko Igartubeiti baserri-museoan seigarren Baserri Eguna ospatuko dute. Aurten Neolitotik datorren kultur tradizio oparoari erreparatuko dio Baserri Egunean: artzaintzari.

Egitaraua goizeko 11:30ean hasiko da Ion Orzaiz eta Iñaki Vergararen argazki erakusketaren zabalpenarekin. Eguerdian Fermin Leizaolaren eskutik bisita gidatua artzaintzaren tradizioaren bila. 12:30ean Idiazabalgo gaztaren dastaketa (aurrez izena eman behar da). 13:30ean ardiak mutiltzeko (ilea mozteko) erakustaldia egingo du Jose Etxezarretak. Ordubete geroago, herri bazkaria izango da, artzaintzari lotutako produktuekin. Eta bazkalosterako, Mixel Etxekopar zuberotar musikariaren kontzertua, artzaintzaren doinuak gogora ekartzeko.

Egun osoan zehar familia osoarentzako ekintzak izango dira. Igartubeiti XVI. mendeko baserri puska da, museo gisa atonduta. Informazio gehiago hemen.