Harrera gozoa “Cañadas y senderos de pastores” liburuari

Posted on 25/04/2023 by Euskal Herria bilduma

Liburu desberdina da Cañadas y senderos de pastores. Mendietara igotzera eta tontorrera heltzera animatzen gaitu, baina ez edonondik: mendeetan zehar abeltzainek aziendak udako larreetara eramateko erabili dituzten bideak aukeratu ditu. Gainera, artzain-jarduera eta kultura gaur egun zertan diren jakiteko aukera eskaini digu. Abelbide horietan gora, inguruko paisaia modelatu dutenekin batera ibiliko gara gailurrerantz.

Mendizaleek harrera gozoa egin diote liburuari, eta hedabide batzuek arin eman dute liburuaren berri. Esate baterako, BasqueMagazinek edo Goierriko Hitzak. Azken horretan elkarrizketa egin diete egileei, Sara Carte Moriones eta Txusma Perez Azacetari alegia.

Liburuaren edukiaz gehiago jakiteko, lerroon azpian Cañadas y senderos de pastores liburuko aurkibidea eta orrialde batzuk utzi ditugu, erakusgarri. Ondo ibili!

sareak_eh56_pastoreo Deskargatu

“Cañadas y senderos de pastores”, artzain-bideetatik gora

Posted on 29/03/2023 by Euskal Herria bilduma

Erantzun

Mendira joateko modu eta bide asko daude. Cañadas y senderos de pastores liburuan, Txusma Perez Azaceta eta Sara Carte Morionesek artzainak eta artaldeak hautatu dituzte bidelagun. Antzinean bezala gaur egun ere erabiltzen dituzten bideetan gora egitera gonbidatzen gaituzte. Mendiaz gozatu eta, gainera, artzain kulturaren ondare joria eta gaur egungo errealitatea bertatik bertara ezagutzeko parada izango dugu.

Orotara, hogeita bost ibilbide bildu dituzte egileok liburu honetan, hogeita hamarren bat gailur egiteko asmoz. Baina tontorrak bezain inportanteak dira bidean aurkituko ditugunak. Izan ere, zeharkatuko ditugun parajeak, hein handi batean, artzaintzak moldatu ditu: larreak, oihanak, trikuharriak, sarobeak, kaiolarrak eta kortak… Abelbideotan barrena egingo ditugun txango eta igoeren osagarri, egileok plan sorta ederra erantsi diote liburuari artzain kulturaz behar bezala janzteko, baita gazta gozoa dastatzeko ere, zergatik ez.

Txusma Perez Azaceta eta Sara Carte Morionesek proposamen sorta bikaina osatu dute, Aiaraldea eta Ganekogortatik Andiaraino. Tartean dira artzain-kulturaren eremu gorenak diren Gorbeia, Urkiola, Aizkorri, Entzia, Aralar eta Urbasa. Ondo ibili!

“Euskal Herria furgonetaz”, herria goitik behera ibiltzeko gida bikaina

Posted on 24/03/2023 by Euskal Herria bilduma

Erantzun

Bazegoen liburu honen premia. Aspalditik. Gure herria goitik behera eta ezker-eskuin furgonetaz ibiltzeko gida bikain bat behar genuen. Bada, hemen dago Euskal Herria furgonetaz. Ibilbiderik onenak, Nagore Lizarraldek eta Arkaitz Apalategik ondu duten liburu aparta. Hogeita bost ibilbide zazpi herrialdeetan barrena eroso ibiltzeko lekuan lekuko harribitxi eta altxorrekin gozatzen.

Nafarroa, Araba, Bizkaia eta Gipuzkoan bostna ibilbide proposatzen ditu liburu honek. Eta azken bostak Ipar Euskal Herriari eskainita daude. Tartean dira bost hiriburu: Iruñea, Gasteiz, Bilbo, Baiona eta Donostia. Eta, jakina, kilometroak urratu ahala, eskualde eder asko zeharkatuko ditugu: kostalde osoa (Baionatik Muskizeraino), Enkarterri, Arabako Errioxa, Nafarroako Pirinioa, Goierri, Nafarroa Beherea, Erribera…

Argazki, errepide-mapa, deskribapen eta jakingarri ugariz jantzita dator gida hau. Non aparkatu, furgonetarekin non lo egin eta erosketak non egin ere jaso dute egileek, datu praktikoak horrelakoetan ezinbestekoak direlako. Eta autokarabana guneen kokapen zehatza jakinarazteko, QR kodeak erantsi dituzte. Ezin praktikoago.

Nagore Lizarralde eta Arkaitz Apalategik eskarmentu handia daukate furgonetaz bidaiatzen. Blog bat ere badaukate, ehfurgo.eus, euren bidaien berri emateko. Orain digitaletik paperera egin dute jauzi, eta emaitza bikaina da.