Haitzetako zuloak, Karrantza eta Arcenatik Biarritz eta Leireraino

Posted on 05/05/2015 by Euskal Herria bilduma

Sartzaleta (Allinibarra, Nafarroa). Lokizko haitzetan induskatutako zulo ikusgarria.

Aste gutxi batzuk besterik ez du behar izan Ventanas naturales liburuak mendizaleen arreta bereganatzeko. Santi Yanizen lanak eduki berritzaileari zor dio arrakasta hori. Euskal Herria Liburuak bildumako titulu horrek orain arte oharkabean igaro litezkeen leku zoragarriak plazaratu ditu. Horietako eskutada bat besterik ez zen berez ezaguna (Jentilzubi, Baltzola, Atekagaitz …).

Horixe da, hain zuzen, liburuaren bertute nagusia, naturaren altxor horiek -50, orotara- argitara atera, dagozkien ezaugarriez aurkeztu, benetako garrantzia aitortu eta mendizaleen esku utzi izana alegia. Zeintzuk dira altxor horiek? Behean argitaratu dugu liburuko aurkibidea, aukeratutako 50 zuloekin. Batzuen ospea Euskal Herri osora zabaldu da, baina gehienak lekuan bertan besterik ez dituzte ezagutzen. Eta batzuetan, ezta hori ere ez. Horra hor aukera, beraz, nahi duenarentzat, Euskal Herria sakonago ezagutzeko eta, batez ere, paisaiari beste era batera begiratzeko.

Excursiones a ventanas naturales, bidaia ikusgarria Santi Yanizen eskutik

Posted on 11/03/2015 by Euskal Herria bilduma

Ez gara oso oker ibiliko Euskal Herria bildumako liburu berria, Excursiones a ventanas naturales alegia, euskal mendizaleen artean klasiko bihurtuko dela esaten badugu. Badauzka eduki horretarako behar beste dohain. Alde batetik, gure mendietako haitzetan zabaldutako zulo, lehio eta zubietara eramango gaitu, leku liluragarriak, sorginduak, elezaharrei atxikiak edo natur balio handiko bazterretan txertatuak.

Beste aldetik, egileak ahalegin itzela egin du liburua irakurtzen dutenen harridura sortzeko eta lortu ere lortu du. Berrogeita hamar dira erakusten dizkigun haitzetako zuloak, tartean direla klasiko guztiak (Atxulaor Itxinan, Atekagaitz Itxasun, Sandriati edo San Adrian Aizkorrin…) eta lekuan lekuko bizilagunek besterik ezagutzen ez duten beste asko ere (Karrantza, Arcena, Arkamo eta Entziako mendietakoak, Irunberriko Trinitatea…). Itsasbazterrari ere erreparatu dio, hasi Bakion eta Biarritzeraino.

Hori dena gutxi balitz, testuak jakingarriz beterik datoz, haitzetako zuloen kokapena zehatz-mehatz azaltzen duten mapak alboan dituztela. Eta, jakina, argazkiak. Santi Yanizek ohi duen maisutasunaz islatu ditu leku liluragarri horiek, sarritan une gogoangarrietan harrapaturik, alegia, argiek edo eguraldiek itxura sorgindua erantsi dietenean.

Txokoetako isilpeko errezetak, etxera

Posted on 26/01/2015 by Euskal Herria bilduma

Erantzun

Zaporez beteta ekin dio urteari Euskal Herria Liburuak bildumak. Los secretos del txoko a su cocina liburu berriak 218 errezeta bildu ditu helburu argi batekin: denon esku jartzea gure gastronomiaren sekretu guztiak. Hasi arrautzak frijitzen eta segi haragi eta arrain sorta zabalarekin harik eta gourmet afizionatuen eta sukaldean ganoraz hasi nahi dutenen gutiziak ase arte.

Egileak, Andoni Diazek alegia, bere kasa ikasi du txoko eta sozietateetan, batetik, eta lehiaketa gastronomikoetan bestetik. Urte askotako jardunaren ondorioz ikasitako sekretuak denon eskura paratu ditu orain, jatekoak prestatzeko grina eta plazera sentitzen dutenentzat aberasgarri.

Liburuak hamairu atal ditu. Hasi zopa, krema, entsaladak eta hasierako platerekin hasi da. Ondoren, arrautza, tortilla, barazki, lekale, pasta eta arrozen arloak jorratu ditu. Horien ostean, arrain, itsaski, hegazti, ehizaki, haragi, ziza eta onddoen arloan murgildu da. Amaitu orduko, saltsak, saldak, mahonesa, azkenburukoak, olioak eta likoreak zelan prestatu azaldu du. On egin!